Ótken jyly Jetisý oblysynyń jumyspen qamtý organdarynyń qoldaýymen 35 jasqa deiingi 7 695 jas jumysqa ornalastyryldy. Solardyń arasynda qysqa merzimdik kásiptik oqytýdan ótip, jumysqa turǵan, grant alyp, kásip ashqan jastar da bar, - dep habarlaidy Dalanews.kz Jetisý oblysy ákiminiń baspasóz qyzmetine silteme jasap.
Oblystyq jumyspen qamtýdy úilestirý jáne áleýmettik baǵdarlamalar basqarmasynyń málimetine súiensek, byltyr jastar arasynan qoǵamdyq jumystarǵa 1 322 adam, jastar praktikasyna 1 150 túlek, áleýmettik jumys oryndaryna 125 jas, «Alǵashqy jumys orny» boiynsha 575 adam, «Urpaqtar kelisim-shartymen» 31 adam jumysqa turǵyzylǵan. Budan bólek, grant alǵandar da, «Bastaý biznes» jobasy boiynsha kásipkerlik negizderine oqytylǵandar da bar.
Máselen, qysqa merzimdi kásiptik oqýǵa jiberilgen oblystaǵy 318 jastyń biri – taldyqorǵandyq Aigerim Tórebaeva. Bala kútimi demalysynan keiin Aigerim jýrnalistik diplomyn ysyryp qoiyp, ózin basqa salada synap kórgisi keldi. Sóitip Taldyqorǵan qalasynyń Mansap ortalyǵy arqyly qysqa merzimdik kásiptik oqýǵa joldama alyp, «Tashenova» JK oqý ortalyǵynda kirpik ósirýdiń qyr-syryn meńgerdi. Úsh ailyq kýrstyń merzimi aiaqtalǵan soń atalǵan shaǵyn kásipkerlik nysanyna jumysqa qabyldandy.
- Ózim kóp balaly anamyn. Balalarym jas bolǵandyqtan, solardyń kútimimen birshama ýaqyt úide otyrdym. Keiin sulýlyq álimine bet buryp, jańa kásip úirensem dep jumyspen qamtý organyna júgindim. Sonyń arqasynda ótken jyldyń tamyz aiynda otqytý kýrsynan ótip, sertifikatymdy aldym. Maǵan joǵary bilikti mamandar kirpik ósý isin egjei-tegjeili úiretti. Sulýlyq salonynda az ǵana ýaqyttyń ishinde ózimniń jaqsy maman ekenimdi kórsete aldym, qazir ózimniń turaqty kelýshilerim bar. Kez kelgen ýaqytta adam ózi qalaǵan jańa kásipti meńgere alady eken, oǵan eshqashan kesh emes. Soǵan kózim jetti. Osyndai múmkindikterge jol ashyp otyrǵan memlekettik baǵdarlamalardyń bar bolǵany qýantady, - deidi kóp balaly ana Aigerim Tórebaeva.
Oblystyq qoǵamdyq damý basqarmasynyń málimetine qaraǵanda, ótken jyly jastarǵa arnalǵan memlekettik baǵdarlamalar men jobalar týraly aqparattandyrý baǵytynda óńirde ótkizilgen kezdesýler men túsindirý jumystaryna 3 myńnan astam jas tartylǵan. Osy oraida túrli granttarǵa qatysyp, óz isin ashýǵa talpynǵan jastar da az emes. Mysaly, psiholog jáne logoped-defektolog mamandyqtary boiynsha joǵary bilim alǵan Aiym Sailaýbekova mamandyǵyna sai jumys izdep júrgen kezinde jastarǵa arnalǵan granttar bar ekenin estip-bilgen.
- Bir kúni áleýmettik jeliden jastarǵa konkýrs negizinde granttar beriletini týraly aqparatty kózim shaldy. Osy konkýrsqa halyqqa paidasy tietin joba usynyp, baq synap kórsem degen oi keldi. Sóitip erekshe bilim berýdi qajet etetin balalarǵa arnalǵan korrektsiialyq ortalyq ashý jobasyn usynyp, 3 mln. teńge grant utyp aldym. Birden Taldyqorǵan qalasynan osyndai ortalyq ashtym. Ortalyqqa kerek jabdyqtardyń bárin granttyń qarjysyna satyp aldym. Qazir ortalyqta beiimdelgen dene shynyqtyrý, sensorlyq integratsiia, logomassaj qyzmet túrleri jasalyp, logoped, defektolog, psiholog, neiropsiholog mamandar sabaq júrgizedi. Qazir ortalyqta 12 adam jumys isteidi, - deidi «Sana» ortalyǵynyń jetekshisi Aiym Sailaýbekova.
Jalpy ótken jyly jastar bastamalaryn qoldaý maqsatynda «Táýelsizdik urpaqtary» granty boiynsha 3 mln. teńgeden 10 grant berilgen. Granttar «Ǵylym», «Mádeniet», «Aqparattyq tehnologiialar», «Biznes», «Media» baǵyttary boiynsha usynylyp, jastardyń óz isin ashýǵa járdem etti.
Osy rette óńirde jastardyń, ásirese NEET sanatyndaǵy jastardyń ómirden óz oryndaryn tabýyna erekshe kóńil bólinedi. Oblystyq qoǵamdyq damý basqarmasynyń derekterine sáikes ótken jyly jastardy maýsymdyq jumyspen qamtý maqsatyndaǵy «Jasyl el» eńbek jasaqtarynda 635 adam jumys atqardy. Joba aiasynda barlyq aýdan-qalalarda «Ekodesant», «Tazalyq tyńshysy», «Jaiqalsyn jas terek», «Jasyl baq – taza qala» atty aktsiialar uiymdastyryp, tazalyq sharalary júrgizildi. Sonymen qatar 83 «Bos jumys oryndarynyń jármeńkesi» uiymdastyrylyp, 4 081 adam turaqty jumysqa ornalasty.
Buǵan qosa, oblys mektepterindegi ádep-quqyq jumysy jónindegi mentorlar joǵary synyp oqýshylaryna mamandyq tańdaýǵa, aldaǵy úlken ómirge durys qadam jasaýǵa járdemdesýde. Bul da jastar saiasatyna óziniń oń yqpalyn tigizip otyr. Atap ótsek, búginde oblystaǵy mentorlyq joba aiasynda 126 adam eńbek etedi. Olar balalar men jasóspirimderdiń quqyqtary men mindetteri, nashaqorlyq pen lýdomaniianyń, sýitsidtiń, býlling pen kiberbýllingtiń, zorlyq-zombylyqtyń aldyn alý, jynystyq qol suǵylmaýshylyqty qalyptastyrý, salaýatty ómir salty, mamandyq tańdaý jáne kásiptik baǵdarlaý, kreativti oilaý, qarjylyq saýattylyq siiaqty 9 baǵytta jumys isteidi.
Eske salsaq, jalpy ótken jyly Jetisý oblysy boiynsha 35 643 jumys orny quryldy, onyń 22 719-y – turaqty jumys orny. Jumyspen qamtýǵa járdemdesýdiń belsendi sharalarymen 27 794 adam qamtyldy, 23 286 adam jumysqa ornalastyryldy, onyń 13 261-i turaqty jumys oryndaryna turǵyzyldy.
