تالدىقورعان قالاسىندا جىلىنا 150 مىڭ توننا تەگىستەگىش بولات شار وندىرەتىن جاڭا زاۋىت سالىنباق. بۇل رەتتە وبلىس ەكونوميكاسىنا 85 ميلليون دوللار كولەمىندە ينۆەستيسيا تارتىلىپ، 100-گە جۋىق جاڭا جۇمىس ورنى اشىلادى. جوبانى ىسكە اسىرۋ ءوڭىردىڭ تاۋ-كەن مەتاللۋرگيا سالاسىنا تىڭ سەرپىن بەرەدى دەپ كۇتىلىپ وتىر،- دەپ حابارلايدى Dalanews.kz جەتىسۋ وبلىسى اكىمىنىڭ باسپا ءسوز قىزمەتىنە سىلتەمە جاساپ.
وسى جوبانى جۇزەگە اسىرۋعا قاتىستى جۋىردا استانا قالاسىندا KAZ Minerals توبى مەن چيليلىك Compania Electro Metalurgica SA (ME Elecmetal) ءوزارا كەلىسىمشارتقا قول قويدى.
اتالعان رەسمي شاراعا ەلىمىزدىڭ ونەركاسىپ جانە قۇرىلىس مينيسترلىگىنىڭ باسشىلىعى، ەلشىلىك وكىلدەرى، كومپانيالار قىزمەتكەرلەرى، سول سياقتى وڭىردەن جەتىسۋ وبلىسى اكىمىنىڭ ورىنباسارى اسەت قاناعاتوۆ قاتىستى. ءا.قاناعاتوۆ ءوز سوزىندە جوبانى ىسكە اسىرۋدىڭ بارلىق كەزەڭىندە جەرگىلىكتى اتقارۋشى ورگان تاراپىنان زاڭ اياسىندا قاجەتتى قولداۋلار كورسەتىلەتىن جەتكىزدى.
اتاپ وتسەك، جوباعا قاتىستى جۇمىستار وبلىس باسشىلىعى تاراپىنان وتكەن جىلدان بەرى جۇرگىزىلىپ كەلەدى. وبلىستىق كاسىپكەرلىك جانە يندۋستريالىق-يننوۆاسيالىق دامۋ باسقارماسىنىڭ اقپاراتىنا قاراعاندا، جاڭا زاۋىت تالدىقورعان قالاسىندا سالىنادى دەپ جوسپارلانىپ وتىر. ەكسپورتقا باعىتتالعان كاسىپورىن 2028 جىلى ىسكە قوسىلادى دەپ كۇتىلۋدە. زاۋىت شىعاراتىن تەگىستەۋ شارلارى كەربۇلاق اۋدانىنداعى «شوعىرلاندىرىلعان قۇرىلىس تاۋ-كەن كومپانياسى» ج ش س مەتاللۋرگيالىق كومبيناتىنىڭ مىس جانە مىس ونىمدەرىن ءوندىرۋى بارىسىندا دا قولدانىلماق.
ەسكە سالايىق، تەگىستەگىش بولات شارلار شار ديىرمەندەرىندەگى كەندەردى، كومىردى، كلينكەردى جانە باسقا ماتەريالداردى ۇنتاقتاۋعا ارنالعان. ءونىمنىڭ نەگىزگى تۇتىنۋشىلارى - تاۋ-كەن بايىتۋ سەكتورىنىڭ كاسىپورىندارى، جىلۋ ەلەكتر ستانسيالارى جانە قاتتى ماتەريالداردى ۇنتاقتاۋ قاجەتتىلىگى بار باسقا كاسىپورىندار.
