«Jańa Qazaqstan» qurýda Memleket basshysy ilkimidi isterge qadam basty. Endigi jerde «Jemqorlardyń zańsyz tapqan qarjysy olar sottalǵan soń memleketke ótip, túgeldei mektep qurylysyna jumsalýǵa tiis. Úkimet osy bastamany zań turǵysynan rásimdeý týraly sheshim qabyldaýy kerek» dep atap ótti Prezident óz Joldaýynda.
Osy rette elimizde apatty jaǵdaidaǵy ári úsh aýysymdy mektepterdiń barlyǵy belgili.
Al Prezident: «Orta bilimniń sapasy – tabysty ult bolýdyń taǵy bir mańyzdy sharty. Árbir oqýshynyń bilim alyp, jan-jaqty damýy úshin qolaily jaǵdai jasalýǵa tiis. Sol úshin «Jaily mektep» ulttyq jobasy qolǵa alyndy. Biz 2025 jylǵa deiin 800 myń balanyń zamanaýi mektepte oqýyna jaǵdai jasaimyz.
Osylaisha, apatty jaǵdaidaǵy jáne úsh aýysymmen oqityn mektep máselesin tolyq sheshemiz. Bul aýyl jáne qala mektepteriniń aiyrmashylyǵyn edáýir azaitady. Jalpy, mektep salý Úkimet jáne ákimdikter úshin basty mindettiń biri bolýy kerek», – degendi basa aitty.
Dalanews.kz osy oraida belgili saiasattanýshy Erlan Aqyljanulynyń pikirin bilgen edi.
«Osy kúnge deiin jemqorlyq faktisi boiynsha isti bolǵandardyń qarjysy qaida ketip jatqanyn bilmedik. Endi Prezident Joldaýda aitqan dúnieler iske asa bastasa, kózge kórinip, kópshiliktiń kókeiinde júrgen kúdik seiiler edi.
Sońǵy jyldary ásirese Toqaev prezidenttikke kelgeli beri, sybailas jemqorlyqpen ustalǵandar kóbeidi.
Ásirese Qańtardan keiin iri-iri shortandardyń aýǵa túsip, olardyń iri kóleminde qarjy jymqyrǵany belgili bolyp, áshkerelendi. Endi sol mol qarjynyń naqty jumsalatyn kózi belgili boldy. Biraq bul birden mektep jetispeýshilikti azaitady degen sóz emes. Muny bilim ordalarynyń sanyn kóbeitýdiń bir instrýmenti retinde qarastyrǵan jón», – deidi Erlan myrza.
Joldaýda 2025 jylǵa deiin elimizdegi 800 myń balanyń zamanaýi mektepte oqýyna jaǵdai jasalý kerektigi aityldy. Bul da qazirgi tańdaǵy ásirese shalǵaidaǵy boiaýy sińip, qabyrǵasy tozǵan bilim ordalarynyń ornyna, oqýshylar sońǵy úlgidegi mektepterde bilim alady degen sóz.
Parlament Májilisiniń depýtaty Maqpal Mysa hanym bilim berýge qatysty tyń ári serpindi usynystardy jaza kele, 800 myń balany jańa mektepke oranalastyrý úlken áleýmettik máseleni sheshkeli otyr degen oi aitty.
«Memlekettiń kúshi - sapaly, saýatty azamattyq qoǵamnyń qalyptasýyna tikelei bailanysty ekenin eskersek, prezident usynǵan kontseptsiiany jan-jaqty talqylap, jonyp, eń tiimdi túrde júzege asyrý asa qajet. Bul turǵyda, joldaýda aitylǵan basty messedjtiń biri - memleket múddesin jeke múddesinen joǵary qoia bilý ustanymyn Prezidenttiń óz basynan bastap, astyn syza kórsetýi mańyzdy úndeý», – dep atap ótti ol.
«Demek, Joldaýdyń qoldaýyn emes, sapaly ári saýatty iske asyrý mańyzdy bolmaq. Oligarhtar, zańsyz ári túrli joldarmen baiyǵandar, biýdjetke qol salǵandar jaýapqa tartylatyn kez keldi», – deidi zańger Bolat Syzdyq. «Qazaqstannyń bailyǵy qaida ketpedi. Shetke ketti. Endi sol qarjylardyń edáýir bóligi elge qaitarylatyn bolsa, jańa mektepterdiń boi kóterýine ǵana emes, basqa da áleýmettik, ekonomikalyq máselelerdi sheshýge qol jetkizer edik. Árine, bul jerde aitý bir basqa, endi ony iske asyrý, quqyq qorǵaý organdarynyń qyzmetine bailanysty. Alaida dál sol qarjyǵa mektep salý máselesi qarap qalǵan joq. Degenmen tárkilengen múliktiń osy baǵytta jumsalýy quptarlyq jait», – deidi Bolat Keneluly.
El damýynyń eń basty jaýy - paraqorlyqpen kúresti kúsheitý qajet. Bul turǵyda áli de kóp ózgerister men reformalar suranyp turǵany anyq.
