جەتىسۋ وبلىسى قۇرىلعاننان بەرى مادەنيەت، ارحيۆ سالاسىنىڭ شتات سانى 200 بىرلىككە ارتىپ، 2300 ادامنان استى، بيۋدجەتى 83%-عا ءوستى. ال سالانىڭ ينفراقۇرىلىمىن جاڭارتۋ 40%-عا جەتتى، دەپ حابارلايدى Dalanews.kz
وبلىس قۇرىلعاننان بەرگى ءۇش جىلدا وڭىردە ايتۋلى مادەني جاڭالىقتار مول بولدى. ماسەلەن تالدىقورعاندا ۇلى ابايعا ەسكەرتكىش، حالىق سۋرەتشىسى ءابىلحان قاستەيەۆتىڭ، حالىق ءارتيسى بيكەن ريموۆانىڭ جانە ەكى مارتە سوسياليستىك ەڭبەك ەرى نۇرمولدا الدابەرگەنوۆتىڭ ءبيۋستى قويىلدى. وسى جىلدار ىشىندە جەتىسۋ وبلىسىنىڭ فيلارمونياسىنا قازاقستاننىڭ حالىق ءارتىسى، انشى-كومپوزيتور دانەش راقىشيەۆتىڭ ەسىمى بەرىلىپ، ونەر ساڭلاعى تۇرعان تالدىقورعانداعى ۇيگە ەسكەرتكىش تاقتا ورناتىلدى. وبلىس تاريحىندا تۇڭعىش رەت ەسترادالىق-سيمفونيالىق وركەستر قۇرىلدى. كەربۇلاق اۋدانىندا شوقان ءۋاليحانوۆتىڭ «التىنەمەل» مەموريالدى كەشەنىنە كۇردەلى جوندەۋ جاسالىپ، ۇشتوبە قالاسىندا قاراتال اۋداندىق تاريحي-ولكەتانۋ مۋزەيى سالىندى.
سوڭعى ءۇش جىلدا وڭىردە 7 اۋىلدىق مادەنيەت ۇيىنە كۇردەلى جوندەۋ جۇمىستارى جۇرگىزىلدى، قاراتال اۋدانى كالپە، الاكول اۋدانى اقجار، ەسكەلدى اۋدانى قاراتال اۋىلىندا مادەنيەت ۇيلەرى سالىندى. سونىمەن قاتار 8 اۋىلدا ەسكەلدى اۋدانى قوڭىر، جالعىزاعاش، اقىن سارا اۋىلدارىندا، قاراتال اۋدانى ەسكەلدى، جاڭاتالاپ اۋىلدارىندا، كەربۇلاق اۋدانى قويانكوز، شۇبار اۋىلىندا، كوكسۋ اۋدانىنىڭ مۇسابەك اۋىلىندا بلوكتى-مودۋلدى كلۋبتار ورناتىلىپ، قولدانىسقا بەرىلدى. ال بيىل 9 مادەنيەت ءۇيىنىڭ، 1 اۋداندىق كىتاپحانانىڭ قۇرىلىسى جۇرگىزىلىپ، 2 اۋىلدىق مادەنيەت ۇيلەرىنە كۇردەلى جوندەۋ جۇمىستارى جۇرگىزىلۋدە.
وبلىستا العاش بولىپ بلوكتى ءمودۋلدى كلۋبتىڭ ءبىرى ەسكەلدى اۋدانىنىڭ قوڭىر اۋىلىندا سالىنعان بولاتىن. اۋىل تۇرعىندارى جاڭا نىساننىڭ يگىلىگىن كورىپ وتىرعانىن ريزاشىلىقپەن ايتادى.
- ءوزىم اۋىلدىق مادەنيەت ۇيىندە جۇمىس ىستەپ، زەينەتكە شىقتىم. اۋىلدىق مادەنيەت ءۇيى ۇزاق ۋاقىت كۇردەلى جوندەۋ كورمەگەندىكتەن، توبەسى قۇلاپ جارامسىز كۇيگە تۇسكەن ەدى. ون جىلدان استام ۋاقىت اۋىلدا مادەنيەت ءۇيى بولعان جوق، مادەني شارالارعا مەكتەپتىڭ اكتى زالىن پايدالاندىق. وتكەن جىلى اۋىلىمىزدا جىلى بلوكتى-مودۋلدى كلۋب ورناتىلىپ، قولدانىسقا بەرىلدى. حالىق ءدان ريزا. ءقازىر جاڭا عيماراتتا ءتۇرلى ۇيىرمەلەر جۇمىس ىستەيدى. اۋىل حالقى اۋىلدىق مادەنيەت ۇيىندە مەرەكەلەر كەزىندە كونسەرت تاماشالايدى، - دەدى زەينەتكەر قانات كۇدەربايەۆ.
ءبىر اتاپ وتەرلىگى، ۇلى جەڭىستىڭ 80 جىلدىعىنا وراي جەتىسۋ ءوڭىرىنىڭ مايدانگەرلەرى تۋرالى «ۇرپاققا ۇران بولعان ۇلى جەڭىس» اتتى جيناق شىعارىلدى. سونىمەن قاتار، ۇلى وتان سوعىسى ارداگەرلەرى مەن قاتىسۋشىلارىنا ارنالعان 112 ەسكەرتكىشكە اعىمداعى جوندەۋ، اباتتاندىرۋ جۇمىستارى جۇرگىزىلدى.
جالپى وبلىستا 315 مادەنيەت، ارحيۆ مەكەمەلەرى حالىققا قىزمەت ەتەدى.
