Jetisý oblysynda «Taldyqorǵan – Úsharal» magistraldy gaz qubyrynyń qurylysy josparlanǵan merziminen buryn aiaqtaldy. Búgin Respýblika kúni qarsańynda «Úsharal» avtomatty gaz taratý stantsiiasynda saltanatty is-shara ótip, onda joba aiasyndaǵy alty avtomatty gaz taratý stantsiiasynda (AGTS) bir mezgilde kógildir otyn alaýy jaǵyldy. Bul investitsiialyq jobany Memleket basshysynyń tapsyrmasy boiynsha «QazaqGaz» Ulttyq kompaniiasy iske asyrdy, dep habarlaidy Dalanews.kz.
Atap ótsek, «Taldyqorǵan – Úsharal» magistraldy gaz qubyry qubyrynyń qurylysy ótken jyldyń tamyz aiynda bastalǵan. Jobany iske asyrý barysynda 302,4 km gaz qubyry tartyldy. Sondai-aq 6 gaz qubyry-burmasy jáne «Qapal», «Jansúgirov», «Sarqan», «Qoilyq», «Qabanbai» jáne «Úsharal» 6 avtomatty gaz taratý stantsiiasy salyndy. Jobanyń iske asyrylýy arqasynda Aqsý, Sarqan, Alakól aýdandarynyń 80-nen astam eldi mekenindegi 130 myńnan astam turǵynǵa kógildir otyn beriledi. Ol úshin jergilikti jerlerge gaz tartýdyń jobalyq-smetalyq qujattary ázirlenýde, kelesi jyldan qurylys jumystary bastalady.
- «Taldyqorǵan – Úsharal» magistraldy gaz qubyry qurylysynyń merziminen buryn aiaqtalýyna yqpal etken «QazaqGaz» kompaniiasyna Jetisý oblysynyń turǵyndary atynan alǵysymdy bildiremin. Biz aldaǵy ýaqytta da óńirdi gazdandyrýdy ári qarai jalǵastyramyz. Óitkeni tabiǵi gaz berý – halyqtyń ómir súrý deńgeiin arttyrýmen qatar, ekonomikaǵa úlken áser etetin strategiialyq basymdyqtyń biri. Eń aldymen gazǵa aýrýhana, emhana, mektep, balabaqsha, mádeniet úileri, sport nysandary sekildi áleýmettik nysandardy qosamyz. Turǵyndardyń da kógildir otynǵa qosylýyna múmkindik jasalady. Oǵan qosa ónerkásiptiń, shaǵyn jáne orta biznestiń damýyna yqpal etip, jańa jumys oryndarynyń qurylýyna jol ashady, - dedi B. Isabaev.
Óz kezeginde «Samuryq-Qazyna» UÁQ» AQ Strategiia jáne aktivterdi basqarý jónindegi basqarýshy direktory Eljas Otynshiev atalǵan jobanyń áleýmettik mańyzdylyǵyna toqtaldy.
- «Samuryq-Qazyna» qory ekonomikanyń túrli salasynda, ásirese munai-gaz, energetika baǵytynda aýqymdy bastamalardy júzege asyrýda. Sondai jobalardyń biri – «Taldyqorǵan-Úsharal» gaz qubyry. Bul - óte mańyzdy joba. Elge gaz kelse, halyqtyń áleýmettik jaǵdaiy jaqsarady. Ekologiia jaqsarady. Óńirge investitsiia quiylady, - dedi ol.
Munan soń sóz alǵan «QazaqGaz» UK» AQ Basqarma tóraǵasynyń strategiia jáne investitsiialar jónindegi orynbasary Akbar Tólegenov jańa gaz qubyrynyń jelilik bóligi men bir mezgilde qatar salynǵan AGTS-tiń qurylys jumystarynyń barysy erekshe baqylaýda bolǵanyn basa aitty.
- Sonyń nátijesinde jańa gaz qubyry jáne barlyq 6 AGTS josparlanǵan merzimnen bir jyl tórt aiǵa erte daiyn boldy. Osylaisha, «QazaqGaz» osy óńirdi gazdandyrýdyń irgetasyn qalap, jumystyń negizgi kóp eńbekti qajet etetin bóligin oryndady. Qazirgi ýaqytta gaz qubyrynyń taratý jelilerin salý boiynsha qurylys-montajdaý jumystaryna arnalǵan qujattar boiynsha memlekettik saraptamanyń oń qorytyndysyn kútip otyrmyz, - dei kele Akbar Tólegenov aýdan turǵyndaryn qýanyshtarymen quttyqtap, tilegin bildirdi.
Osy jiynda «Qapal», «Jansúgirov», «Sarqan», «Qoilyq», «Qabanbai» AGTS-tary telekópir arqyly qosylyp, stantsiialar alaýyn jaqty, sońynda «Úsharal» AGTS-ynda iske qosý tetigi basylyp, alaý laýlady.
Sharanyń resmi bóliginen keiin oblys ákimi jinalǵan aýdan halqymen tildesti. Óńirdegi gazdandyrý, jol jóndeý, turǵyn úi qurylysy, eldi mekenderdi abattandyrý siiaqty atqarylyp jatqan mańyzdy ister jaily qysqasha baiandap berdi. Bul sharalardyń barlyǵy is júzinde halyq qolmen ustap, kózben kóretin naqty sharalardyń jemisi ekenin aitty. Aýdan turǵyndary Satai Bekbolatov, Qońyrjai Qystalasova, Uldash Bipajanova, Erik Jýanyshbaev jáne basqa da azamattar pikirlerin bildirip, rizashylyqtaryn jetkizdi.
Solardyń biri Úsharal qalasynyń turǵyny Áben Saqypov:
"1980 jyldan beri Úsharalda turamyn. Biz osy kúndi uzaq kúttik. Alakól óńiriniń qysy qatty, keide 7-8 aiǵa deiin ot jaǵatyn kezimiz bolady. Nemerelerimiz tońyp qalmasyn dep tań bozynan ot jaǵamyz. Bir qysta segiz tonnaǵa deiin kómir jaǵamyz, oǵan qosa aǵash otyn daiyndaimyz. Kómir jaǵyp, kúlin shyǵarý egde jastaǵy adamdarǵa ońai emes. Ózimiz úlken kóshelerdiń birinde turatyndyqtan, gazǵa alǵashqylardyń biri bolyp qosylýǵa múmkindigimiz bolady dep oilaimyn. Shalǵai aýdanǵa gaz kelgenine rizamyz".
Jalpy oblysta gazdandyrý isi óńirde qarqyndy júrgizilip jatyr. Máselen, oblys qurylǵan kezde tek 5 eldi meken gazdandyrylsa (27%), atqarylǵan jumystardyń nátijesinde búginde 84 eldi mekenniń 404 myńnan astam turǵyny kógildir otynǵa qol jetkizdi (58,2%). Jyl sońyna deiin Panfilov – Kerbulaq – Taldyqorǵan aralyǵyndaǵy taǵy 42 eldi meken gazben qamtylyp, gazdandyrý deńgeii 72% jetedi (126 eldi meken). Al 2027 jyldyń sońyna qarai oblysta gazdandyrýǵa jatatyn 200-den astam eldi mekenniń 630 myń turǵyny gazǵa qosylýǵa múmkindik alady (91%).
