Jetisý oblysynda qazaq ádebietiniń kórnekti ókili, jazýshy, memleket qairatkeri Ánýar Álimjanovtyń 95 jyldyǵy atalyp ótildi. Qalamgerdiń mereitoiynda respýblikalyq ǵylymi-tanymdyq konferentsiia ótkizilip, Memleket basshysynyń arnaiy quttyqtaý haty oqyldy, dep habarlaidy Dalanews.kz
Alakól aýdany Qabanbai aýylyna mereitoilyq sharaǵa kelgen Jetisý oblysynyń ákimi Beibit Isabaev, QR Májilis depýtaty Erlan Sairov, QR Memlekettik syilyqtyń iegeri, TÚRKSOI Jazýshylar odaǵynyń tóraǵasy, aqyn Ulyqbek Esdáýlet, ǵalymdar, qalamgerler, jalpy aýdan jurtshylyǵy aldymen Á.Álimjanovtyń biýstine gúl shoqtaryn qoidy.
Budan ári shara Qabanbai aýyldyq mádeniet úiinde «Álemge áigili Ánýar» atty respýblikalyq ǵylymi-tanymdyq konferentsiiamen jalǵasty. Mádeniet úiiniń foiesinde mýzei eksponattarynan jáne kitaptardan kórme uiymdastyrylyp, Á. Álimjanovqa arnalǵan beinefilm kórsetildi.
Konferentsiiany ashqan oblys ákimi Beibit Isabaev Jetisý jerine qadam basqan kópshilikke «Qosh keldińizdei» dei otyryp, aldymen Memleket basshysy Qasym-Jomart Kemeluly Toqaevtyń quttyqtaý hatyn oqyp berdi. «Ánýar Álimjanov – ult rýhaniiatynda airyqsha orny bar jazýshy. Ol shoqtyǵy biik shyǵarmalar jazyp, sońyna mol ádebi mura qaldyrdy. Adamgershilik qundylyqtar, halyqtar dostyǵy jáne basqa da ózekti taqyryptarǵa qalam terbep, oqyrman qaýymnyń shynaiy yqylasyna bólendi. Ál-Farabi, Mahambet siiaqty tarihi tulǵalardyń esimin urpaq jadynda jańǵyrtýǵa zor eńbek sińirdi. Jazýshylar odaǵynyń abyroi-bedelin kóterip, qazaq qalamgerleriniń halyqaralyq bailanystaryn nyǵaitýǵa ólsheýsiz úles qosty. Sondai-aq Ánýar Álimjanov árdaiym el múddesine adal bolǵan ult qairatkeri», - delingen quttyqtaý hat kópshilikke bildirilgen tilekpen aiaqtaldy. Mereitoiǵa arnaiy joldanǵan Prezidenttiń osy quttyqtaý haty men QR Parlament Májilisi tóraǵasynyń quttyqtaýy aýyldaǵy Qabanbai atyndaǵy tarihi-ólketaný mýzeiiniń qoryna tapsyryldy.
Konferentsiia barysynda Ánýar Álimjanovtyń eldik múdde jolyndaǵy qarymdy qairatkerligi, jazýshylyq qyry, tulǵalardy tanytýdaǵy eren eńbegi keńinen baiandaldy.
- Jazýshylardyń bári de eńbektenedi, biraq kóptiń ishinen oza shaýyp, halyqtyń kóńilinde, tarihtyń jadynda qalatyn qairatkerler kóp emes. Ánýar Turlybekuly sondai aitýly azamattardyń qatarynda. Ol - Ábý-Nasyr ál-Farabidi ortamyzda alyp kelgen tulǵalardyń biri. Ol kezde ǵylymi, ádebi orta Aqjan Mashani arqyly ál-Farabidi tanyǵanymen, jalpy qoǵam tolyq bile qoimaǵan edi. Ánýar Álimjanov onyń tegi qypshaq ekenin, Otyrar qalasynan shyqqanyn dáleldep, ómir jolyn baiandaityn «Otyrardan jetken syi», «Ustazdyń oralýy» siiaqty shyǵarmalaryn jazdy. Almatydaǵy dańǵylǵa ál-Farabi esiminiń berilýine bastama kóterip, oǵan kóp eńbek sińirgenin búgingi urpaqtyń bilip júrgeni jón, - degen Halyqaralyq «Alash» syilyǵynyń iegeri, jazýshy, bas baiandamashy Nurdáýlet Aqysh Álimjanovtyń ózge de qyrlaryna keńinen toqtaldy.
