Ústel tennisi – álemde eń kóp taraǵan qyzyqty, jan-jaqty jáne ár jastaǵy adamdar úshin qoljetimdi sport túri. Qimyl-qozǵalystyń tezdigi, shabýyldyń shapshańdyǵy men tehnikalyq qiystyrýlardyń kenettiligimen erekshelenetin, kópshiliktiń qyzyǵýshylyǵyn ózine aýdara bilgen sport túrin jastar arasynda keńinen nasihattap, Prezident Joldaýynda aitylǵan buqaralyq sportty damytý, salaýatty ómir saltyn ustanýshylardyń qataryn arttyrý maqsatynda QR meditsina ǵylymdarynyń kandidaty, meditsina salasynyń úzdigi, irilengen «Maqtaaral aýdanynyń Qurmetti azamaty», Jetisai joǵary meditsina kolledjiniń irgetasyn qalaýshy, kóptegen dárigerlerdiń ulaǵatty ustazy bolǵan Laýiia Toqbergenuly men Lais Toqbergenov eske alýǵa arnalǵan oblystyq týrnir ótti.
Qyzylorda oblysy men Túrkistan, Shymkent, Taraz, Almaty qalalarynan, Saryaǵash, Sairam, Keles, Qazyǵurt, Otyrar, Túlkibas, Shardara, Maqtaaral men Jetisai aýdandarynan kelgen 150 sportshy ózara baq synasqan týrnirdiń ashylý saltanatyna Jetisai aýdany ákiminiń orynbasary Turyshbek Elshibaev pen «AMANAT» partiiasy Jetisai aýdandyq filialynyń atqarýshy hatshysy Asqar Qainazarov, sport pen meditsina salasynyń ardagerleri, Laýiia Toqbergenulynyń otbasy men týǵan-týystary, shákirtteri qatysyp, sáttilik tiledi.
Jas erekshelikterine qarai 18-39, 40-54 jáne +55 jas aralyǵyndaǵy sportshylar birneshe topqa bólinip, ózara myqtylardy anyqtady.
– Búgingi jarysqa qatysýshylardyń daiyndyqtary óte joǵary. Bári de jeńis tuǵyrynan kórinýge laiyq. Statýsy oblystyq degenimiz bolmasa qatysýshylardyń arasynda oblystyq, respýblikalyq jáne halyqaralyq túrli deńgeidegi jarystarda júldeger atanyp júrgen 40-tam astam chempion bar, – deidi «Jetisai sport klýby» mekemesiniń direktory Talashan Bitóreev.
Alǵash ret 2002 jyly bastaý alyp, biyl XVIII ret ótkizilip otyrǵan dástúrli týrnirdiń qorytyndysy boiynsha 18-39 jas aralyǵyndaǵy sportshylar arasynda III oryndy jetisailyq Mýhambet Áli Dáýlet ielense, II oryn túlkibastyq Janarys Tańsyqtyń, I oryn shymkenttik Nurlan Abatovtyń qanjyǵasyna bailandy.
Al, 40-54 jas aralyǵynda sportshylardan Qyzylorda oblysynyń sportshylary Medetbek Ermahanov III orynǵa, Dáýletiiar Mashrapov II orynǵa taban tirese, Shymkentten kelgen Ermek Ekibaev júldeli I oryndy jeńip aldy.
55 jáne odan joǵary jastaǵy qatysýshylar arasynda shymkenttik qatysýshy Vadim Shýgaev III oryndy, túrkistandyq Nartai Tólbasiev II oryndy jáne jetisailyq Marat Abishev I oryndy ielendi.
Odan bólek, sairamdyq Toimurat Eshimov, saryaǵashtyq Súndet Muqanov, qyzylordalyq Mahanbet Asylbekov pen shymkenttik Samat Shaketov «Úzdik oiynshy» atansa, shymkenttik Nurjan Taldahmetov, Qýatbek Telhoziev, Ǵabit Keńes, Nikolai Kim, túlkibastyq Eskendir Baimusaev «Ardager oiynshy» nominatsiiasyna, jetisailyq Qanybek Qarashaev pen shymkenttik Baýyrjan Janbýrshin «Sheber oiynshy» nominatsiiasyna ie boldy.
Jarys sońynda barlyq jeńimpazdar men túrli nominatsiia iegerleri uiymdastyrýshylardyń kýbok-medaldarymen, diplomdarmen jáne qarjylai syilyqtarymen marapattaldy.
