Qazaqstan zańnamasy boiynsha ýtil alymnan jinalǵan aqsha ekologiia salasyndaǵy jobalarǵa baǵyttalýy kerek. Sondyqtan osyndai qarajat kózi qordalanatyn "Jasyl damý" AQ-tyń Kcell aktsiialaryn satyp alýyna qoǵam tarapynan belgili bir deńgeide narazylyq týyndap, bul jait BAQ betterinde jii kóterilýde. Osyǵan bailanysty búgin "Jasyl damý" AQ túsinikteme berip, málimdeme jasady, dep habarlaidy Dalanews.kz.
"Jasyl damý" AQ Kcell kompaniiasynyń zańdy nemese korporativtik turǵyda aktsioneri emes ekendigin atap ótemiz. Iaǵni, Kcell aktsiialarynyń ýaqytsha kepilge berilýi "Jasyl damý" AQ-nyń kompaniia menedjmentine qatysýyn bildirmeidi. "Jasyl damý" AQ-nyń qarajatyn ornalastyrý Qazaqstan Respýblikasynyń zańnamasyna sáikes qatań júzege asyrylady", delingen resmi málimdeme.
Ári bul shara QR Joǵary aýditorlyq palatasymen qadaǵalanyp, rastalǵany, ýaqytsha bos qarajatty ótelýi mindetti joǵary senimdi ári ótimdi baǵaly qaǵazdardy kepilge qoiý arqyly ornalastyrýǵa múmkindik beretin keri REPO quraly paidalanylǵany da naqtylanady.
Quzyrly mekeme pikirinshe, ekologiialyq kodeksinde aiqyndalǵan maqsattarǵa qarajat baǵyttalǵanǵa deiin bul qarajat ýaqytsha bos bolyp sanalady jáne olardy tiimdi basqarý maqsatynda qarjy quraldaryna ornalastyrylady.
"Sonymen qatar, turmystyq qatty qaldyqtar salasyndaǵy jobalardy odan ári qarjylandyrý úshin qarajat "Ónerkásipti damytý qory" AQ-yna aýdarylady", delingen málimdemede.
"Jasyl damý" AQ 2025 jylǵy 25 qyrkúiektegi jaǵdai boiynsha búginge deiin jalpy somasy 87,3 mlrd teńgeni quraityn 20 QTQ jobasyn qarjylandyrǵandaryn da naqtylaidy.