Sol siiaqty filologiia ǵylymdarynyń doktory, professor, ánýartanýshy Káken Hamzin jazýshy shyǵarmashylyǵynyń zerttelýi jaily baiandady.
- Biz Ánýar Álimjanovty jekeshelendire almaimyz, ol búkil qazaqqa ortaq perzent, tipti halyqaralyq keńistikke aty ketken asa kórnekti qairatker. Biz optimistpiz. Keleshekte budan da salmaqty halyqaralyq deńgeidegi is-shara óterine men kámil senemin, - dedi ǵalym.
Óz kezeginde aqyn Ulyqbek Esdáýlet jazýshynyń halyqaralyq ádebi bailanystardy nyǵaitýdaǵy róline toqtaldy:
- Sol tusta Oljas Súleimenov pen Ánýar Álimjanov aldaspandai jarqyldady. Oljekeń Mahambet týraly óleń, Ánýar aǵa proza jazdy. Sol arqyly álem Mahambettiń kim ekenin bildi. Munan soń Andrei Voznesenskii Mahambetke óleń arnady. Zańǵar jazýshy Muhtar Áýezovtiń: «Birinshi Petr Eýropaǵa tereze tesken bolsa, Ánýar Álimjanov Aziiaǵa aiqara jol ashty», - deitin sózi bar. Rasynda Álimjanov KSRO-nyń Aziia, Afrika jazýshylarymen bailanys jónindegi komiteti tóraǵasynyń orynbasary, dál osyndai Eýropa jazýshylarymen bailanys jónindegi komissiianyń belsendi múshesi boldy. Bul álem ádebietimen tikelei bailanys jasap otyrǵan qazaqtyń ókili degen sóz. Ol kisiniń kezinde Aziia, Afrika elderi jazýshylarynyń konferentsiiasyn Qazaqstanda ótkizýi de úlken eńbektiń jemisi, - dedi U. Esdáýlet óz sózinde.
Osy kúni jazýshynyń rýhyna arnap as berildi.
Eske salsaq, Ánýar Álimjanov 1930 jyly Jetisý oblysy Qarlyǵash aýylynda týǵan. Qazaq jazýshysy, qoǵam qairatkeri, pýblitsist. «Literatýrnaia gazetanyń» menshikti tilshisi, «Leninskaia smena» gazeti redaktorynyń orynbasary, Qazaqstan jáne Qyrǵyzstan respýblikalary boiynsha «Pravda» gazetiniń tilshisi, «Qazaqfilm» stýdiiasynyń, «Qazaq ádebieti» gazetiniń Bas redaktory, Qazaqstan Jazýshylar odaǵy basqarmasynyń birinshi hatshysy, respýblikalyq tarihi eskertkishter men mádenietti qorǵaý jónindegi Qazaq qoǵamy Ortalyq keńesi prezidiýmynyń tóraǵasy, KSRO Joǵarǵy Keńesi Ulttar Keńesiniń tóraǵasy qyzmetterin atqardy. Qazaq KSR Memlekettik syilyǵynyń, Halyqaralyq Dj. Nerý atyndaǵy syilyqtyń laýreaty. «Qurmet Belgisi», Halyqtar Dostyǵy ordenderimen marapattalǵan. Qazaqstannyń Halyq jazýshysy.
