Áleýmettik jelide 8 mamyrdan bastap júrgizýshiler jyldamdyqty 2 km/saǵatqa asyrǵany úshin aiyppul arqalaidy degen aqparat tarady. Alaida Ishki ister ministrligi bul aqparatty resmi túrde joqqa shyǵardy, dep habarlaidy dalanews.kz.
Vedomstvo málimetinshe, jyldamdyqty asyrýǵa qatysty jaýapkershilik tártibi ózgergen joq.
IIM túsindirgendei, ákimshilik jaýapkershilik burynǵydai tek jyldamdyq belgilengen mólsherden 10 km/saǵ jáne odan joǵary asqan jaǵdaida ǵana qarastyrylady.
Vedomstvo ókilderi 8 mamyrdan bastap kúshine enetin birlesken buiryq tek joldaǵy kameralardyń jumysyna qatysty ekenin atap ótti. Qujatta ólsheý quraldarynyń dáldigi men ruqsat etilgen qatelik shegi retteledi. Iaǵni, bul ózgeris júrgizýshilerge jańa talap qoimaidy jáne aiyppul salý shegine áser etpeidi.
"Jyldamdyqty 2 km/saǵ asyrǵany úshin aiyppul salynady degen aqparat shyndyqqa janaspaidy", – delingen ministrlik taratqan habarlamada.
Sonymen qatar quqyq qorǵaý organdary jalǵan aqparatty taratqan avtordy anyqtaǵan. Ol – Rýdnyi qalasynyń turǵyny. Sot sheshimimen oǵan ákimshilik jaýapkershilik júktelgen.
IIM azamattardy tek resmi derekkózderge súienýge jáne tekserilmegen aqparatty taratpaýǵa shaqyrdy.
