Jetisý oblysynda jańa Konstitýtsiiaǵa arnalǵan mýral salyndy. Onyń eskizin daiyndaýda jasandy intellekt múmkindikteri paidalanyldy. «Jetisu jastary» KMM-niń usynysymen salynǵan «Ata zańym - aibynym» mýraly jastardyń azamattyq mádenietin qalyptastyrýǵa jáne zamanaýi kóshe óneri arqyly qoǵamdaǵy mańyzdy qundylyqtardy dáripteýge baǵyttalǵan, dep habarlaidy Dalanews.kz.
Bul art-nysan Taldyqorǵan qalasyndaǵy kóp qóbatty úilerdiń biriniń qabyrǵasynda keskindelgen. Mýraldyń ashylý saltanaty ótip, oǵan óńir jastary, qoǵam belsendileri, shyǵarmashylyq orta ókilderi jáne qala turǵyndary qatysty.
- Bizdiń jańa mýralymyz Ata Zańymyzǵa arnalǵan. Keshe Memleket basshysy atap ótkenindei, jańa Konstitýtsiia eń aldymen jastarǵa baǵyttalǵan. Ata Zańymyzǵa volonterlik qyzmet, ǵylym, minnovatsiia, jasandy intellekt uǵymdary engizilgen. Osyǵan bailanysty biz mýraldy zamanaýi múmkindiktermen ushtastyrýǵa tyrystyq. Kórkem týyndyda birlik, ádildik, jaýapkershilik jáne bolashaqqa degen senim ideialary beinelenip, qoǵamdaǵy ózara qurmet pen yntymaqtastyqty dáripteitin mazmun kórinis tapty. Óitkeni Konstitýtsiia – barlyq osy igiliktiń bastaýy, - dedi «Jetisu jastary» KMM-niń direktory Shamil Vankeev.
Mýral avtory Ernur Baqbergenniń aitýynsha, bul jumys qoǵamdaǵy mańyzdy qundylyqtardy zamanaýi óner tili arqyly jetkizýge baǵyttalǵan.
- Mundai shyǵarmashylyqpen 6 jyldan beri kásibi túrde ainalysyp kelemin. Osy ýaqyt aralyǵynda «Zań men Tártip», «Taza Qazaqstan» siiaqty ideologiialyq jáne qoǵamdyq mańyzy bar taqyryptarda birqatar mýraldar saldym. Al osy jobamnyń ereksheligi – mýraldyń eskizi jasandy intellekt kómegimen ázirlendi. Bul tásil shyǵarmashylyq pen tehnologiiany ushtastyra otyryp, zamanaýi ónerdiń jańa baǵyttaryn kórsetýge, sonymen qatar qysqa merzim ishinde júzege asyrýǵa múmkindik beredi. Mysaly, bizdiń shyǵarmashylyq top mýraldy 3 kúnniń ishinde tolyq salyp bitti, - dedi jas sýretshi.
Eske salsaq, buǵan deiin óńir jastarynyń bastamasymen oblystyń aýdan ortalyqtarynda «Taza Qazaqstan», «Adal Azamat», «Zań men Tártip» qaǵidalaryna arnalǵan úsh mýral Kóksý, Qaratal, Sarqan aýdandarynyń ortalyqtarynda salynǵan bolatyn.
