Jetisýda qonys toiy jalǵasýda
Buǵan deiin 5 balasymen páter jaldap turǵan otbasyǵa jańa úidiń kiltiń aýdan ákimi Temirlan Bektasov tapsyrdy.
– Búginge deiin aýdanymyzda 13 kóp balaly otbasy baspanaly boldy. Buiyrsa, jyldyń sońyna deiin osyndai 20 otbasyny qýantpaqpyz. Barlyǵy kásipkerlerdiń qoldaýymen júzege asyp jatyr. Úi ielerine úilerińiz qýanyshqa, shattyqqa toly bolsyn degim keledi, – dep sózin qorytyndylady aýdan basshysy.
Al, úidiń kenjesi Erbosynnyń qýanyshynda shek joq. Ózimen teteles ósken inisi Nurbosyn da jańa úige kirgenine erekshe qýanýda. Balalarynyń qýanyshyna qarap kózine jas alǵan Janardyń qaiyrymdy jandarǵa alǵystan basqa aitary joq.
Qaiyrymdylyq sharaǵa óz úlesin qosqan demeýshi Rizvan Sakiova úige qosymsha jóndeý jumystaryn júrgizip, ishine jihazdardy da satyp alyp bergen.
– Men kóp balaly otbasynda óstim. Ákemiz árdaiym osyndai otbasylarǵa qoldaý kórsetý kerektigin aityp otyratyn. Bul – kópbalaly otbasyǵa jasalǵan qamqorlyqtyń bir parasy ǵana. Analar men kópbalaly, kómekke muqtaj otbasylarǵa qamqorlyq áli de óz jalǵasyn tabady, – dep ýáde etti kásipker.
Eske salaiyq, biyl Panfilov aýdanynyń 40 otbasyna memleket tarapynan úidiń kiltin tapsyryldy, onyń 26-sy kóp balaly jáne az qamtylǵan otbasylar.
Aita ketý kerek, Kóksý aýdany, Jarlyózek aýylynda órt saldarynan baspanasy men asyraýshysynan bir mezette aiyrylǵan otbasyna da páter kilti tabystaldy.
Esterińizde bolsa, osydan 6 ai buryn Aqbergenovtar áýlietiniń baspanasy tolyǵymen otqa oranyp, janyp ketken. Sol oqys jaǵdaida Záýre otaǵasy Erlannan aiyrylyp, 3 balamen jalǵyz qalǵan bolatyn.
Alaida kóp uzamai Qazaqstan musylmandary dini basqarmasy «El úlesi-páterge» jobasy aiasynda «Zeket» qory Záýre Tóletaiqyzyna baspana kiltin tabystady.
– Balalarmen dalada qalǵan sátimde páter jaldap sandalatyn shyǵarmyn dep oilaǵan edim. Alaida meiirimdi jandar bar ekenine kózim jetti. Olarǵa degen rizashylyǵymdy qalai jetkizerimdi bilmeimin. Aýyl halqy azyq-túlik, kiim-keshekpen, aqshalai únemi kómek kórsetip turdy. Endi mine, qamkóńil otbasyny qamqorlyq tanytyp baspana syilaǵan janashyrlarǵa alǵysym sheksiz, – dedi otanasy.
Taldyqorǵan óńirindegi «Zeket» qorynyń basshysy Serik Sarymoldaevtiń aitýynsha, bul Respýblika boiynsha berilgen 123-shi, Almaty oblysynda 39-shy baspana eken.
Baljan Qairatqyzy, Almaty oblysy
