Aýdan ákimi Eldos Ahmetov pen Jetisý oblysy boiynsha Tótenshe jaǵdailar departamenti basshysynyń mindetin ýaqytsha atqarýshy Qanat Altynbekov tótenshe jaǵdaidyń saldaryn joiý sharalary týraly baiandady.
Olardyń aitýynsha, Eshkiólmes aýylynyń Sheremetev, Chkalov, Kýtýzov, Ýshakov jáne Áiteke bi kósheleri men Abai aýylynyń Baqtybai jáne Jangeldi kóshelerinde 120 aýlany jańbyr sýy basqan, sonyń ishinde 2 eldi mekendegi 21 turǵyn úige laily sý kirgen.
Qalyptasqan tótenshe jaǵdaidy joiý sheńberinde atalǵan eki aýylda Qýsaq ózenine jańbyr sýlaryn burý jumystary júrgizildi.
Sý basqan 43 aýladan 3456 tekshe metr sý soryldy, uzyndyǵy 450 metr aryq júiesine mehanikalandyrylǵan tazartý júrgizildi, 38 aýla balshyq massasynan tazartyldy. Úiindi bógetin salý úshin 40 tonna topyraq ákelinip, 1500 qap daiyndaldy, 1 tonna mólsherinde dizel otyny jáne 1 tonna mólsherinde AI-92 markaly benzin qory daiyndaldy.
Qazir sý tasqyny saldaryn joiýǵa barlyǵy 284 adam, 44 birlik tehnika jáne 12 motopompa jumyldyryldy, sonyń ishinde TJD, «Qazseldenqorǵaý» MM, JAO, PD, JJMK, áskeri bólimderdiń kúshi men quraldary bar.
Aýlalardy balshyqtan tazartý jumystary búgin de jalǵastyrylyp, sý tasqynynyń qaitalanýyn boldyrmaý úshin úiindi bógetterin jasaý josparlanǵan.
Oblys ákimi Beibit Isabaev sý basqan aýlalar men turǵyn úilerge keltirilgen materialdyq zalaldy anyqtaý jumystaryn komissiia bir apta ishinde túbegeii aiaqtap, qorytyndysyn shyǵarýy kerektigin tapsyrdy.
– Bul jaǵdai bizge sabaq bolýy kerek. Aýyldyń ishinen ótetin kanaldardyń syiymdylyǵy az. Taý betkeiinen aqqan sýdy sýarý kanaldaryna burýdy retke keltirýimiz kerek. Múmkin 1-2 metrlik shaǵyn damba jasaý kerek shyǵar. Osy máselege kúzge taman egindi jinap bitkennen keiin túbegeili kirisińizder. Qazir júrip ótken sýdan keiin kanal, aryqtardyń bári basylyp qaldy, solardyń arnasyn ashyp tazalańyzdar. Biz tótenshe jaǵdaidyń saldaryn joiýmen ǵana shektelmei, mundai jaǵdaidyń aldyn alý máselesin de atqarýymyz kerek, – dedi Beibit Isabaev.
Qazir Eskeldi aýdanynyń ákimi jergilikti aýqymda tótenshe jaǵdai jariialaý týraly máseleni qarastyryp jatyr.
Shtabtan ary oblys ákimi sý basqan turǵyn úilerdi aralap, turǵyndarmen tildesti.
Eske salsaq, 12 tamyz kúni ainalasy eki saǵattyń ishinde jaýyn sýynyń ailyq normasynyń 70%-y túsken. Sol sebepti taý betkeiinen jinalǵan sý aǵyp, Qýsaq ózeniniń deńgeii kóterilgen edi. Sonyń saldarynan qoldanystaǵy sý burý kanaly tolyp, eldi mekenderdegi turǵyn úilerge kirgen bolatyn.
