Bıyl Sý resýrstary jáne ırrıgasıa mınıstrligi Jetisý oblysyndaǵy Qyzylaǵash sý qoımasynyń rekonstrýksıasyn aıaqtady. Naqtyraq aıtqanda, sý tasqyny úshin paıdalanylatyn sý jiberýge arnalǵan kanal nyǵaıtylyp, sý qabyldaıtyn jańa torap salyndy, dep habarlaıdy Dalanews.kz
Sonymen qatar zamanaýı baqylaý dachıkteri ornatylyp, avtomattandyrylǵan monıtorıń júıesi men jergilikti habarlandyrý júıesi engizildi. Syıymdylyǵy 42,6 mln. tekshe metr bolatyn sý qoımasynyń rekonstrýksıasy 6 680 gektar egistik alqabyn sýmen turaqty qamtamasyz etýge múmkindik berdi.
«Memleket basshysy elimizdiń sý sharýashylyǵy ınfraqurylymyn jańǵyrtý mindetin qoıǵan bolatyn. 2023 jyly júrgizilgen gıdrotehnıkalyq nysandardy túgendeý nátıjesinde sý salasyn damytýdyń keshendi jospary ázirlendi. Ol 160-tan astam is-sharany qamtıdy. Sonyń ishinde 42 jańa sý qoımasyn salý jáne 37 jumys istep turǵan nysandy rekonstrýksıalaý jumystary bar. Qyzylaǵash sý qoımasyn rekonstrýksıalaý jergilikti turǵyndardy sý tasqynynan qorǵap, Jetisý oblysynyń aýyl sharýashylyǵyn damytýǵa serpin beredi», – dedi Sý resýrstary jáne ırrıgasıa vıse-mınıstri Erbolat Ibraıhanov.
