Jetisý oblysyna QHR Shyńjań – Uiǵyr avtonomiialy raionynyń Ile-Qazaq avtonomiialy okrýgi partkomynyń hatshysy Ian Siýli bastaǵan delegatsiia arnaiy keldi. Qytailyq tarappen kezdesýge oblys ákimi Beibit Isabaevpen birge onyń orynbasarlary, birqatar basqarma basshylary, «Qorǵas – Shyǵys qaqpasy» arnaiy ekonomikalyq aimaǵynyń basshylyǵy qatysty.
Jiynda oblys ákimi aldymen resmi qonaqtarǵa jyly lebizin bildirip, olarǵa oblystyń strategiialyq baǵyttary men investitsiialyq múmkindikteri jaily baiandap berdi.
- Bizdiń jer janaty Jetisýǵa qosh keldińizder! Ózderińizben búgin júzdesip otyrǵanymyzǵa qýanyshtymyn jáne kelgenderińizge alǵysymdy bildiremin. Búgingi kezdesý eki taraptyń bailanystaryn odan ári jetildirýge oń yqpal etedi dep oilaimyn. Jetisý oblysy - investitsiialyq múmkindigi zor aimaq. Óńirde 5 strategiialyq baǵyt boiynsha, atap aitqanda agroónerkásip keshenin damytý, kólik jáne logistika, týrizm, balamaly energetika jáne ónerkásip, onyń ishinde jer qoinaýyn paidalanýdy damytý salalaryna jańa investorlar tartý, óńirdiń investitsiialyq áleýetin arttyrý jumystaryn júrgizip kelemiz, - dep atap ótken Beibit Isabaev osy salalardyń árqaisysyna qysqasha toqtalyp ótti.
Sonyń ishinde «Qorǵas» shekara mańy aimaǵynyń múmkindikterine erekshe nazar aýdardy. Oblys basshysy óz sózinde qytailyq kompaniialardy óńirimizdiń áleýetti salalaryna, iaǵni óńir ekonomikasyna investitsiia salýǵa shaqyrdy. Mundai investitsiianyń eki jaqty yntymaqtastyq aiasyn keńeitýdegi mańyzy eleýli bolmaq.
Óz kezeginde Ile-Qazaq avtonomiialy okrýgi partkomynyń hatshysy Ian Siýli Jetisý oblysynyń aýyl sharýashylyǵyna, sonyń ishinde tamshylatyp sýarý tehnologiiasyn engizýge, jylyjai sharýashylyǵyn damytýǵa úles qosýǵa nietti ekendikterin aitty. Sol siiaqty ónerkásip, týrizm salalarynda da birlesip kóp jumys jasaýǵa bolatynyna toqtaldy. Jáne shekaralyq beketterdiń ótkizý qýatyn arttyrýdyń múmkindikterin qarastyrý máselesin de atap ótti. Qoryta kelgende munyń barlyǵy eki óńirdiń ekonomikasyn damytýǵa yqpal etetin bastamalar ekenin jetkizdi.
Sonymen birge jetisýlyq delegatsiianyń osy jyldyń mamyrynda Qytaiǵa barǵan saparynda Qorǵas qalasynda ótkizilgen birlesken jiynnyń hattamasyna da qol qoiyldy. Jáne de jiyn sońynda eki taraptyń ózara yntymaqtastyq bailanystarynyń naqty qadamdaryn talqylaityn jumys toby qurylyp, onyń quramyn bekitildi. Endi eki jaqty qarym-qatynasty nyǵaitýǵa baǵyttalǵan naqty kompaniialar tarapynan qolǵa alynatyn naqty jobalardy iske asyrýdy osy jumys toby úilestiretin bolady.
Jalpy Ile-Qazaq avtonomiialy oblysynyń delegatsiiasy kesheden beri «Nur joly» ótkizý pýnktiniń, «Qorǵas» AEA qyzmetimen, Panfilov aýdanynyń aýyl sharýashylyǵynyń aiaq alysymen tanysyp kórgenin atap ótý kerek.
