Jetisý oblysynyń ákimi Memlekettik syilyq iegeri Januzaq Músápirdi marapattady

Jetisý oblysynyń ákimi Beibit Isabaev ákimdik ǵimaratynda QR Sýretshiler odaǵynyń múshesi, QR Kórkemsýret Akademiiasynyń akademigi, belgili qylqalam sheberi Januzaq Músápirdi Abai atyndaǵy ádebiet jáne óner salasyndaǵy Memlekettik syilyqtyń iegeri atanýymen quttyqtap, Qurmet gramotasyn tapsyrdy,- dep habarlaidy Dalanews.kz

Kezdesý barysynda oblys basshysy óner iesiniń Memlekettik syilyqty ielenýi uzaq jylǵy shyǵarmashylyq eńbeginiń jemisi ekenin atap ótti.

- Elimizdegi kórkemsýret ónerin damytýǵa, sol siiaqty shetelderde halqymyzdy sýretshilik qyrynan keńinen tanytýǵa úles qosqanyńyzdy jaqsy bilemiz. Memlekettik syilyqty alý – úlken mártebe. Aldaǵy ýaqytta da shyǵarmashylyǵyńyz órlep, ónersúier qaýymdy kórkem týyndylaryńyzben qýanta berińiz. Áýletińizge, urpaqtaryńyzǵa baq-bereke tileimin, - degen  B.Isabaev sýretshige Qurmet gramotasyn tapsyryp, syi kórsetti.

Óz kezeginde sýretshi Januzaq Músápir týǵan jeri Jetisýǵa degen yqylasy bólek ekenin, óńirdiń árbir jetistigine qýanyp, únemi tilektes bolatynyn jetkizdi.

- Oblys qurylǵannan bergi úsh jylda óńirde oryn alǵan oń ózgeristerge kýá bolyp júrmiz. Jaqsylyqtaryńyzdyń bárine niettespin. «Balalyqtan danalyqqa jol» atty kartinamdy alǵash ret osy Jetisý ólkesinde ótken kórmege qoiyp, eldiń batasymen Memlekettik syilyqqa usynǵan edim. Rasynda úlken mártebege ie boldy. Maǵan kórsetken qurmetterińizge alǵysymdy aita otyryp, búgingi Memlekettik rámizder kúninmen barshańyzdy quttyqtaimyn, - dep J. Músápir óziniń izgi tilegin bildirdi.

Eske salsaq, Januzaq Músápir QR Sýretshiler odaǵynyń múshesi, QR Kórkemsýret Akademiiasynyń akademigi, QR Jýrnalister odaǵynyń múshesi. «Balalyqtan danalyqqa jol» atty poliptihy úshin oǵan 2024 jyly Abai atyndaǵy ádebiet jáne óner salasyndaǵy Memlekettik syilyq berildi. Bul aýqymdy týyndy Aristotelden ke­iingi «Álemniń ekinshi ustazy» atanǵan Ábý Nasyr ál-Farabidiń ómirine arnalǵan bes úlken kartinadan turady. Toptamany sýretshi jeti jyl salǵan. Kenepke maily boiaýmen ár túrli tehnikalardy qoldaný arqyly jazylǵan. Onyń ár qaisysynyń biiktigi 1.8 metr, uzyndyǵy 11,5 metr.