Bıyl Qazaqstan polısıasynyń qurylǵanyna 32 jyl tolyp tur. Osy rette Jetisaı qalasyndaǵy «M.Gorkıı» atyndaǵy №1 mektep-gımnazıasynda el táýelsizdiginiń alǵashqy jyldarynda beıbit turǵyndardyń tynyshtyǵyn kúzetýde eren eńbek etip, İshki İster organdarynda qyzmet atqarý kezinde qaza tapqan polısıa polkovnıgi Serikbaev Ábdiǵappar Berdiqululynyń esimine berilgen «Polısıa synyby» ashyldy, – dep habarlaıdy Dalanews.kz Túrkistan oblysy ákiminiń baspasóz qyzmetine silteme jasap.
Synyptyń ashylý saltanatyna Jetisaı aýdanynyń ákimi Serik Mamytov pen Túrkistan oblysy polısıa depertamenti tárbıe jáne kadr jumysy basqarmasynyń bastyǵy, polısıa polkovnıgi Maqsat Asqarov, aýdandyq bilim bóliminiń basshysynyń mindetin ýaqytsha atqarýshy Adaıbekov Shohan Joldasbekuly men oblystyq İİO jáne UU ardagerler keńesiniń tóraǵasy Janádil Qumarbekov, aýdandyq polısıa bóliminiń bastyǵy polısıa polkovnıgi Saparbekov Adılbek Ábdiraımuly men aýdandyq máslıhat apparatynyń basshysy Saken Dosymov, aýdandyq ardagerler keńesiniń tóraǵasy Aıtbaı Mahanbet, Ábdiǵappar Serikbaevtyń otbasy men aǵaıyn-týystary qatysty.
«Otandy súıý – óz eline adal berilgendik. Oǵan qaltqysyz qyzmet etý – onyń múddeleri men qaýipsizdigin qorǵaý. Otandy qorǵaý isine ardagerlerimizdiń úlgisimen árqashan daıyn bolyp, namys týyn joǵary ustaý barshamyzdyń mindetimiz. Tek qana ońtústik óńirine ǵana emes kúlli respýblıkaǵa, qala berdi alys-jaqyn shet elderge QAPASH esimimen tanylǵan Ábdiǵappar Berdiqululynyń esimimen atalatyn synypta bilim alatyn oqýshylardyń da naǵyz eljandy, isker, jańashyl bolyp qalyptasatynyna kúmánim joq» degen aýdan basshysy jas polıseılerge kýálik tapsyrdy.
