Jetisý oblysynda búgingi tańda órttiń aldyn alý is-sharalary men úi aralaý jumystarymen áleýemettik osal toptaǵy 7616 otbasy qamtyldy. Osy sanattaǵy otbasy úilerine gazdyń qaýipti shoǵyrlanýyn anyqtaityn 2045 datchik ornatý josparlanǵan. Búgingi kúnge sonyń 820-sy ornatyldy, dep habarlaidy Dalanews.kz.
Jetisý oblysynyń Tótenshe jaǵdailar departamentiniń málimetine qaraǵanda, datchikter Kerbulaq, Eskeldi, Sarqan, Panfilov, Aqsý aýdandarynda qoiylǵan. Jalpy Departament tarapynan jeke turǵyn úi sektorlarynda órt qaýipsizdigi ailyǵy ótkizilýde. Onyń aiasynda memlekettik organdar men eriktiler uiymdarynyń qatysýymen reidtik tekserýler, turǵyndarmen kezdesý, bilim berý mekemelerinde interaktivti sabaqtar ótkizilýde.
Máselen, búgin tótenshe jaǵdai salasynyń qyzmetkerleri Taldyqorǵan qalasyndaǵy «Qyzyltas» saiajaiynda turatyn áleýmettik osal toptaǵy otbasy úilerin aralap, pesh murjalaryn tazalady, datchikter ornatty, órt qaýipsizdigi erejelerin túsindirdi. Sonymen qatar reid jumystaryna «TATEK» AQ mamandary da tartylyp, olar úilerdegi elektr jelileriniń jumysyn tekserdi.
- Jetisý oblysynda jeke turǵyn úi sektorlarynda jylytý maýsymynda órttiń aldyn alý sharalary keńinen atqarylýda. Halyq arasynda túsindirý júrgizilip, ásirese jylytý qurylǵylarynyń jumysy, pesh jaǵý erejelerin túsindirýge kóp kóńil bólinedi. Biyl áleýmettik osal toptar sanatyndaǵy otbasy úilerine ornatý úshin gazdyń qaýipti shoǵyrlanýyn anyqtaityn 2045 datchik satyp alý josparlanǵan, sonyń 1720-sy satyp alyndy, qalǵany qazan aiynyń sońyna deiin satyp alynady, qurylǵyny ornatý jumystary jalǵasyp jatyr, - dedi Jetisý oblystyq TJD Memlekettik órt baqylaý basqarmasynyń aǵa injeneri, azamattyq qorǵanys kapitany Elaman Áýbákirov.
Atalǵan sharalarǵa qatysty jergilikti turǵyndar da pikir bildirdi.
- Úiimizge tegin datchik qoiyp, peshtiń murjasyn tazalap berdi. Tótenshe jaǵdai qyzmetkerleri jyl saiyn osylai kómektesedi. Jasym egde adam bolǵandyqtan, jylytý maýsymynda maǵan osyndai jumystardy atqarýǵa kómek qajet, sondyqtan mundai jumystardyń atqarylyp jatqanyna rizamyz, - deidi jergilikti turǵyn Kákimash Orazbaeva.
Atap ótsek, júrgizilgen profilaktikalyq jumystardyń nátijesinde biylǵy jylytý maýsymy bastalǵaly beri óńirdegi órt oqiǵalarynyń sany ótken jyldyń osy merzimimen salystyrǵanda 2,2 esege azaiǵan.
