Jer komissiiasynan shý shyqty
Búgingi otyrystyń yqsham túrde ótkenin erkeshe atap ótken jón. Komissiia músheleri buǵan deiin aitylǵan máselelerdi qaita qozǵamai, naqty usynystardy aitýǵa biraýyzdan kelisti. Ol úshin kún tártibi bektilip, bir-aq másele - qazaqstandyqtarǵa jerdi jalǵa berý máselesi talqyǵa salyndy. Al sheteldikterge jerdi jalǵa berý jáne qazaqstandyqtarǵa jerdi jeke menshikke satý máselesi keiinge shegerildi. Komissiia tóraǵasy Asqar Myrzahmetovtyń aitýynsha, atalǵan eki másele boiynsha maratorii jariialanǵan. Oǵan qosa, barlyq óńirlerdi aralap, halyqtyń pikirin bilip alǵan durys. Sonda ǵana naqty sheshimdi shyǵarýǵa bolady. Al qazaqstandyqtarǵa jerdi jalǵa berý máselesi anyq. Sondyqtan ony komissiianyń búgingi otyrysyna shyǵarý týraly sheshim shyǵaryldy. Komissiia músheleri atalǵan máseleni úsh saǵattyń ishinde talqylap shyqty.
Komissiia tóraǵasy otyrysty qorytyndylap jatqanda Jalpyulttyq sotsial-demokratiialyq partiiasynyń ókili Serikbai Álibaev qaita-qaita sóz surady. Otyrystyń basynda oǵan sózdiń berilgene qaramastan ol tutas bir baiandama jasaimyn dep shyqty. A.Myrzahmetov onyń komissiia jumysyna jańadan qosylyp jatqanyn, ol aitqan máselelerdiń bári buǵan deiin ótken otyrystarda kóterilgenin jetkizse de, S.Álibaev boi bermedi. Tipti, komissiianyń keibir múshelerine shúiligip, depýtattarmen sózge de kelip qaldy.
Otyrys sońynda taǵy sóz alǵan S.Álibaevty depýtat Baqytbek Smaǵul toqtatyp:
– Serikbai aǵa, tyńdańyzshy.
– Aǵa? kim ol?
– Bul men – Baqytbek Smaǵul. Sizdi biz baǵanadan beri tyńdap otyrmyz. Birese komissiia jaqsy jumys istep jatyr deisiz, birese komissiia túkke kerek emes deisiz. Siz jazbasha bir usynys berseńizshi?
– Ái, siz tyńdańyz!
– Men «ái» emespin. Siz depýtat bolǵan kezde biz tyńdadyq. Endi, siz tyńdańyz!
– Men ózim bilemin, qalqam. Maǵan bóget jasama, otyr! Depýtattyq Parlamentte otyrsyń, sonda otyryp, sonda sóile! Sonda talqyla!
– Siz myna jaqta otyrǵan basqa da adamdarmen sanasyńyz, baǵana kirgen boidan osyny qaita-qaita aityp otyrsyz. Ol másele talai ret talqylanyp ketken, siz siiaqty adamdarmen.
– Meni jyndandyrmańyz! – dep jekip tastady S.Álibaev.
– Unamasa, basqa jerge baryńyz!
– Siz kimsiz, men de osy komissiianyń múshesimin!
– Onda naqty usynysyńyzdy aityńyz! – degen B.Smaǵulǵa komissiia tóraǵasy basý aityp, Jalpyulttyq sotsial-demokratiialyq partiiasynyń ókili Serikbai Álibaevty tolyǵymen tyńdap shyǵýdy uiǵardy.
Shyny kerek, eks-depýtat Álibaev qoldanystaǵy zańdy túsindirip, jer salasyndaǵy jemqorlyqqa qatysty jalpy aqparattan basqa eshqandai usynys jasai almady. Osydan kiein komissiia tóraǵasy oǵan óz keńesin berdi.
«Siz toqeterin aityńyz. Eger osy kúnge deiin bolǵan otyrystarǵa sizdiń partiiańyzdyń birde-bir ókili qatyspasa, onda kiná ózińizden. Sizge qatysýǵa quqyq berdik qoi. Nege kelip qatyspadyńyz? Siz aityp otyrǵan máselelerdiń bári talqylandy», – dedi A.Myrzahmetov.
