Jetisý oblysynda jylytý maýsymy bastalǵanǵa qaramastan áleýmettik nysandar jylýǵa qosyla bastady. Dál qazir barlyǵy 47 áleýmettik nysanǵa jylý berildi. Olardyń arasynda Alakól, Panfilov aýdandary men Tekeli qalasyndaǵy 32 mektep, 8 balabaqsha, 7 aýrýhana bar. Qalǵan aýdandar men qalalar táýliktik jylý temperatýrasyna qarai 4 qazannan 15 qazanǵa deiin jylýǵa qosylady, dep habarlaidy Dalanews.kz.
Oblystyq energetika jáne turǵyn úi-kommýnaldyq sharýashylyq basqarmasy taratqan málimetke qaraǵanda, jylytý maýsymyna 1697 kópqabatty úi men 1314 biýdjettik sala nysandary tolyǵymen daiyn. Al biýdjettik sala nysandaryn jylýmen qamtamasyz etetin kásiporyndar qajetti jaǵar otynmen tolyq qamtamasyz etilgen.
- Osy aptanyń basynan bastap, birqatar aýdandar men qalalardaǵy áleýmettik nysandardy jylýǵa qosý týraly sheshim qabyldandy. Budan ary 4 qazannan 15 qazanǵa deiin syrttaǵy aýa temperatýrasy 5 táýlik boiy +8 gradýstan tómen bolǵan jaǵdaida turǵyn úilerge de jylýdy birtindep beremiz. Sonymen qatar, Taldyqorǵan qalasyndaǵy ortalyq jylytý «Basqýat» qazandyǵyn iske qosý jumystary júrgizilýde. Odan bólek qalada 9 kvartaldyq qazandyq bar. Sondai-aq, qýaty 49 GKall bolatyn jańa qazandyqtyń qurylysy júrip jatyr. Ony kelesi jylytý maýsymyna deiin iske qosý josparlanǵan. Buǵan qosa jeke investitsiianyń kómegimen «Basqýat» qazandyǵynyń bazasynda elektrlik qýaty 84 MVt jáne jylytý qýaty saǵatyna 70 Gkall bolatyn bý-gaz stansysy salynýda. Bul joba III kezeńnen turady. I kezeńi aiaqtaldy, II kezeńi biyl jyl sońyna deiin bitýi tiis. Tolyq aiaqtalýy kelesi jylǵa mejelengen. Osylaisha osyndai eki aýqymdy jobanyń arqasynda «Basqýat» qazandyǵyna túsetin salmaq 30%-ǵa azaiady, - deidi Jetisý oblystyq energetika jáne turǵyn úi-kommýnaldyq sharýashylyq basqarmasynyń basshysy Aidos Beketaev.
Jalpy Jetisý oblysynda 23 qazandyq, 1 TETs, 393 kilometr jylý qubyry, 3 935 kilometr sý qubyry, 628 kilometr kárizdik qubyr, 13,8 myń kilometr elektr jelileri jáne 2644 transformatorlyq stansylar bar. 2025-2026 jyldardaǵy jylytý maýsymyna daiyndyq aiasynda 2 týrbinalyq, 35 qazandyq, 17,3 kilometr jylý qubyryna, 1,3 myń kilometr elektr jelilerine jáne 206 transformatorlyq stansyǵa jóndeý jumystary júrgizildi.
Kómirmen qamtamasyz etýge kelsek, Jetisý oblysyndaǵy jurtshylyqqa jylyna 397 myń tonna qatty otyn qajet. Búgingi kúni 199,9 myń tonna kómir alyndy nemese jospar 50%-ǵa oryndaldy, qoimalardaǵy qaldyq 20,6 myń tonnaǵa teń. Aimaqqa táýligine 22 vagon nemese 1 518 tonna kómir jetkiziledi.
