الدىمەن رەسمي قوناقتار جامبىل جابايەۆ پەن نۇرعيسا تىلەندييەۆتىڭ ەسكەرتكىشتەرىنە گۇل شوقتارىن قويىپ تاعزىم ەتتى. مۇنان سوڭ اقىن مۋزەيىندە الماتى وبلىسى اكىمىدىگىنىڭ قازاقستان جازۋشىلار وداعىمەن بىرلەسىپ شىعارعان 30 تومدىق «جامبىل الەمى» كىتاپتارىنىڭ تۇساۋى كەسىلدى.
مەملەكەتتىك حاتشى قىرىمبەك كوشەربايەۆ ەلىمىزدەگى «رۋحاني جاڭعىرۋ» باعدارلاماسى ءوزىنىڭ زاڭدى جالعاسىن «ۇلتتىق رۋحاني جاڭعىرۋ» جوباسىنان تاۋىپ جاتقانىن، ەلىمىزدىڭ ادەبي-مادەني ومىرىندەگى ەلەۋلى باستامالار، جاستاردى قولداۋ شارالارى تۋرالى ايتا كەلە جامبىل بابانىڭ قازاق پەن قىرعىزعا تەڭ تۇلعا ەكەنىن تىلگە تيەك ەتىپ، كورشى ەلدەن ارنايى كەلگەن رەسمي قوناقتاردىڭ قادامىنا قۇت تىلەدى. سودان سوڭ جاستارعا قاراتا:
– شىعارماشىل جاستار جامبىل اقىننىڭ رۋحىنا ءتاۋ ەتسىن، وزدەرىڭىزدى بابا رۋحى قولداپ ءجۇرسىن دەپ بۇگىن وسى شارانى ارنايى جىر الىبىنىڭ مۋزەيىندە وتكىزىپ وتىرمىز. سىزدەر تاۋەلسىزدىك جىلدارىندا قازاقستاننىڭ ءار تۇكپىرىندە شىعارماشىلىقتارىڭىزدى شىڭداپ، كوپتەگەن تابىستارعا قول جەتكىزدىڭىزدەر. ءبىز سىزدەرگە زور ۇمىتپەن قارايمىز. جامبىل بابامىز تۋىن كوتەرگەن قازاق پەن قىرعىزعا تەڭ ونەر ايتىس – ناعىز تاۋەلسىزدىكتىڭ، ازات رۋحتىڭ سيمۆولى. سوندىقتان رۋحاني ىشكى تاۋەلسىزدىگىمىز ۇلكەن جەتىستىكتەرگە جول باستايدى. پرەزيدەنتىمىز ايتقان كرەاتيۆتى يندۋستريا باعىتىن دامىتۋعا، زاماناۋي تەحنولوگيالاردى قولدانا وتىرىپ، جاڭا جوبالاردى ىسكە اسىرۋعا سىزدەردىڭ مۇمكىندىكتەرىڭىز مول. وعان مەملەكەت تاراپىنان بارلىق قاجەتتى قولداۋلار بار، – دەدى قىرىمبەك كوشەربايەۆ.
قىرعىز رەسپۋبليكاسىنىڭ مەملەكەتتىك حاتشىسى س.كاسمامبەتوۆ كورشى ەلدەگى جامبىل جابايەۆتىڭ ناسيحاتىن، جاس ۇرپاقتىڭ تاربيەسىندەگى، ەكى ەل اراسىنداعى رۋحاني بايلانىستى نىعايتۋداعى اقىننىڭ رولىنە توقتالدى.
سول سياقتى قازاقستان رەسپۋبليكاسى پرەمەر-مينيسترىنىڭ ورىنباسارى ەرالى توعجانوۆ، مادەنيەت جانە سپورت ءمينيسترى اقتوقتى رايىمقۇلوۆا جانە باسقا دا لاۋازىمدى تۇلعالار اقىننىڭ مەرەيتويلىق شاراسىنىڭ ونەرلى جاستارعا بەرەر تاعىلىمىن سوزدەرىنە ارقاۋ ەتتى.
ءوز كەزەگىندە الماتى وبلىسىنىڭ اكىمى قانات بوزىمبايەۆ وڭىردە جامبىل جابايەۆتىڭ مەرەيتويىنا باعىتتالىپ وتكىزىلگەن شارالارعا قىسقاشا توقتالىپ ءوتتى.
