جەتىسۋ وبلىسىنىڭ اكىمى بەيبىت يسابايەۆ اكىمدىك عيماراتىندا ق ر سۋرەتشىلەر وداعىنىڭ مۇشەسى، ق ر كوركەمسۋرەت اكادەمياسىنىڭ اكادەميگى، بەلگىلى قىلقالام شەبەرى جانۇزاق ءمۇساپىردى اباي اتىنداعى ادەبيەت جانە ونەر سالاسىنداعى مەملەكەتتىك سىيلىقتىڭ يەگەرى اتانۋىمەن قۇتتىقتاپ، قۇرمەت گراموتاسىن تاپسىردى،- دەپ حابارلايدى Dalanews.kz
كەزدەسۋ بارىسىندا وبلىس باسشىسى ونەر يەسىنىڭ مەملەكەتتىك سىيلىقتى يەلەنۋى ۇزاق جىلعى شىعارماشىلىق ەڭبەگىنىڭ جەمىسى ەكەنىن اتاپ ءوتتى.
- ەلىمىزدەگى كوركەمسۋرەت ونەرىن دامىتۋعا، سول سياقتى شەتەلدەردە حالقىمىزدى سۋرەتشىلىك قىرىنان كەڭىنەن تانىتۋعا ۇلەس قوسقانىڭىزدى جاقسى بىلەمىز. مەملەكەتتىك سىيلىقتى الۋ – ۇلكەن مارتەبە. الداعى ۋاقىتتا دا شىعارماشىلىعىڭىز ورلەپ، ونەرسۇيەر قاۋىمدى كوركەم تۋىندىلارىڭىزبەن قۋانتا بەرىڭىز. اۋلەتىڭىزگە، ۇرپاقتارىڭىزعا باق-بەرەكە تىلەيمىن، - دەگەن ب.يسابايەۆ سۋرەتشىگە قۇرمەت گراموتاسىن تاپسىرىپ، سىي كورسەتتى.
ءوز كەزەگىندە سۋرەتشى جانۇزاق ءمۇساپىر تۋعان جەرى جەتىسۋعا دەگەن ىقىلاسى بولەك ەكەنىن، ءوڭىردىڭ ءاربىر جەتىستىگىنە قۋانىپ، ۇنەمى تىلەكتەس بولاتىنىن جەتكىزدى.
- وبلىس قۇرىلعاننان بەرگى ءۇش جىلدا وڭىردە ورىن العان وڭ وزگەرىستەرگە كۋا بولىپ ءجۇرمىز. جاقسىلىقتارىڭىزدىڭ بارىنە نيەتتەسپىن. «بالالىقتان دانالىققا جول» اتتى كارتينامدى العاش رەت وسى جەتىسۋ ولكەسىندە وتكەن كورمەگە قويىپ، ەلدىڭ باتاسىمەن مەملەكەتتىك سىيلىققا ۇسىنعان ەدىم. راسىندا ۇلكەن مارتەبەگە يە بولدى. ماعان كورسەتكەن قۇرمەتتەرىڭىزگە العىسىمدى ايتا وتىرىپ، بۇگىنگى مەملەكەتتىك رامىزدەر كۇنىنمەن بارشاڭىزدى قۇتتىقتايمىن، - دەپ ج. ءمۇساپىر ءوزىنىڭ ىزگى تىلەگىن ءبىلدىردى.
ەسكە سالساق، جانۇزاق ءمۇساپىر ق ر سۋرەتشىلەر وداعىنىڭ مۇشەسى، ق ر كوركەمسۋرەت اكادەمياسىنىڭ اكادەميگى، ق ر جۋرناليستەر وداعىنىڭ مۇشەسى. «بالالىقتان دانالىققا جول» اتتى پوليپتيحى ءۇشىن وعان 2024 جىلى اباي اتىنداعى ادەبيەت جانە ونەر سالاسىنداعى مەملەكەتتىك سىيلىق بەرىلدى. بۇل اۋقىمدى تۋىندى اريستوتەلدەن كەيىنگى «الەمنىڭ ەكىنشى ۇستازى» اتانعان ءابۋ ناسىر ءال-فارابيدىڭ ومىرىنە ارنالعان بەس ۇلكەن كارتينادان تۇرادى. توپتامانى سۋرەتشى جەتى جىل سالعان. كەنەپكە مايلى بوياۋمەن ءار ءتۇرلى تەحنيكالاردى قولدانۋ ارقىلى جازىلعان. ونىڭ ءار قايسىسىنىڭ بيىكتىگى 1.8 مەتر، ۇزىندىعى 11،5 مەتر.
