مۇسابەك اۋىلىندا گاز تاراتۋ جەلىلەرى مەن جەتكىزۋشى گاز قۇبىرىن تارتۋعا 523 ميلليون 827 مىڭ تەڭگە بولىنگەن. قۇرىلىس جۇمىستارىن مەردىگەر «الماتى Production Construction & Invest» ج ش س اتقاردى.
قازىرگى ۋاقىتتا قۇرىلىس-مونتاجداۋ جۇمىستارى تولىق اياقتالعان. گاز قۇبىرىنىڭ ۇزىندىعى 46،7 شاقىرىم، سونىڭ 15،5 شاقىرىمى جوعارعى قىسىمدى، 31،2 شاقىرىمى تومەنگى قىسىمدى.
سول سياقتى 4 دانا شكافتىق تيپتەگى گاز تاراتۋ ستانسىسى ورناتىلدى. جالپى بۇل اۋىلدا 1806 تۇرعىن بار، ابونەنت سانى – 178.
گاز الاۋىن جاعۋ سالتاناتتى راسىمىنە قاتىسقان اۋىل تۇرعىندارى اتقارىلعان ىسكە ريزاشىلىقتارىن ءبىلدىردى. اۋىل تۇرعىنى، «كۇمىس القا» يەگەرى التىنشاش مۇتاشيەۆا:
– وسى اۋىلدىڭ بايىرعى تۇرعىنىمىن. مۇندا 1969 جىلدان بەرى تۇرامىن. التى بالام بار. جىلقى باقتىق، قوي باقتىق، ۇزاق جىل مالدا بولدىق. اۋىلعا تۇبەگەيلى تۇراقتاعانىمىزعا ون جىلداي بولدى. ءقازىر جاسىم 73-تە. وت جاعىپ، كۇل شىعارعان وڭاي ەمەس. گاز كەلگەنىنەن قۋانىپ جاتىرمىز. قۇرىلىس جۇمىستارىندا ەر ازاماتتار كۇننىڭ ىستىعىنا دا، سۋىعىنا دا قاراماي جۇمىس ىستەدى. ۇيىمە گازدىڭ نۇكتەسىن، ەسەپتەگىش قۇرالىن مەردىگەر كومپانيا تەگىن ورناتىپ بەردى. ازاماتتاردىڭ بارىنە دە كوپ راحمەت ايتامىن، – دەدى كوپ بالالى انا.
كوكسۋ اۋداندىق اكىمدىگىنىڭ مالىمەتىنشە، بۇعان دەيىن بالپىق بي، تەرەكتى، مۇقىرى، ەڭبەكشى، بەسقاينار، جامبىل، مامبەت اۋىلدارىنا گاز قۇبىرى تارتىلىپ، 5 مىڭنان استام ابونەنت گازعا قوسىلۋعا مۇمكىندىك السا، سونىڭ 2700-دەن استامى بۇگىندە كوگىلدىر وتىننىڭ يگىلىگىن كورىپ وتىر.
كوكسۋ اۋدانىندا گازعا قوسىلۋعا جاتاتىن 12 اۋىل بار، ولار جوسپار بويىنشا كەلەسى جىلدىڭ سوڭىنا دەيىن تولىق قوسىلىپ ءبىتۋى ءتيىس.
وبلىستىق ەنەرگەتيكا جانە تۇرعىن ۇي-كوممۋنالدىق شارۋاشىلىق باسقارماسىنىڭ مالىمەتىنشە، جوسپارعا سايكەس 2025 جىلعا دەيىن كەربۇلاق اۋدانىنان تالدىقورعانعا دەيىنگى ەلدى مەكەندەر تولىق گازداندىرىلادى. ال 2030 جىلعا قاراي ءوڭىردى گازداندىرۋ 100%-عا جەتەدى نەمەسە 192 ەلدى مەكەن قامتىلادى دەپ مەجەلەنىپ وتىر.