– مىنە، وزدەرىڭىزبەن بىرگە جامبىل جابايەۆ ادەبي-مەموريالدى مۋزەيىندە ەلىمىزدىڭ كەلەشەگىن كەمەل ەتەتىن رەسپۋبليكامىزعا بەلگىلى جاس اقىن-جازۋشىلارمەن كەزدەسىپ، قازاقستان جازۋشىلار وداعى باسقارماسىمەن بىرلەسىپ شىعارعان «جامبىل الەمى» 30 تومدىعىنىڭ تۇساۋكەسەر ءراسىمىن سالتاناتتى تۇردە اتقارىپ وتىرمىز. بۇل عاسىردان عاسىرعا مۇرا بولىپ قالاتىن ادەبي التىن قور دەپ سانايمىن. ۇلىلارىمىزدى ۇلىقتايتىن يگى ىستەرىمىز كوپ بولسىن! – دەدى ق.بوزىمبايەۆ.
كەزدەسۋدە بەلگىلى ايتىس اقىنى جانداربەك بۇلعاقوۆ، اقىن، «ەگەمەن قازاقستان» گازەتىنىڭ ءبولىم مەڭگەرۋشى ميراس اسان، تانىمال ونەرپاز، «Made in KZ» توبىنىڭ جەتەكشىسى باۋىرجان يتيكەيەۆ، سولتۇستىك قازاقستان وبلىسى ع.مۇسىرەپوۆ اۋدانىنداعى اۋىلدىق كىتاپحانانىڭ كىتاپحاناشىسى نيكولاي ۆەربوۆسكيي جانە باسقا دا ءبىر توپ تالاناتتى جاستار ءوز ويلارىن ورتاعا سالدى. سولاردىڭ قاتارىندا رەسپۋبليكالىق تەلەارنالاردا جاس قالامگەرلەردىڭ شىعارماشىلىعىن ناسيحاتتايتىن ارنايى حابار بولسا، جاس كىتاپحاناشىلاردىڭ كىتاپ وقۋ مادەنيەت قالىپتاستىرۋعا ىقپال ەتەتىن جوبالارىنا مەملەكەتتىك گرانتتار بەرىلسە، مەكتەپتە 1-7 سىنىپتارعا قازاق كۇيلەرىنىڭ تاريحى وقىتىلسا، ەلىمىزدە «ازيا داۋىسى» سياقتى حالىقارالىق ونەر بايقاۋىن وتكىزۋدى قولعا السا دەگەن ءتارىزدى كوپتەگەن ۇسىنىس-پىكىرلەر ايتىلدى. ولاردىڭ ءارقايسىسىنا قىرىمبەك ەلەۋ ۇلى وي قوسىپ، حالىقتىڭ رۋحاني جاڭعىرۋىنا ىقپال ەتەتىن بۇل ۇسىنىستاردىڭ بارلىعى دا ءتيىستى سالالارمەن بىرلەسىپ تالقىلانىپ، ەسكەرىلەتىنىن جەتكىزدى.
كەزدەسۋ سوڭىندا ەل تاۋەلسىزدىگىنىڭ 30 جىلدىعىنا وراي كەزدەسۋگە كەلگەن ءار ونەرلى جاسقا جامبىل بابا رۋحى دارىسىن دەگەن نيەتپەن ءبىر-بىر دومبىرادان سىيعا تارتىلدى.
جالپى، بۇگىن تانىستىرىلعان «جامبىل جولى» 30 تومدىعىن الماتى وبلىسىنىڭ اكىمدىگى جازۋشىلار وداعىمەن بىرلەسىپ شىعاردى. وعان وبلىستىق بيۋدجەتتەن 114 ملن. تەڭگە ءبولىندى. وندا اقىننىڭ ءومىر تاريحى، شەت تىلدەن اۋدارىلعان شىعارمالارى، مۋزىكالىق مۇراسى، جامبىل جابايەۆ تۋرالى زەرتتەۋلەر، ەستەلىكتەر، اقىننىڭ ۇستازدارى ءسۇيىنباي، قابان جىراۋ، مايلىقوجا، زامانداستارى، شاكىرتتەرى تۋرالى دەرەكتەر مەن شىعارمالارى، ج.جابايەۆ تۋرالى كوركەم شىعارمالار، جامبىلدىڭ تالانتتى ۇرپاقتارى جايلى جانە باسقا دا دەرەكتەر ەنگىزىلگەن.
