Jetisý oblysynda múgedek jandar úshin ǵimarattardy infraqurylymmen qamtamasyz etý 69%-ǵa jetti. Bul respýblika boiynsha eń joǵarǵy kórsetkish. Osy baǵyttaǵy jumys jalǵasady,- dep habarlaidy Dalanews.kz Jetisý oblysy ákiminiń baspasóz qyzmetine silteme jasap.
Oblystyq jumyspen qamtýly úilestirý jáne áleýmettik baǵdarlamalar basqarmasynyń málimetinshe, 2022-2024 jyldar aralyǵynda oblys aýmaǵyndaǵy 625 nysan múgedek jandardyń kirip-shyǵýyna beiimdelgen. Biyl memlekettik jáne jekemenshik mekemelerdiń shamamen 195 nysanyn beiimdeý josparda bar. Memlekettik nysandar úshin biýdjet qarjysy qarastyrylǵan.
Sonymen qatar invataksi kóliginiń sany sońǵy eki jylda eki esege ósti. Oblys kóleminde qazir 32 invataksi qyzmet kórsetip júr. Jyl saiyn múgedektigi bar adamdardy qajetti tehnikalyq qurylǵylarmen qamtamasyz etýge qarjy bólinedi.
Jalpy oblys boiynsha múgedektigi bar azamattarǵa arnaiy áleýmettik qyzmet kórsetetin 13 mekeme jumys isteidi. Aldyńǵy jyly Alakóldiń jaǵasyndaǵy aýdandyq ákimdiktiń rezidentsiiasy múgedek balalarǵa arnalǵan ońaltý lagerine berildi. 2023 jyly «Qamqorlyq» qorymen birlesip, aýtizm jáne psihikalyq damýynda basqa da aýytqýshylyǵy bar balalarǵa arnalǵan ortalyq ashyldy. Taldyqorǵan qalasynda múgedekterge arnalǵan «Asar» saýyqtyrý ortalyǵy jumys isteidi. Oǵan memlekettik qoldaý turaqty kórsetilip keledi. Al biyl oblys ortalyǵynda 150 oryndy taǵy bir ońaltý ortalyǵynyń qurylysy bastalady.
Jalpy óńirde inkliýzivti orta qalyptastyrý jumystary osyndai birneshe baǵyttarda júrip jatyr.
