Úkimet jekemenshik mektepterdegi aýditorlyq tekseristiń aldyn ala qorytyndysyn jariialady, dep habarlaidy Dalanews.kz.
Premer-ministr Oljas Bektenov qarjy ministri Mádi Takievtiń jekemenshik mektepter týraly baiandamasyn tyńdady.
Qarjy ministrliginiń málimdeýinshe, jekemenshik mektepter sany 2020 jylǵy 203-ten 2025 jyly 878-ge deiin artqan, al oqýshylar sany bes jyl ishinde alty esege, iaǵni 53 myńnan 322 myń balaǵa deiin ósken. Sondai-aq, bul baǵyt boiynsha biýdjet shyǵyny 2020 jylǵy deńgeiden (13,3 mlrd teńge) 20 ese asyp, 248 mlrd teńgege jetken.
"2025 jyldyń sońyna deiin jekemenshik mektepterdi qarjylandyrý júiesi bytyrańqy ári baqylaýsyz bolǵany, bul derekter burmalanýyna jáne biýdjet qarajatyn teris paidalanýǵa jaǵdai týǵyzǵany atap ótildi", - dep jazylǵan habarlamada.
Osyǵan bailanysty ótken jyldyń sońynan beri Orta-bilim.e-qazyna tsifrlyq platformasyna aýystyrylǵan.
Qarjy ministrligi jekemenshik mektepterdi qarjylandyrýǵa júrgizgen aýdit barysynda birqatar zańbuzýshylyqty anyqtaǵan:
- ǵimarattardyń naqty syiymdylyǵyn esepke almai oqýshy oryndarynyń sanyn negizsiz asyra baǵalaý (normativtik syiymdylyqtan 3 ese asyp ketý);
- biýdjettik qarjylandyrý alý jáne sol arqyly salyq tólemderin azaitý úshin salyq eseptiliginde kiristi kem kórsetý arqyly eselengen paida alý;
- kúrdeli jóndeýdiń ornyna aǵymdaǵy jáne kosmetikalyq jóndeý júrgizý (jobalaý jáne smetalyq qujattamasy bolmaǵan jaǵdaida).
Qarjy ministri zańbuzýshylyqtardyń kóptegen deregin keltirgen.
"Mundaǵy zańbuzýshylyqtar memlekettik organdardaǵy laýazymdy tulǵalardyń qadaǵalamaýynan nemese tikelei qatysýymen bolyp otyr", - dep jazylǵan habarlamada.
Eske salaiyq, jýyrda elimizde jeke mektepterge qoiylatyn talaptar ózgeretini habarlandy. Bul týraly Almaty qalasyndaǵy jeke mektepterdiń quryltaishylary, direktorlarynyń qatysýymen ótken kezdesýde oqý-aǵartý ministri Juldyz Súleimenova málimdedi.
