Taldyqorǵan qalasynda jylyna 150 myń tonna tegistegish bolat shar óndiretin jańa zaýyt salynbaq. Bul rette oblys ekonomikasyna 85 million dollar kóleminde investitsiia tartylyp, 100-ge jýyq jańa jumys orny ashylady. Jobany iske asyrý óńirdiń taý-ken metallýrgiia salasyna tyń serpin beredi dep kútilip otyr,- dep habarlaidy Dalanews.kz Jetisý oblysy ákiminiń baspasóz qyzmetine silteme jasap.
Osy jobany júzege asyrýǵa qatysty jýyrda Astana qalasynda KAZ Minerals Toby men chililik Compania Electro Metalurgica SA (ME Elecmetal) ózara kelisimshartqa qol qoidy.
Atalǵan resmi sharaǵa elimizdiń Ónerkásip jáne qurylys ministrliginiń basshylyǵy, elshilik ókilderi, kompaniialar qyzmetkerleri, sol siiaqty óńirden Jetisý oblysy ákiminiń orynbasary Áset Qanaǵatov qatysty. Á.Qanaǵatov óz sózinde jobany iske asyrýdyń barlyq kezeńinde jergilikti atqarýshy organ tarapynan zań aiasynda qajetti qoldaýlar kórsetiletin jetkizdi.
Atap ótsek, jobaǵa qatysty jumystar oblys basshylyǵy tarapynan ótken jyldan beri júrgizilip keledi. Oblystyq kásipkerlik jáne indýstriialyq-innovatsiialyq damý basqarmasynyń aqparatyna qaraǵanda, jańa zaýyt Taldyqorǵan qalasynda salynady dep josparlanyp otyr. Eksportqa baǵyttalǵan kásiporyn 2028 jyly iske qosylady dep kútilýde. Zaýyt shyǵaratyn tegisteý sharlary Kerbulaq aýdanyndaǵy «Shoǵyrlandyrylǵan qurylys taý-ken kompaniiasy» JShS metallýrgiialyq kombinatynyń mys jáne mys ónimderin óndirýi barysynda da qoldanylmaq.
Eske salaiyq, tegistegish bolat sharlar shar diirmenderindegi kenderdi, kómirdi, klinkerdi jáne basqa materialdardy untaqtaýǵa arnalǵan. Ónimniń negizgi tutynýshylary - taý-ken baiytý sektorynyń kásiporyndary, jylý elektr stantsiialary jáne qatty materialdardy untaqtaý qajettiligi bar basqa kásiporyndar.
