Búgin Jetisý oblysynyń ákimi Beibit Isabaev 8 Naýryz – Halyqaralyq áielder kúnine orai Taldyqorǵandaǵy Biken Rimova atyndaǵy drama teatrynda ekonomikanyń ár salasynda eńbek etip, qoǵam ómirine belsene atsalysyp júrgen jetisýlyq 500 áieldi quttyqtady,- dep habarlaidy Dalanews.kz
Olardyń arasynda tiginshi, temirjolshy, kran júrgizýshi, saýynshy, qolónershi, elektr mehanigi t.b. jumysshy mamandar, sol siiaqty muǵalimder men dárigerler, kásipkerler, áleýmettik qyzmetkerler, kópbalaly analar, ardagerler de bar. Saltanatty sharaǵa qatysýshylardyń birqataryna memlekettik nagradalar men Prezidenttiń quttyqtaý haty tapsyryldy.
Óz quttyqtaý sózinde oblys basshysy Beibit Isabaev búgingi áielderdiń bizneste, saiasatta, ekonomikanyń qai salasynda da er azamattarmen birdei eńbek etip júrgenin tilge tiek etip, memleket tarapynan áiel-analarǵa turaqty qoldaý kórsetiletinin atap ótti. Ásirese ana men balany qorǵaýǵa, jumyspen qamtýǵa, áielderdiń biznes-bastamalaryn qoldaýǵa, jalpy áleýmettik turǵyda qorǵaýǵa basa nazar aýdarylatynyn aitty.
"Shańyraqtyń tutqasy áke bolsa, otbasyndaǵy baqyttyń kilti ananyń qolynda. Ananyń aialy alaqanyn, jyly lebizin, aqyly men úlgisin kózimen kórip, júregimen sezinip ósken bala eńbeksúigish, ónerli de ónegeli bolatyny sózsiz. Anaǵa taǵzym etý, syi-qurmet kórsetý – barshamyzdyń qasterli paryzymyz", - degen óńir basshysy názik jandarǵa izgi tilegin bildirip, marapattaý rásimin atqardy.
Atap aitqanda, B. Rimova atyndaǵy Taldyqorǵan drama teatrynyń ártisi Aian Qojbanova «Qurmet» ordenine, «Tekeli GMZ» JShS bas tehnology Valentina Kýbrak III dárejeli «Eńbek dańqy» ordenine, Kerbulaq aýdany «Shoqanova» JK basshysy Symbat Nurbopaeva «Eren eńbegi úshin» medaline, Kóksý aýdandyq ortalyq aýrýhanasynyń otorinolaringolog kabinetiniń meiirbikesi Nurgúl Saǵatova «Shapaǵat» medaline ie boldy. Eske salsaq, buǵan deiin Eskeldi aýdany Aldabergenov aýylyndaǵy «Abiev A.A.» ShQ basshysy basshysy Raisa Abieva Prezidenttiń qolynan «Qurmet» ordenin alǵan bolatyn.
Sol siiaqty saltanatty jiynda kóp balaly on anaǵa «Altyn alqa», «Kúmis alqa», úsh turǵynǵa Prezidenttiń quttyqtaý haty tapsyryldy.
Merekelik sharaǵa qatysýshy «Asma industrial» JShS ónerkásiptik akkýmýliatorlar óndirý zaýytynyń synaq zerthanasynyń meńgerýshisi Larisa Krasnorýtskii merekege orai óz tilegin bildirdi:
"8 naýryz – kórikti kóktem merekesi. Osy merekeniń qurmetine saltanatty qabyldaýǵa shaqyrylǵanyma óte qýanyshtymyn. Bul meniń eńbegimniń, óńirdiń óndirisin damytýǵa qosqan úlesimniń baǵalanǵany dep bilemin. Akkýmýliator óndirisi salasynda 30 jyldan astam jumys istep kelemin. Al qazir jańa zaýytta synaq zerthanasynda quramdas batareialarǵa taldaý júrgizemin. Jumys tájiribem kóp bolsa da, bilimimdi únemi jańartyp otyrýǵa tyrysamyn. Osy jyldy Prezident jumysshy mamandyqtar jyly dep jariialady, sondyqtan osy múmkindikti paidalana otyryp, jastarymyzdy oqýǵa, jumys isteýge jáne únemi alǵa umtylýǵa shaqyramyn", - dedi ol.
