Jetisý jastary «Orbulaq shaiqasyn» ulyqtady
Memleket basshysy Nursultan Nazarbaevtyń «Bolashaqqa baǵdar: rýhani jańǵyrý» atty maqalasynyń «Týǵan jer» baǵdarlamasynda aitylǵandai, týǵan jerge súiispenshilik týǵan tarihyńdy tereńnen bilýden bastalatyny barshaǵa aian. Elimizdiń árbir taýy men ózeni, saiy men qyry – tunyp turǵan tarih. Soǵan sai sol ólkede halqyna pana bola bilgen, el esinde qalǵan birtýar perzentter bar. Al olar jaiynda jas urpaqtyń bilgeni abzal. Osyǵan orai Orbulaq shaiqasyndaǵy Uly jeńistiń 375 jyldyǵyna jáne «Orbulaq» qoǵamdyq, ádebi-tanymdyq gazetine 5 jyl tolýyna orai mektep oqýshylary arasynda oblystyq «Orbulaq júregimde» baiqaýy arnaiy uiymdastyryldy.
Óz kezeginde sharany uiymdastyrǵan «Orbulaq» qoǵamdyq, ádebi-tanymdyq gazetiniń shyǵarýshysy Erǵazy Manapuly: «Balalardyń shyǵarmashylyq qabiletterin shyńdaý arqyly ulttyq, azamattyq, patriottyq sezimge baýlýdy kózdep otyrymyz. Búgingidei tehnologiialyq igilikter alǵa shyqqan zamanda mektep oqýshylarynyń Otandy súiýge, qurmetteýge úiretý úshin osyndai tarihi máni zor sharalardy uiymdastyryp turý óte qajet dep esepteimin», – dedi.
Almaty oblysynyń mektepterinen jinalǵan ónerli balalar baiqaý barysynda shyǵarma, músháira, beineleý óneri jáne drama boiynsha synǵa túsip, óz ónerlerin ortaǵa saldy.
Máselen, músháira baiqaýynda balalar ózderiniń «Orbulaq» shaiqasyna arnaǵan jalyndy jyrlaryn oqyp, batyrlardyń erligin jyrlady. Óz kezeginde ádilqazylar alqasy jas aqyndardyń óleń joldaryndaǵy uiqas pen kórkemdik-estetikalyq qyrlaryn joǵary baǵalaǵanyn aita ketýimiz kerek. Músháiranyń qorytyndysy boiynsha Shapyrashty Qarasai batyr atyndaǵy bas júldeni Tekeliden kelgen Jansaia Tileýhan ielense, Qańly Sarbuqa atyndaǵy 1-oryndy Orbulaqtyń órinde týyp-ósken Panfilov aýdanynyń týmasy Alýa Asqar qanjyǵasyna bailady. Al Bólek batyr atyndaǵy 2-oryn taldyqorǵandyq Zeńgir Rahatqyzyna buiyrdy.
Shyǵarma jazyp, qarasóz boiynsha synǵa túskender arasynda Salqam Jáńgir batyr atyndaǵy bas júldeni Panfilov aýdanynyń úkilep qosqan úmiti Jaina Toqtarbai ielendi. Arǵyn Aǵyntai batyr atyndaǵy 1-oryn
Talǵardan kelgen Arýjan Andasovaǵa buiyrdy.
«Beineleý» atalymynda Qazaqstannyń halyq sýretshisi Ábilhan Qasteev atyndaǵy bas júldege Panfilov aýdanynyń óreni Dinmuhamed Aidar ie bolsa, Tórtqara Jiembet batyr atyndaǵy 1-oryn Uiǵyr aýdanynan at terletip kelgen Shahrýh Bahtahýnovqa buiyrdy.
Osylaisha, eki kúnge sozylǵan baiqaý barysynda Jetisýdyń túkpir-túkpirinen jinalǵan oqýshylar «Orbulaq» shaiqasynyń máni men mazmuny jaiynda mol aqparat jinap, oi-órisin tolyqtyryp qaitty.
Baqytgúl SULTANQYZY,
Áýlieaǵash orta mektebi tarih pániniń muǵalimi
Almaty oblysy, Panfilov aýdany.
