Qazaqstanda jemqorlardan tárkilengen qarjyǵa taǵy 28 mektep salynady, dep habaralidy Dalanews.kz.
Qazaqstanda Bilim berý infraqurylymyn qoldaý qory esebinen 22 myń balaǵa arnalǵan taǵy 28 mekteptiń qurylysy josparlanyp otyr. Bul týraly Oqý-aǵartý ministrligi málimdedi.
Atalǵan qor sybailas jemqorlyqpen kúres nátijesinde tárkilengen qarajat esebinen tolyqtyrylady. Onyń basty maqsaty – mektepterdegi oryn tapshylyǵyn azaitý, apatty jaǵdaidaǵy ǵimarattardy joiý jáne bilim berý infraqurylymyn damytý.
Ministrliktiń infraqurylymdy damytý departamentiniń basqarma basshysy Jaiyq Mahsýtovtyń aitýynsha, qazirdiń ózinde 74,4 myń oqýshyǵa arnalǵan 61 mektep paidalanýǵa berilgen, onyń 29-y aýyldyq jerlerde ornalasqan. 2024 jyly 25 mektep boi kóterdi, olardyń basym bóligi Astana, sondai-aq Mańǵystaý, Almaty jáne Jambyl oblystarynda salynǵan. Jalpy, qor qarajaty esebinen 100 myńnan astam oqýshyǵa arnalǵan 89 mektep turǵyzyldy.
Aita keteiik, buǵan deiin Antikor ókili Daniiar Bigaidarov para úshin sottalǵandardyń tizimi antikor bazasynda jariialanatynyn málimdegen edi.
Aitýynsha, bul jobanyń profilaktikalyq mańyzy zor. Sebebi ár azamat bireýdiń jibergen qatesinen sabaq alady.
“Qazirgi ýaqytta zańnamalyq initsiativa birinshi qaralymnan ótti. Ashyq tizimdi engizý baqylaýdy arttyrýdyń tiimdi quraly. Bul tizim joba boiynsha Antikor portalynda jariialanýy tiis. Eger zań qabyldansa, onyń profilaktikalyq mańyzy zor. Óitkeni elimizdiń árbir azamaty jemqorlyqpen ustalyp, sottalǵan kisilerdi ashyq túrde kóre alady. Profilaktikalyq mańyzy zor dep aitýymnyń sebebi de — osy. Bul basqa azamattardyń osy tizimge qosylýdan aýlaq bolýyna áser etedi”, — dedi ol.
Eske salaiyq, buǵan deiin Qazaqstanda jemqorlardyń tizimi ashyq túrde jariialanýy múmkin ekeni aitylǵan edi.
Sybailas jemqorlyqqa qarsy is-qimyl agenttigi tóraǵasynyń birinshi orynbasary Ulan Sarqulovtyń málimdeýinshe, sybailas jemqorlyqqa qarsy jańa zań qabyldanǵan jaǵdaida, jemqorlyq úshin sottalǵandardyń tizimi ashyq túrde jariialanbaq.
Jańa tizilim sybailas jemqorlyqqa qarsy profilaktikalyq shara retinde engiziledi.
Tizilimge aýyr jáne asa aýyr jemqorlyq qylmystary úshin sottalǵan adamdardyń esimi engiziledi. Bul protsess sottyń zańdy kúshine engen úkimi negizinde júzege asyrylady. Eger adam aqtaý úkimin alsa nemese onyń sottylyǵy joiylsa, onyń aty-jóni tizimnen alynyp tastalady.
Tizilimdi Sybailas jemqorlyqqa qarsy is-qimyl agenttigi júrgizedi jáne ol vedomstvonyń resmi saitynda ashyq túrde qoljetimdi bolady.