Taǵy bir qatysýshy Saniia Chýkotaeva óziniń jumysy jaily aityp ketti.
"Men Alakól aýdanyndaǵy «Arqarly – Maibúirek» JShS-nyń zootehnigimin. 2013 jyldan beri biz Avstraliiadan ákelingen asyl tuqymdy «Angýs» siyryn ósirip otyrmyz. Qazir sharýashylyqta mal basy shamamen 15-16 myńǵa jetti, sonyń jeti jarym myńy analyq bas. Mal sharýashylyǵynda jumys isteý ońai emes. Oǵan eń bastysy tózimdilik kerek. Aýyldyq jerdi damytýǵa úles qosýǵa, salaǵa jastardy tartýǵa tyrysamyz, olardy eńbeksúigishtikke, týǵan jerine qyzmet etýge úiretemiz. Merekemen barsha qyz-kelinshekterdi, aq jaýlyqty analardy quttyqtaimyn", - dedi ol.
Saltanatty jiynǵa arnaiy kelgenderdiń biri - temirjolshy Qatima Qyryqbaeva.
"Úshtóbe temir jol stantsiiasynda eńbek etip júrgenime 24 jyl boldy. Temirjol salasyna kelgen jastarǵa bilgenimizdi úiretip, tájiribemizdi bólisemiz. Oblys deńgeiindegi saltanatty sharaǵa alǵash ret qatysyp otyrmyn. Áiel-analardyń barlyǵyna myqty densaýlyq, eńbekte tabys, otbasynda baqyt tileimin", - dep tilegin bildirdi Qyryqbaeva.
Osyndai quttyqtaýlarǵa «DeFacto» inkliýzivti aqparattyq portalynyń jýrnalisi Elmira Smaǵulova da qosyldy.
"Búgin bizdiń mereiimizdi ósirip, eńbegimizdi elep jatqany qýantady. Iaǵni óz jumysymnyń mańyzdy, ári kópshilikke paidaly ekenin taǵy bir márte uǵyndym. Inkliýziia degen - jai sóz ǵana emes, qoǵamdy qoljetimdi jáne ádil etýge kómektesetin naqty qadamdar. Men osy ózgeristerdiń ishinde júrgenime qýanyshtymyn. On jyl boiy múgedekterge jumysqa, aýrýhanalarǵa, oqý oryndaryna jetýge kómektesetin Invataksi qyzmetiniń dispetcheri bolyp jumys istedim. Bul meni jaýapkershilikke, shydamdylyqqa úiretti. Biraq men únemi jýrnalist bolýdy armandaitynmyn. Qazir jýrnalistika fakýltetinde oqyp, tilshi bolyp jumys isteimin. Qansha qiyndyqtardy bastan keshirsek te, eń bastysy berilmeýge úirenýimiz kerek. Ózine, óz kúshine sengen adam qandai aýyrtpalyqty da jeńip shyǵady. Bizdiń árqaisymyzdyń da talanttymyz, qabiletterimiz bar, tek sonyń kózin taýyp asha bilý kerek", - dedi ol.
Shara merekelik kontsertpen jalǵasty. Saltanatty jiynǵa kelgen árbir áielge syi jasalyp, gúl shoqtary tabystaldy.
Atap ótsek, oblys qurylǵannan beri 1237 kópbalaly otbasy turǵyn úimen qamtamasyz etilgen, al biyl 1600-dei kópbalaly otbasy osyndai qýanyshqa keneledi. Sondai-aq ai saiyn 30 myńnan astam kópbalaly ana memleketten túrli qarjylyq qoldaý alýda. Sol siiaqty ótken jyly jumyspen qamtýdy úilestirý jáne áleýmettik baǵdarlamalar basqarmasynyń qoldaýymen oblysta 136 áiel qaitarymsyz grant alyp, óz jeke isin bastady.
