Jetisýda buǵan deiin qolǵa alynbaǵan farmatsevtika salasy dami bastady
Baǵdarlamanyń arqasynda óńirde ekonomikadaǵy óńdeý sektorynyń úlesi 20%-ǵa deiin ósip, buryn sońdy óńirde bolmaǵan jańa – farmatsevtika salasy jandandy.
Alda shikizattyq emes sektordyń eksportymen ainalysý mindeti tur. Bul týraly keshe óńirdiń aktiv jiynynda oblys ákimi Amandyq Batalov aitty.
Amandyq Batalov Úkimettiń keńeitilgen otyrysynda Prezidenttiń «Qarapaiym zattar ekonomikasynyń» áleýetin tolyqqandy paidalaný týraly aitqanyn eske saldy. Basym jobalarǵa qoljetimdi nesie berý baǵdarlamasymen oblysta búgingi kúni nebary bes ǵana joba bankterdiń maquldaýyn alsa, taǵy úsheýi qarastyrylý ústinde.
Oblys ákimi bul kórsetkishtiń Jetisý óńiri úshin tym az ekenin synǵa alyp, orynbasary B.Manzorovqa, kásipkerlik basqarmasy men aýdan, qala ákimderine «qarapaiym zattar ekonomikasy» boiynsha jumysqa belsene kirisý kerektigin qatań eskertti.
Prezident júktegen mindetterdiń biri – jańa jumys oryndaryn ashý. Ótken jyly oblysta 26 myń jumys ornyn qurý josparlansa, is júzinde 31 myńnan astamy ashyldy.
– «Eńbek» baǵdarlamasynyń tiimdiligin kóterýimiz kerek, sapaly, turaqty jumys oryndaryn qurýǵa jumys isteýge tiispiz. Turǵyndardyń kirisi artsa, tabysy ósse, halyqtyń ál-aýqatyn odan ári jaqsartýǵa zor septigi tiedi. Sondyqtan oblystyq basqarmalar basshylaryna, aýdan, qala ákimderine turaqty jumys oryndarynyń qurylýyna baǵyttalǵan nátijeli sharalardy qolǵa alýdy tapsyramyn, – dedi A. Batalov.
Almaty oblysy ákiminiń baspasóz qyzmeti
