Jetisý oblysynyń qurylǵanyna 3 jyl tolýyna orai taǵy 3 áleýmettik nysan iske qosyldy. Atap aitqanda, Alakól aýdanynda óńirdegi úshinshi Belsendi uzaq ómir súrý ortalyǵy, Qaratal aýdanynda mádeniet úii men tennis ortalyǵy ashyldy,- dep habarlaidy Dalanews.kz
Eske salsaq, alǵashqy Belsendi uzaq ómir súrý ortalyǵy ótken jyly Taldyqorǵan qalasynda, keiin Sarqan aýdanynda paidalanýǵa berilgen edi. Endi osyndai mańyzdy áleýmettik joba Alakól aýdany Úsharal qalasynda ashylyp otyr. Bul aýdandaǵy 2200 zeinetker úshin qýanyshty jańalyq boldy.
- Ortalyq qart adamdardy mádeni, shyǵarmashylyq, sporttyq jáne iskerlik ómirge áleýmettendirý, olardyń fizikalyq jáne psihikalyq densaýlyǵyn jaqsartý maqsatynda iske asyrylyp otyr. Eki qabatty ǵimarattyń 1-qabatynda májilis zaly, as bólme, trenajer zaly ornalassa, 2-qabatta dáriger men massajistiń kabineti, ústel oiyndary men trenajer zaly, bi, ioga zaly, án jáne vokal kabineti, tigin zaly bar. Munda terapevt, massajist, ioga men kórkem gimnastika nusqaýshylary, kompiýterlik saýattylyq, aǵylshyn tili, mýzyka jáne beineleý óneri úiirmeleriniń jetekshileri jumys isteidi. Ortalyqta jalpy sany 7 jańa jumys orny ashyldy, - deidi nysan direktory Almat Sadiev.
Ortalyqtyń ashylýyna orai jergilikti ardagerler de óz pikirlerin bildirdi.
- Belsendi ómir uzaq ómir súrý ortalyǵynyń jumysy bizdiń densaýlyǵymyzdy jaqsartyp qana qoimai, sportpen ainalysýǵa, qalaǵan isimizben ainalysýǵa, jańa mashyqtardy meńgerýimizge kómektesedi. Adam ómir boiy úirenedi, sondyqtan jańa dúnielerdi úirenýge eshqashan kesh emes. Ózimiz úshin de, jas urpaqtyń táribesi úshin de zamanǵa sai jeke tulǵa retinde úzdiksiz damý paidaly, - deidi Bolatbek Núsipbekuly.
Sol siiaqty osy kúni Qaratal aýdanynyń eki aýylynda birdei jańa nysan iske qosyldy. Atap aitqanda Aitý bi aýyldyq okrýgine qarasty Kókpekti aýylynda mádeniet úii esigin aiqara ashty. Kókpekti aýyly aýdan ortalyǵynan 18 km qashyqtyqta ornalasqan. Okrýgte 1400-ten astam adam turady, sonyń 116-sy – jastar.
Nysannyń jalpy alańy 674 sharshy metrden asady. Bir qabatty mádeniet úiinde 250 oryndy kórermen zaly, sahna, sol siiaqty dombyra, bi, án úiirmelerine arnalǵan kabinetter bar. Munda 7 turaqty jumys orny ashylǵan.
Atap ótsek, sońǵy jyldarda Qaratal aýdanynda Eskeldi, Jańatalap, Kálpe aýyldarynda mádeniet úileri salynyp, qoldanysqa berilse, biyl Almaly, Tastóbe, Kópbirlik aýyldarynda klýbtar boi kóterýde.
Al demeýshilerdiń kómegimen turǵyzylǵan, ishinde qosymsha boks zaly bar ústel tennisi ortalyǵy Kálpe aýylynda iske qosyldy. Nysanda eki negizgi zal bar, bireýine tennis ústelderi qoiylsa, ekinshisi boksqa arnap jabdyqtalǵan.
- Bokspen ainalysyp júrgenime 1 jyldai boldy. Buǵan deiin Úshtóbe qalasyndaǵy sport keshenine jattyǵý úshin arnaiy baryp-qaitatynbyz. Búgin óz týǵan aýylymyzda boks zaly ashylyp, qýanyp jatyrmyz. Endi eshqaida sabylýdyń qajeti joq, jańa zalda alańsyz jattyǵýǵa barlyq múmkindik jasalǵan, - deidi Kálpe orta mektebiniń 10-synyp oqýshysy Rústem Báken.
