وتكەن جىلى جەتىسۋ وبلىسىنىڭ جۇمىسپەن قامتۋ ورگاندارىنىڭ قولداۋىمەن 35 جاسقا دەيىنگى 7 695 جاس جۇمىسقا ورنالاستىرىلدى. سولاردىڭ اراسىندا قىسقا مەرزىمدىك كاسىپتىك وقىتۋدان ءوتىپ، جۇمىسقا تۇرعان، گرانت الىپ، كاسىپ اشقان جاستار دا بار، - دەپ حابارلايدى Dalanews.kz جەتىسۋ وبلىسى اكىمىنىڭ باسپا ءسوز قىزمەتىنە سىلتەمە جاساپ.
وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ مالىمەتىنە سۇيەنسەك، بىلتىر جاستار اراسىنان قوعامدىق جۇمىستارعا 1 322 ادام، جاستار پراكتيكاسىنا 1 150 تۇلەك، الەۋمەتتىك جۇمىس ورىندارىنا 125 جاس، «العاشقى جۇمىس ورنى» بويىنشا 575 ادام، «ۇرپاقتار كەلىسىم-شارتىمەن» 31 ادام جۇمىسقا تۇرعىزىلعان. بۇدان بولەك، گرانت العاندار دا، «باستاۋ بيزنەس» جوباسى بويىنشا كاسىپكەرلىك نەگىزدەرىنە وقىتىلعاندار دا بار.
ماسەلەن، قىسقا مەرزىمدى كاسىپتىك وقۋعا جىبەرىلگەن وبلىستاعى 318 جاستىڭ ءبىرى – تالدىقورعاندىق ايگەرىم تورەبايەۆا. بالا كۇتىمى دەمالىسىنان كەيىن ايگەرىم جۋرناليستىك ديپلومىن ىسىرىپ قويىپ، ءوزىن باسقا سالادا سىناپ كورگىسى كەلدى. ءسويتىپ تالدىقورعان قالاسىنىڭ مانساپ ورتالىعى ارقىلى قىسقا مەرزىمدىك كاسىپتىك وقۋعا جولداما الىپ، «تاشەنوۆا» جك وقۋ ورتالىعىندا كىرپىك ءوسىرۋدىڭ قىر-سىرىن مەڭگەردى. ءۇش ايلىق كۋرستىڭ مەرزىمى اياقتالعان سوڭ اتالعان شاعىن كاسىپكەرلىك نىسانىنا جۇمىسقا قابىلداندى.
- ءوزىم كوپ بالالى انامىن. بالالارىم جاس بولعاندىقتان، سولاردىڭ كۇتىمىمەن ءبىرشاما ۋاقىت ۇيدە وتىردىم. كەيىن سۇلۋلىق الىمىنە بەت بۇرىپ، جاڭا كاسىپ ۇيرەنسەم دەپ جۇمىسپەن قامتۋ ورگانىنا جۇگىندىم. سونىڭ ارقاسىندا وتكەن جىلدىڭ تامىز ايىندا وتقىتۋ كۋرسىنان ءوتىپ، سەرتيفيكاتىمدى الدىم. ماعان جوعارى بىلىكتى ماماندار كىرپىك ءوسۋ ءىسىن ەگجەي-تەگجەيلى ۇيرەتتى. سۇلۋلىق سالونىندا از عانا ۋاقىتتىڭ ىشىندە ءوزىمنىڭ جاقسى مامان ەكەنىمدى كورسەتە الدىم، ءقازىر ءوزىمنىڭ تۇراقتى كەلۋشىلەرىم بار. كەز كەلگەن ۋاقىتتا ادام ءوزى قالاعان جاڭا كاسىپتى مەڭگەرە الادى ەكەن، وعان ەشقاشان كەش ەمەس. سوعان كوزىم جەتتى. وسىنداي مۇمكىندىكتەرگە جول اشىپ وتىرعان مەملەكەتتىك باعدارلامالاردىڭ بار بولعانى قۋانتادى، - دەيدى كوپ بالالى انا ايگەرىم تورەبايەۆا.
وبلىستىق قوعامدىق دامۋ باسقارماسىنىڭ مالىمەتىنە قاراعاندا، وتكەن جىلى جاستارعا ارنالعان مەملەكەتتىك باعدارلامالار مەن جوبالار تۋرالى اقپاراتتاندىرۋ باعىتىندا وڭىردە وتكىزىلگەن كەزدەسۋلەر مەن ءتۇسىندىرۋ جۇمىستارىنا 3 مىڭنان استام جاس تارتىلعان. وسى ورايدا ءتۇرلى گرانتتارعا قاتىسىپ، ءوز ءىسىن اشۋعا تالپىنعان جاستار دا از ەمەس. مىسالى، پسيحولوگ جانە لوگوپەد-دەفەكتولوگ ماماندىقتارى بويىنشا جوعارى ءبىلىم العان ايىم سايلاۋبەكوۆا ماماندىعىنا ساي جۇمىس ىزدەپ جۇرگەن كەزىندە جاستارعا ارنالعان گرانتتار بار ەكەنىن ەستىپ-بىلگەن.
