Qazaqstandaǵy saiasi keńistikte kezekti iri sensatsiianyń qulaǵy kórinýi múmkin. "ÁDILET pen AMANAT-tyń saiasi nekesinen keiin, endi taǵy eki partiia bir-birimen qosylý múmkindigin jabyq formatta talqylap kórdi", - deidi DALA INSIDE derekkózi.
Ázirge resmi sheshim joq. Biraq derekkózdiń aitýynsha, partiia ókilderi arasynda “birigý me, álde sailaý aldyndaǵy bloktyq úilesim be?” degen másele boiynsha aldyn ala pikir almasý ótken. Bul jai ǵana tehnikalyq áńgimege uqsamaidy. Sebebi aldaǵy parlamenttik naýqan aldynda saiasi alań qatty tarylyp barady. Ár partiia endi jeke brend retinde ǵana emes, jańa saiasi arhitektýradaǵy óz ornyn saqtap qalý quraly retinde qaralyp otyr. Buryn partiialar ideologiia úshin talasqandai kórinetin. Qazir negizgi kúres tizimdegi oryn, aimaqtyq kvota, media-salmaq jáne bolashaq mandat úshin júrip jatyr.
"Bul eki partiianyń elektoraldy bazasy bir-birine ideologiialyq jaǵynan qarsy emes. Kerisinshe, ekeýiniń de aýditoriiasy júie ishindegi balamaly daýys retinde qabyldanady. Biriniń basshylyǵynda jaqynda aýys-túiister ótip, toksikalyq elementten tazalandy. Sondyqtan olardyń birigýi bilik úshin de, partiialardyń ózderi úshin de yńǵaily stsenarii bolýy múmkin", - deidi, derekkóz.
Bir jaǵynan, bul saiasi alańdy yqshamdaidy. Ekinshi jaǵynan, parlamentke ótetin partiialar sanyn azaitpai, kerisinshe jańarǵan, kúsheigen, biriktirilgen saiasi sýbektiler obrazyn qalyptastyryp beredi. Biraq ýaqyt tseitnoty uzaq oilanýǵa múmkindik bermei otyr. Eger naqty sheshimder qabyldanyp jatsa, taraptar ony kelesi aptadan keshiktirmei málimdeýi qajet. Sebebi, barlyq elektoraldy pozitsiialar qazirgi Parlament taramai turyp ashyq jariialanýy tiis degen jazylmaǵan ereje bar.
