Jastar sanasyna rýhani jańǵyrý kodyn sińirý basty maqsat
Jańa joba qazaqtyń mádeni murasyn saqtap, nasihattaýǵa baǵyttalǵan.
– Búgingi shara «Rýhani jańǵyrý» baǵdarlamasy aiasynda júzege asyp jatyr. Osy baǵdarlama aiasynda qanshama asyl muralarymyz tanylyp ta, tabylýda. Qazaq mádenieti ǵasyrlar boiy urpaqtar arasyndaǵy sabaqtastyqty jalǵasyp keledi.
30 jylǵa jýyq táýelsizdik tarihymyzda da ulttyq qundylyqtarymyz az dáriptelgen joq. Jobanyń kózdegeni – jas urpaqqa tól mádenietimizdi tanystyra otyryp, olardyń sanasyna rýhani jańǵyrý kodyn sińirý. Jáne álemge qazaqstandyq mádenietti jańa turpatta tanystyrý.
Joba aiasyndaǵy sharalardyń alǵashqysy – búgingi tusaýkeser. Odan ári josparǵa sai túrli baǵyttaǵy tarihi-mádeni is-sharalar uiymdastyrýdy kózdep otyrmyz, – dedi QR Tuńǵysh Prezidenti kitaphanasy direktorynyń orynbasary Botagóz Qaiypova.
Onyń aitýynsha, joba 1 jylǵa arnalǵan. Joba jetekshileri ony Táýelsizdiktiń 30 jyldyǵyna deiin jalǵastyrmaqshy. Belgili bolǵandai, joba aiasynda elordalyq oqýshylar tarihi-mádeni oryndarmen tanysyp, ǵylymi zertteýler júrgizedi.
– Oqýshylarǵa arnalǵan bul sharanyń basty maqsaty – oqýshylardy tarihi jádigerler men eskertkishter týraly tereń tanyp bilý men ony qurmetteý. Sondai-aq, el óńirleriniń mádenietimen tanysa otyryp, oqý-tanymdyq baǵdarlamalardy ázirleý.
Joba 2019-2020 oqý jylyna arnalǵan. Bir jyl boiy oqýshylardyń qatysýymen túrli baǵyttaǵy sharalar uiymdastyrylady. Onyń ishinde, tanymal tulǵalarmen kezdesý, ádebi kesh, túrli baiqaý jáne ǵylymi jobalar jazý.
Sonymen qatar, kórmeler men ashyq sabaqtar ótedi. Jobany Bilim basqarmasynyń bastamasymen qaladaǵy 5 mektep birigip júzege asyratyn bolamyz, – dedi qalalyq №15 mektep-litseii direktorynyń tárbie isi jónindegi orynbasary Ǵaliia Omasheva. Aita keteiik, «Qazaqstannyń mádeni murasy álemine saiahat» atty jobaǵa qalanyń №15, 18, 19, 21, 35 mektep ujymy men oqýshylary qatysyp jatyr.