- ءبىر كۇنى الەۋمەتتىك جەلىدەن جاستارعا كونكۋرس نەگىزىندە گرانتتار بەرىلەتىنى تۋرالى اقپاراتتى كوزىم شالدى. وسى كونكۋرسقا حالىققا پايداسى تيەتىن جوبا ۇسىنىپ، ب ا ق سىناپ كورسەم دەگەن وي كەلدى. ءسويتىپ ەرەكشە ءبىلىم بەرۋدى قاجەت ەتەتىن بالالارعا ارنالعان كوررەكسيالىق ورتالىق اشۋ جوباسىن ۇسىنىپ، 3 ملن. تەڭگە گرانت ۇتىپ الدىم. بىردەن تالدىقورعان قالاسىنان وسىنداي ورتالىق اشتىم. ورتالىققا كەرەك جابدىقتاردىڭ ءبارىن گرانتتىڭ قارجىسىنا ساتىپ الدىم. ءقازىر ورتالىقتا بەيىمدەلگەن دەنە شىنىقتىرۋ، سەنسورلىق ينتەگراسيا، لوگوماسساج قىزمەت تۇرلەرى جاسالىپ، لوگوپەد، دەفەكتولوگ، پسيحولوگ، نەيروپسيحولوگ ماماندار ساباق جۇرگىزەدى. ءقازىر ورتالىقتا 12 ادام جۇمىس ىستەيدى، - دەيدى «سانا» ورتالىعىنىڭ جەتەكشىسى ايىم سايلاۋبەكوۆا.
جالپى وتكەن جىلى جاستار باستامالارىن قولداۋ ماقساتىندا «تاۋەلسىزدىك ۇرپاقتارى» گرانتى بويىنشا 3 ملن. تەڭگەدەن 10 گرانت بەرىلگەن. گرانتتار «عىلىم»، «مادەنيەت»، «اقپاراتتىق تەحنولوگيالار»، «بيزنەس»، «مەديا» باعىتتارى بويىنشا ۇسىنىلىپ، جاستاردىڭ ءوز ءىسىن اشۋعا جاردەم ەتتى.
وسى رەتتە وڭىردە جاستاردىڭ، اسىرەسە NEET ساناتىنداعى جاستاردىڭ ومىردەن ءوز ورىندارىن تابۋىنا ەرەكشە كوڭىل بولىنەدى. وبلىستىق قوعامدىق دامۋ باسقارماسىنىڭ دەرەكتەرىنە سايكەس وتكەن جىلى جاستاردى ماۋسىمدىق جۇمىسپەن قامتۋ ماقساتىنداعى «جاسىل ەل» ەڭبەك جاساقتارىندا 635 ادام جۇمىس اتقاردى. جوبا اياسىندا بارلىق اۋدان-قالالاردا «ەكودەسانت»، «تازالىق تىڭشىسى»، «جايقالسىن جاس تەرەك»، «جاسىل ب ا ق – تازا قالا» اتتى اكسيالار ۇيىمداستىرىپ، تازالىق شارالارى جۇرگىزىلدى. سونىمەن قاتار 83 «بوس جۇمىس ورىندارىنىڭ جارمەڭكەسى» ۇيىمداستىرىلىپ، 4 081 ادام تۇراقتى جۇمىسقا ورنالاستى.
بۇعان قوسا، وبلىس مەكتەپتەرىندەگى ادەپ-قۇقىق جۇمىسى جونىندەگى مەنتورلار جوعارى سىنىپ وقۋشىلارىنا ماماندىق تاڭداۋعا، الداعى ۇلكەن ومىرگە دۇرىس قادام جاساۋعا جاردەمدەسۋدە. بۇل دا جاستار ساياساتىنا ءوزىنىڭ وڭ ىقپالىن تيگىزىپ وتىر. اتاپ وتسەك، بۇگىندە وبلىستاعى مەنتورلىق جوبا اياسىندا 126 ادام ەڭبەك ەتەدى. ولار بالالار مەن جاسوسپىرىمدەردىڭ قۇقىقتارى مەن مىندەتتەرى، ناشاقورلىق پەن لۋدومانيانىڭ، ءسۋيسيدتىڭ، بۋللينگ پەن كيبەربۋللينگتىڭ، زورلىق-زومبىلىقتىڭ الدىن الۋ، جىنىستىق قول سۇعىلماۋشىلىقتى قالىپتاستىرۋ، سالاۋاتتى ءومىر سالتى، ماماندىق تاڭداۋ جانە كاسىپتىك باعدارلاۋ، كرەاتيۆتى ويلاۋ، قارجىلىق ساۋاتتىلىق سياقتى 9 باعىتتا جۇمىس ىستەيدى.
ەسكە سالساق، جالپى وتكەن جىلى جەتىسۋ وبلىسى بويىنشا 35 643 جۇمىس ورنى قۇرىلدى، ونىڭ 22 719-ى – تۇراقتى جۇمىس ورنى. جۇمىسپەن قامتۋعا جاردەمدەسۋدىڭ بەلسەندى شارالارىمەن 27 794 ادام قامتىلدى، 23 286 ادام جۇمىسقا ورنالاستىرىلدى، ونىڭ 13 261ء-ى تۇراقتى جۇمىس ورىندارىنا تۇرعىزىلدى.
