Musabek aýylynda gaz taratý jelileri men jetkizýshi gaz qubyryn tartýǵa 523 million 827 myń teńge bólingen. Qurylys jumystaryn merdiger «Almaty Production Construction & Invest» JShS atqardy.
Qazirgi ýaqytta qurylys-montajdaý jumystary tolyq aiaqtalǵan. Gaz qubyrynyń uzyndyǵy 46,7 shaqyrym, sonyń 15,5 shaqyrymy joǵarǵy qysymdy, 31,2 shaqyrymy tómengi qysymdy.
Sol siiaqty 4 dana shkaftyq tiptegi gaz taratý stansysy ornatyldy. Jalpy bul aýylda 1806 turǵyn bar, abonent sany – 178.
Gaz alaýyn jaǵý saltanatty rásimine qatysqan aýyl turǵyndary atqarylǵan iske rizashylyqtaryn bildirdi. Aýyl turǵyny, «Kúmis alqa» iegeri Altynshash Mutasheva:
– Osy aýyldyń baiyrǵy turǵynymyn. Munda 1969 jyldan beri turamyn. Alty balam bar. Jylqy baqtyq, qoi baqtyq, uzaq jyl malda boldyq. Aýylǵa túbegeili turaqtaǵanymyzǵa on jyldai boldy. Qazir jasym 73-te. Ot jaǵyp, kúl shyǵarǵan ońai emes. Gaz kelgeninen qýanyp jatyrmyz. Qurylys jumystarynda er azamattar kúnniń ystyǵyna da, sýyǵyna da qaramai jumys istedi. Úiime gazdyń núktesin, eseptegish quralyn merdiger kompaniia tegin ornatyp berdi. Azamattardyń bárine de kóp rahmet aitamyn, – dedi kóp balaly ana.
Kóksý aýdandyq ákimdiginiń málimetinshe, buǵan deiin Balpyq bi, Terekti, Muqyry, Eńbekshi, Besqainar, Jambyl, Mámbet aýyldaryna gaz qubyry tartylyp, 5 myńnan astam abonent gazǵa qosylýǵa múmkindik alsa, sonyń 2700-den astamy búginde kógildir otynnyń igiligin kórip otyr.
Kóksý aýdanynda gazǵa qosylýǵa jatatyn 12 aýyl bar, olar jospar boiynsha kelesi jyldyń sońyna deiin tolyq qosylyp bitýi tiis.
Oblystyq energetika jáne turǵyn úi-kommýnaldyq sharýashylyq basqarmasynyń málimetinshe, josparǵa sáikes 2025 jylǵa deiin Kerbulaq aýdanynan Taldyqorǵanǵa deiingi eldi mekender tolyq gazdandyrylady. Al 2030 jylǵa qarai óńirdi gazdandyrý 100%-ǵa jetedi nemese 192 eldi meken qamtylady dep mejelenip otyr.
