Jetisý oblysy qurylǵannan beri mádeniet, arhiv salasynyń shtat sany 200 birlikke artyp, 2300 adamnan asty, biýdjeti 83%-ǵa ósti. Al salanyń infraqurylymyn jańartý 40%-ǵa jetti, dep habarlaidy Dalanews.kz
Oblys qurylǵannan bergi úsh jylda óńirde aitýly mádeni jańalyqtar mol boldy. Máselen Taldyqorǵanda Uly Abaiǵa eskertkish, Halyq sýretshisi Ábilhan Qasteevtiń, Halyq artisi Biken Rimovanyń jáne eki márte Sotsialistik Eńbek Eri Nurmolda Aldabergenovtiń biýsti qoiyldy. Osy jyldar ishinde Jetisý oblysynyń filarmoniiasyna Qazaqstannyń Halyq ártisi, ánshi-kompozitor Dánesh Raqyshevtiń esimi berilip, óner sańlaǵy turǵan Taldyqorǵandaǵy úige eskertkish taqta ornatyldy. Oblys tarihynda tuńǵysh ret estradalyq-simfoniialyq orkestr quryldy. Kerbulaq aýdanynda Shoqan Ýálihanovtyń «Altynemel» memorialdy keshenine kúrdeli jóndeý jasalyp, Úshtóbe qalasynda Qaratal aýdandyq tarihi-ólketaný mýzeii salyndy.
Sońǵy úsh jylda óńirde 7 aýyldyq mádeniet úiine kúrdeli jóndeý jumystary júrgizildi, Qaratal aýdany Kálpe, Alakól aýdany Aqjar, Eskeldi aýdany Qaratal aýylynda mádeniet úileri salyndy. Sonymen qatar 8 aýylda Eskeldi aýdany Qońyr, Jalǵyzaǵash, Aqyn Sara aýyldarynda, Qaratal aýdany Eskeldi, Jańatalap aýyldarynda, Kerbulaq aýdany Qoiankóz, Shubar aýylynda, Kóksý aýdanynyń Musabek aýylynda blokty-modýldi klýbtar ornatylyp, qoldanysqa berildi. Al biyl 9 mádeniet úiiniń, 1 aýdandyq kitaphananyń qurylysy júrgizilip, 2 aýyldyq mádeniet úilerine kúrdeli jóndeý jumystary júrgizilýde.
Oblysta alǵash bolyp blokty modýldi klýbtyń biri Eskeldi aýdanynyń Qońyr aýylynda salynǵan bolatyn. Aýyl turǵyndary jańa nysannyń igiligin kórip otyrǵanyn rizashylyqpen aitady.
- Ózim aýyldyq mádeniet úiinde jumys istep, zeinetke shyqtym. Aýyldyq mádeniet úii uzaq ýaqyt kúrdeli jóndeý kórmegendikten, tóbesi qulap jaramsyz kúige túsken edi. On jyldan astam ýaqyt aýylda mádeniet úii bolǵan joq, mádeni sharalarǵa mekteptiń akty zalyn paidalandyq. Ótken jyly aýylymyzda jyly blokty-modýldi klýb ornatylyp, qoldanysqa berildi. Halyq dán riza. Qazir jańa ǵimaratta túrli úiirmeler jumys isteidi. Aýyl halqy aýyldyq mádeniet úiinde merekeler kezinde kontsert tamashalaidy, - dedi zeinetker Qanat Kúderbaev.
Bir atap óterligi, Uly Jeńistiń 80 jyldyǵyna orai Jetisý óńiriniń maidangerleri týraly «Urpaqqa uran bolǵan Uly Jeńis» atty jinaq shyǵaryldy. Sonymen qatar, Uly Otan soǵysy ardagerleri men qatysýshylaryna arnalǵan 112 eskertkishke aǵymdaǵy jóndeý, abattandyrý jumystary júrgizildi.
Jalpy oblysta 315 mádeniet, arhiv mekemeleri halyqqa qyzmet etedi.
