Jetisý oblysynda «Mereili otbasy» ulttyq baiqaýynyń oblystyq kezeńiniń júldegerleri marapattaldy. Jeńimpaz áýletter ókilderine marapatty oblys ákimi Beibit Isabaev tapsyrdy,- dep habarlaidy Dalanews.kz
Taldyqorǵan qalasyndaǵy Biken Rimova atyndaǵy drama teatrynda ótken saltanatty sharada sóilegen quttyqtaý sózinde óńir basshysy otbasy qundylyqtaryn saqtaýdyń, urpaq tárbiesiniń qoǵamdaǵy mańyzyna toqtalyp, oǵan «Mereili otbasy» baiqaýynyń oń yqpal etip otyrǵanyn atap ótti.
- Ulttyq qundylyqtardyń bastaýy Atameken, týǵan jer, qara shańyraq uǵymdarymen árdaiym tyǵyz bailanysty. Sondyqtan otbasy institýtyn damytý, otbasylyq qundylyqtardy nasihattaý, urpaqtar sabaqtastyǵyn dáripteý - bizdiń ortaq mindetimiz. Búgin marapattalyp otyrǵan ónegeli otbasylar – Jetisý jeriniń ǵana emes, qazaq eliniń maqtanyshy bolýǵa laiyq dep bilemin, - dedi B. Isabaev.
Munan soń saltanatty jiyn marapattaý rásimimen jalǵasty. «Mereili otbasy» baiqaýynyń I oryn júldesi Eskeldi aýdanynan qatysqan Bektenovtar otbasyna berildi. II orynǵa alakóldik Shuǵaevtar ie boldy. Úshinshi oryn júldesimen Kerbulaq aýdanynan kelgen Jaqypbekter otbasy marapattaldy. Olarǵa aqshalai sertifikat, arnaiy diplom jáne statýetka syiǵa tartyldy. Sol siiaqty yntalandyrý syilyqtaryna tekelilik Bekbergenovter, Alakól aýdanynan kelgen Ómirtaevtar, Kerbulaq aýdanynan qatysqan Omarovtar, kóksýlyq Ádilqojaevtar, qarataldyq Bibolovtar, Ábilhanovtar, Panfilov aýdanynan kelgen Satybaldievtar otbasy ielendi.
Máselen, osy kúni erekshe qurmetke ie bolǵan Bektenovtar áýletinde úsh jasynan atqa mingen, bes jasynan báigege qatysyp júrgen Hamza esimdi jas shabandoz ósip keledi. Ol 10 jasyna deiin respýblikalyq jáne halyqaralyq jarystardyń jeńimpazy, «Altyn Tuǵyr» syilyǵynyń laýreaty jáne «Jetisý batyry» tósbelgisiniń iegeri boldy.
- Joldasym Marlan Bektenov belgili bapker, ózi de jastaiynan myqty shabandoz bolǵan. Búginge deiin 30-dan astam balany shabandozdyqqa úiretti, sonyń ishinde balamyz Hamza da bar. Hamza jastaiynan jylqyǵa jaqyn bolyp ósti, óte sezimtal bala, attyń minez-qulqyn aitqyzbai sezip-bilip otyrady. Marlan ekeýmiz 7 bala ósirip, tárbielep otyrmyz. Balalarymyzdy úlkendi qurmetteýge, kishige izetti bolýǵa úiretip kelemiz. Búgin «Mereili otbasy» baiqaýynan 1-shi oryndy ielenip, respýblikalyq baiqaýǵa joldama aldyq. Astanadan da jeńispen oralamyz degen úmitimiz bar, - deidi Dinara Bektenova.
Osyndai marapatqa ie bolǵandardyń biri - Qaratal aýdanynan Bibolovtar áýleti. Olar - jalpy eńbek ótili 75 jyldan asatyn temirjolshylar.
- Meniń ákem temir jolda 44 jyl eńbek etti. Al meniń osy saladaǵy eńbek ótilim - 41 jyl, joldasymnyń ótili – 37 jyl. Sol siiaqty balam da bizdiń jolymyzdy jalǵap, 20 jyldan beri temir jol salasynda qyzmet jasap keledi. Búgingi baiqaýǵa otbasynyń bereke-birligi men ózara syilastyǵy qandai bolatynyn kórsetip, jastarǵa oi salsaq degen maqsatpen qatysqanbyz. Bizdiń áýletimizdiń ómir jolyn baǵalap, marapattap jatqandaryna shyn júrekten qýandyq, - deidi otanasy Svetlana Ábisheva.
Jalpy «Mereili otbasy» ulttyq baiqaýynyń oblystyq kezeńine 418 otbasy qatysqan. Osy oraida atap ótsek, ótinimder sany jaǵynan Jetisý oblysy elimiz boiynsha aldyńǵy orynnan kórindi.
