Aldymen resmi qonaqtar Jambyl Jabaev pen Nurǵisa Tilendievtiń eskertkishterine gúl shoqtaryn qoiyp taǵzym etti. Munan soń aqyn mýzeiinde Almaty oblysy ákimidiginiń Qazaqstan Jazýshylar odaǵymen birlesip shyǵarǵan 30 tomdyq «Jambyl álemi» kitaptarynyń tusaýy kesildi.
Memlekettik hatshy Qyrymbek Kósherbaev elimizdegi «Rýhani jańǵyrý» baǵdarlamasy óziniń zańdy jalǵasyn «Ulttyq rýhani jańǵyrý» jobasynan taýyp jatqanyn, elimizdiń ádebi-mádeni ómirindegi eleýli bastamalar, jastardy qoldaý sharalary týraly aita kele Jambyl babanyń qazaq pen qyrǵyzǵa teń tulǵa ekenin tilge tiek etip, kórshi elden arnaiy kelgen resmi qonaqtardyń qadamyna qut tiledi. Sodan soń jastarǵa qarata:
– Shyǵarmashyl jastar Jambyl aqynnyń rýhyna táý etsin, ózderińizdi baba rýhy qoldap júrsin dep búgin osy sharany arnaiy jyr alybynyń mýzeiinde ótkizip otyrmyz. Sizder táýelsizdik jyldarynda Qazaqstannyń ár túkpirinde shyǵarmashylyqtaryńyzdy shyńdap, kóptegen tabystarǵa qol jetkizdińizder. Biz sizderge zor úmitpen qaraimyz. Jambyl babamyz týyn kótergen qazaq pen qyrǵyzǵa teń óner aitys – naǵyz táýelsizdiktiń, azat rýhtyń simvoly. Sondyqtan rýhani ishki táýelsizdigimiz úlken jetistikterge jol bastaidy. Prezidentimiz aitqan kreativti indýstriia baǵytyn damytýǵa, zamanaýi tehnologiialardy qoldana otyryp, jańa jobalardy iske asyrýǵa sizderdiń múmkindikterińiz mol. Oǵan memleket tarapynan barlyq qajetti qoldaýlar bar, – dedi Qyrymbek Kósherbaev.
Qyrǵyz Respýblikasynyń Memlekettik hatshysy S.Kasmambetov kórshi eldegi Jambyl Jabaevtyń nasihatyn, jas urpaqtyń tárbiesindegi, eki el arasyndaǵy rýhani bailanysty nyǵaitýdaǵy aqynnyń róline toqtaldy.
Sol siiaqty Qazaqstan Respýblikasy Premer-Ministriniń orynbasary Eraly Toǵjanov, Mádeniet jáne sport ministri Aqtoqty Raiymqulova jáne basqa da laýazymdy tulǵalar aqynnyń mereitoilyq sharasynyń ónerli jastarǵa berer taǵylymyn sózderine arqaý etti.
Óz kezeginde Almaty oblysynyń ákimi Qanat Bozymbaev óńirde Jambyl Jabaevtyń mereitoiyna baǵyttalyp ótkizilgen sharalarǵa qysqasha toqtalyp ótti.
– Mine, ózderińizben birge Jambyl Jabaev ádebi-memorialdy mýzeiinde elimizdiń keleshegin kemel etetin respýblikamyzǵa belgili jas aqyn-jazýshylarmen kezdesip, Qazaqstan Jazýshylar odaǵy basqarmasymen birlesip shyǵarǵan «Jambyl álemi» 30 tomdyǵynyń tusaýkeser rásimin saltanatty túrde atqaryp otyrmyz. Bul ǵasyrdan ǵasyrǵa mura bolyp qalatyn ádebi altyn qor dep sanaimyn. Ulylarymyzdy ulyqtaityn igi isterimiz kóp bolsyn! – dedi Q.Bozymbaev.
Kezdesýde belgili aitys aqyny Jandarbek Bulǵaqov, aqyn, «Egemen Qazaqstan» gazetiniń bólim meńgerýshi Miras Asan, tanymal ónerpaz, «Made in KZ» tobynyń jetekshisi Baýyrjan Itikeev, Soltústik Qazaqstan oblysy Ǵ.Músirepov aýdanyndaǵy aýyldyq kitaphananyń kitaphanashysy Nikolai Verbovskii jáne basqa da bir top talanatty jastar óz oilaryn ortaǵa saldy. Solardyń qatarynda respýblikalyq telearnalarda jas qalamgerlerdiń shyǵarmashylyǵyn nasihattaityn arnaiy habar bolsa, jas kitaphanashylardyń kitap oqý mádeniet qalyptastyrýǵa yqpal etetin jobalaryna memlekettik granttar berilse, mektepte 1-7 synyptarǵa qazaq kúileriniń tarihy oqytylsa, elimizde «Aziia daýysy» siiaqty halyqaralyq óner baiqaýyn ótkizýdi qolǵa alsa degen tárizdi kóptegen usynys-pikirler aityldy. Olardyń árqaisysyna Qyrymbek Eleýuly oi qosyp, halyqtyń rýhani jańǵyrýyna yqpal etetin bul usynystardyń barlyǵy da tiisti salalarmen birlesip talqylanyp, eskeriletinin jetkizdi.
Kezdesý sońynda el táýelsizdiginiń 30 jyldyǵyna orai kezdesýge kelgen ár ónerli jasqa Jambyl baba rýhy darysyn degen nietpen bir-bir dombyradan syiǵa tartyldy.
Jalpy, búgin tanystyrylǵan «Jambyl joly» 30 tomdyǵyn Almaty oblysynyń ákimdigi Jazýshylar odaǵymen birlesip shyǵardy. Oǵan oblystyq biýdjetten 114 mln. teńge bólindi. Onda aqynnyń ómir tarihy, shet tilden aýdarylǵan shyǵarmalary, mýzykalyq murasy, Jambyl Jabaev týraly zertteýler, estelikter, aqynnyń ustazdary Súiinbai, Qaban jyraý, Mailyqoja, zamandastary, shákirtteri týraly derekter men shyǵarmalary, J.Jabaev týraly kórkem shyǵarmalar, Jambyldyń talantty urpaqtary jaily jáne basqa da derekter engizilgen.
