Qazaqstannyń jarnama jáne kreativti indýstriia ókilderi salyq zańnamasyna engizilgeli jatqan ózgeristerge alańdaýly. Olar bul máselege qatysty el biligine ashyq narazylyq bildirdi,- dep habarlaidy Dalanews.kz.
Qazaqstannyń jarnama jáne kreativti salasynda jumys isteitin mamandary jańa Salyq kodeksine engiziletin ózgeristerge narazylyq bildirip, el basshylyǵyna úndeý joldap otyr.
Kreativti sala ókilderi hatta salyq salýdyń jalpy belgilengen tártibi boiynsha jumys isteitin kompaniialar úshin jeńildetilgen júiedegi jeke kásipkerlerden (JK) satyp alynǵan qyzmetterdiń shyǵyndaryn salyq esebinde saqtap qalýdy surap otyr.
Salyq kodeksiniń qazirgi nusqasyna usynylǵan ózgeristerge sáikes, jalpy belgilengen tártip boiynsha jumys isteitin zańdy tulǵalar men jeke kásipkerler jeńildetilgen salyq rejimindegi jeke kásipkerlerden satyp alynǵan qyzmetterdi shyǵyn retinde eseptei almaidy. Bul degenimiz:
- Jeke kásipkerler úshin bul B2B segmentinde zańdy jumys isteý múmkindiginiń aitarlyqtai shektelýi. Olar úshin "jeńildetilgen rejim" – qyzmetin zańdy túrde jalǵastyrýdyń jalǵyz joly. Sebebi olardyń ainalymy az, jeke býhgalter jaldaýǵa múmkindigi joq, jalpy tártipke kóshý olardyń qyzmetin ekonomikalyq turǵydan tiimsiz etedi.
- Jarnama agenttikteri men prodakshn-stýdiialar úshin shyǵyn kem degende 20%-ǵa ósip, kelisim jasalatyn seriktester qatary aitarlyqtai azaiady, ákimshilik jumystar kúrdelenedi.
- Videograftar, animatorlar, dizainerler, dybys rejisserleri siiaqty talantty mamandardyń naryqtan ketý qaýpi bar.
- Jalpy ekonomika úshin zańsyz eńbek naryǵynyń ulǵaiý, salyq azaiý, shaǵyn biznestiń básekege qabilettiliginiń tómendeý, kadrlardyń shetelge ketý qaýpi bar. Budan kreativti indýstriia ǵana emes, sonymen qatar, tsifrlyq ónimder, jasandy intellekt, media men kino sekildi basqa da aralas salalar zardap shegedi.
Jarnama salasynyń ókilderi mynadai usynystar jasap otyr:
- Jeńildetilgen rejimdegi JK-lardyń B2B segmentinde, iaǵni zańdy tulǵalar men jalpy belgilengen tártiptegi JK-larǵa qyzmet kórsetý quqyǵyn saqtap qalý.
- Jalpy belgilengen tártiptegi kompaniialar men JK-lar úshin jeńildetilgen júiedegi JK-lardan satyp alǵan qyzmetterin kelisimshart jáne qarjylyq qujattar bolǵan jaǵdaida shyǵyn retinde esepke alý múmkindigin qaldyrý.
- Qajet bolǵan jaǵdaida jeńildetilgen rejimdegi, B2B segmentinde jumys isteitin JK-lar úshin bólek, mysaly 6-8% kóleminde arnaiy salyq mólsherlemesin belgileý.
- Qajet bolǵan jaǵdaida JK-lardan satyp alynǵan qyzmet shyǵynyna belgili bir shekti belgileý (mysaly jylyna 100 mln teńgege deiin).
Bul hattar premer-ministr Oljas Bektenovke, Parlament Senatynyń tóraǵasy Máýlen Áshimbaevqa, Májilis tóraǵasy Erlan Qoshanovqa, Memlekettik keńesshi Erlan Qaringe jáne Prezident ákimshiliginiń basshysy Aibek Dádebaevqa eotinish.kz elektron platformasy arqyly 19 maýsymda joldanǵan.
Barlyq hat boiynsha oryndaýshylar taǵaiyndalǵan, jaýap berý merzimi – 2025 jyldyń 10 shildesine deiin. Sonymen qatar, elektron formatpen qatar, qol qoiylǵan hattar da daiyndalyp, joldanbaq.
Mundai birlesken is-áreketke túrtki bolǵan – 29 mamyrda Almaty Creative Hub alańynda MarCom Club CA qaýymdastyǵynyń bastamasymen ótken jarnama salasynyń ókilderiniń kezdesýi. Bul basqosý bastapqyda jarnama, PR men marketing salalary kreativti indýstriiaǵa kire me jáne qandai salyq jeńildikterine qol jetkizýge bolatynyn talqylaýǵa arnalǵan edi. Biraq jiyn barysynda jeke kásipkerlerdiń qyzmetine qatysty salyq shekteýiniń saldary da talqylanyp, osy másele tóńireginde kásibi chat ashylyp, birlesken hat daiyndaldy. Qujatqa jiynǵa qatysqan mamandardan bólek, keiin qosylǵan mamandar men kompaniialardy qosqanda barlyǵy 30-dan asa adam qol qoiǵan.
Eske salaiyq, buǵan deiin Májilis depýtattary jańa Salyq kodeksi men salyq salý máseleleri boiynsha ilespe túzetýlerdi ekinshi oqylymda qabyldady. Depýtattar pen Úkimettiń birlesken jumysy nátijesinde, sonyń ishinde qosylǵan qun salyǵy reformasy boiynsha birqatar sheshim qabyldanǵan bolatyn.
