Kópshilikti qýanyshty oqıǵamen quttyqtaǵan Amandyq Batalov memleket qoldaýynyń arqasynda oblysta densaýlyq saqtaý salasyn damytýda, medısınalyq qyzmet kórsetý sapasyn arttyrýda birshama jumystar atqarylǵanyn tilge tıek etip, neonataldyq ortalyqtyń ashylýyn sonyń bir aıǵaǵy dep atap ótti:
– Memlekettiń basty merekesi Táýelsizdik kúnine oraı mańyzdy nysandy iske qosyp otyrmyz. Oblysqa jańa týǵan sábılerge, jalpy balalarǵa arnaıy medısınalyq kómek kórsetetin osyndaı ortalyq qajet bolatyn. Búgin, mine, sol qýanyshty kúnge jetip otyrmyz. Neonataldy hırýrgıalyq ortalyq qajetti zamanaýı quraldarmen tolyq jabdyqtalǵan. Mundaı ortalyqtar elimiz boıynsha sanaýly ǵana. Mamandar endi osy qural-jabdyqtardy balalar emine tıimdi paıdalanady dep senemiz. Qazir biz Memleket basshysynyń tapsyrmasyna oraı densaýlyq saqtaý salasyn sıfrlandyrýdy qolǵa aldyq. Bul rette memlekettik-jekemenshik áriptestik tıimdi tetik bolyp otyr. Osy saladaǵy kóptegen jobalar memlekettik-jekemenshik áriptestik negizinde júzege asyrylýda. Olardyń qatarynda oblystyń aýdan, qalalaryndaǵy dárigerlik ambýlatorıalar, emhanalar da bar. Medısına ǵylymynyń jetistikteri, jańa qural-jabdyqtardy kásibılikpen tıimdi qoldaný adam ómirin saqtaýǵa jáne densaýlyǵyn nyǵaıtýǵa septesedi dep oılaımyn, – dedi oblys ákimi A. Batalov. Sonymen qatar kelesi jyly oblystyq kóp salaly balalar aýrýhanasykúrdeli jóndeýden ótkiziletinin, aýmaǵy abattandyrylatynyn atap ótti.
Oblystaǵy medısına mamandarynyń atynan densaýlyq saqtaý salasynyń ardageri Áshimǵalı Jumageldın sóz alyp, bul oblys turǵyndary úshin mańyzdy jańalyq bolǵanyn jetkizdi.
– Densaýlyq – basty baılyq, eń aldymen balalarymyz aýyrmasa eken deımiz. Sábı ólimin boldyrmaý úshin onyń aldyn alyp, aýrýdy erte kezeńinde anyqtaýkerek. Mundaı zamanaýı neonataldy hırýrgıalyq ortalyqtyń jumysy osyndaı mańyzdy máseleniń sheshimine zor yqpal etetinine senimdimin, – deı kele ardager jınalǵandardy Táýelsizdik merekesimen quttyqtady.
Jas maman, jańa neonataldy hırýrgıa ortalyǵynyń reanımatolog dárigeri Álıaqpar Bekuly quttyqtaý tileginen keıin óziniń dárigerlik tájirıbesimen bólisti:
– Meniń tájirıbemde jańa týǵan sábıge kúrdeli operasıa jasaý úshin Almaty, Astana qalalaryna tasymaldaý jaǵdaılary jıi kezdesetin, bul, árıne, úlken qaýip bolatyn. Ondaı kezde árbir saǵat emes, tipti mınýttyń ózi qymbatqa túsedi. Sondyqtan mundaı ortalyqtyń Taldyqorǵanda ashylýy – shynynda da biz úshin úlken oqıǵa. Biz, dárigerler, óz tarapymyzdan sábılerdiń densaýlyǵy men ómirin saqtaýǵa jáne nyǵaıtýǵa bar kúsh-jigerimizdi jumsaımyz, – dedi.
Ǵımarattyń lentasy qıylǵan soń oblys ákimi A. Batalov bastaǵan azamattar neonataldy hırýrgıa ortalyǵynyń ishin aralap kórdi. Tańý, otadan keıingi jáne reanımasıalyq bólmelerde boldy. Qazirgi kezde ortalyqta 5 bala em alyp jatyr.
Atap ótsek, neonataldy hırýrgıalyq ortalyq 60 tósekke shaqtalǵan, 20 palatasy bar. Reanımasıalyq bólimde 9 tósek qoıylǵan.Ortalyq jańa ozyq úlgidegi quraldarmen jabdyqtalǵan. Atap aıtqanda, laparoskopıalyq baǵan, beınekolonoskop, fıbrogastroskop, bronhoskop, narkozdyq apparattar, IVL, jańa týǵan nárestege arnalǵan «Jıraf» reanımasıalyq ústeli, fototerapıa apparattary, kúvezder, reanımasıalyq tósekter bar.
Ótken jyldyń mamyr aıynan «Almaty – Constuction BM» JSHS Ortalyqqa arnalǵan qosalqy ǵımarattyń qurylysyn bastap, bıylǵy jyldyń tamyz aıynda aıaqtaǵan bolatyn. Jobanyń quny –896,2 mln. teńge. Jańa neonataldy ortalyqtyń mindeti – jańa týǵan sábılerge jáne balalarǵa kórsetiletin medısınalyq kómekti jetildirý.
Jalpy Almaty oblysynda medısına mamandarynyń biliktiligin arttyrýǵa, olardy qaıta daıarlaýǵa kóp kóńil bólinedi. Bul maqsatqa 2018 jyly jergilikti búdjetten 201,5 mln. teńge bólingen. Sonyń nátıjesinde óńirdiń medısına qyzmetkerleri sheteldiń ozyq klınıkalarynda tájirıbe almasýǵa, belgili klınıkalardyń joǵary bilikti mamandarynan dáris tyńdaýǵa múmkindik aldy. Máselen, 2018 jyly 344 maman Lıtva, Polsha, Ońtústik Koreıa, Túrkıa kadrlarynan dáris aldy. Sol sıaqty Izraıl, Ońtústik Koreıa, Túrkıa elderinde qabyldaý bóliminiń jumysyn jetildirý, laparoskopıalyq tehnıkamen jumys isteý, trıaj júıesi boıynsha medısınalyq suryptaýǵa qatysty taǵylymdadan ótti. Elbasynyń Joldaýda qoıǵan mindetterin oryndaý maqsatynda 50 medısına mamany Lıtvaǵa akýsherlik pen neonatologıada kúrdeli jaǵdaıda bosandyrý boıynsha oqýǵa jiberiledi.
