Aýyl sharýashylyq daqyldarynyń keń kólemde egilýimen onyń jemisti dán berýi ekonomıkalyq materıaldyq ál aýqattyń artýyna sebep bolary haq.
Osy maqsatta Qapshaǵaı, Kóksý óńirlerindegi kóktemgi egin egý naýqany bastalyp, qyzý júrip jatyr.
Búginde Qapshaǵaıdaǵy egis alqabynda aǵymdaǵy jyly 13666 gektar egistik jerdiń ıgerilýi kózdelse, onyń 8448 gektary sýarmaly jerlerdi qurap otyr. Aýyl sharýashylyǵy daqyldaryn egýdiń ońtaıly merzimi retinde – 25 naýryzdan – 10 mamyrǵa deıingi aralyq kózdelip otyr.
Qapshaǵaı qalasynyń áleýmettik-ekonomıkalyq keshendi baǵdarlamasy tóńireginde 2021 jyly dándi-daqyldar 4297 gektarǵa, onyń ishinde jazdyq arpa 3941 gektarǵa, dándik júgeri 756 gektarǵa, maıly daqyldar 4062 gektarǵa, kartop 350 gektarǵa, kókónister barlyǵy 1935 gektarǵa, baqsha daqyldary 190 gektarǵa, qant qyzylshasy – 800 gektarǵa, mal azyqtyq ónimder 2155 gektarǵa sebilmek.
Dala jumystaryn jospar boıynsha júrgizý úshin sharýa qojalyqtary qajetti tehnıkalyq jabdyqtarmen qamtamasyz etilgen. «Aqózek SDO» 11 tehnıkamen, «AgroServısQanT SDO» AÓK 21 tehnıkamen, atap aıtqanda 150 birlik aýyl sharýashylyq tehnıkalary túgeldeı jumyldyryldy.
Tórt birdeı sharýa qojalyqtarynan kelip túsken ótinish maquldanyp, Oblystyq aýyl sharýashylyq basqarmasynan 250 tonna janar-jaǵarmaı bólingen.
Shahardaǵy iri sharýa qojalyǵynyń biri – «AgroServısQanT SDO» AÓK. Qazirgi tańda sharýashylyq ıeligine150 ga egin alqaby tıesili. Seriktestikte 21 tehnıka bar. Sońǵy ret barlyq tehnıka 2016 jyly jańartylǵan.
– Búgingi kúni 100 gektar alqapqa qant qyzylshasyn seýip úlgerdik. Endi taǵy 30 gektarǵa tátti túbir sebiledi. Bıylǵy jyly gektaryna 90 tonna tátti túbir alý josparlanýda, – deıdi «AgroServısQanT SDO» AÓK basshysy Aıbek Botaı.
Aımaqta aýyl sharýashylyǵymen aınalysatyn taǵy bir qojalyq bolar. Ol «Baýyr» sharýa qojalyǵy. Ol da qambanyń kenge tolýyna at salysýda. Sharýashylyq jýa, arpa, júgeri, kartop ósirýmen aınalysady. Qazirgi tańda 50 gektarǵa arpa, 20 gektarǵa jýa, 10 getarǵa jońyshqa sepken.
– Ótken jyly gektaryna 70 tonna jýa ónimin aldyq. Egis jumystaryna Golandıalyq tuqymdar qoldanylady. Erte kúzde jınalǵan ónim ishki jáne syrtqy naryqty qamtyp otyr, – deıdi «Baýyr» sharýa qojalyǵynyń ıesi Baýyrjan Jandosov.
Qolaıly aýa-raıynyń arqasynda egin egý jumystarynyń qarqyny kún saıyn artyp keledi. Jetisýdyń Kóksý aýdanynda «Alım-Taıar» sharýa qojalyǵy 30 gektar jerge qant qyzylshasyn seýip úlgerse, endigi kezekte, taǵy 60 gektar jerge tátti túbirdi egýdi josparlap otyr. Aıta keteıik, 40 jumys orny bar sharýa qojalyǵy 1998 jyldan beri jumys jasaıdy. Ótken jyly 150 gektarǵa egin egilse, búginde egis alqabynyń kólemi 80 gektarǵa deıin azaıǵan.
«Alım-Taıar» sharýa qojalyǵy traktorlardan bastap kombaındarǵa deıin barlyq qajetti tehnıkalarmen jabdyqtalǵan. Qant qyzylshasynan basqa 30 gektarǵa kókónis, 50 gektarǵa soıa, 30 gektarǵa pıaz, 20 gektarǵa júgeri otyrǵyzý josparǵa alynǵan. Dıqanshylardyń aıtýynsha, bıylǵy jyly aýa-raıyna qaramastan jaqsy ónim alý kózdelgen.
