Jaqsylyq Omar: «Almaty oblysynda infektsiialyq aýrýdyń aldyn alatyn dárilik zattardyń qory bar»
Is-saparmen kelgen Eljan Birtanovqa Almaty oblysy ákiminiń orynbasary Jaqsylyq Omar aimaqta oryn alǵan ahýal týraly jáne meningokokk infektsiiasynyń aldyn alý jóninde qabyldanǵan sharalar týraly habarlap, Talǵar jáne Eńbekshiqazaq aýdandaryndaǵy aýrýhanalardyń jumysymen tanysty.
Atap óteiik, Talǵar aýdanynda epidemiologiialyq jaǵdaidy eskere otyryp, meningokokk infektsiiasyna qosymsha infektsiialyq tósek oryndary qoiyldy. Ile aýdanyndaǵy jáne basqa ortalyq aýdandyq aýrýhanalarda osyndai jaǵdaidyń aldyn alý úshin ár densaýlyq saqtaý mekemesinde qosymsha 10 tósek orny bólindi.
Aýdandyq aýrýhanalardy aralaý barysynda Almaty oblystyq densaýlyq saqtaý basqarmasynyń basshysy Baýyrjan Ysqaq atqarylǵan jumystar jóninde tolyqqandy aqparat berdi.
– Búgingi kúnge deiin oblys boiynsha meningokokk dertine shaldyqqan 4 ólim jaǵdaiy tirkeldi, onyń úsheýi eresek bolsa, bireýi sábi. Biz meningokokk dertin toqtatý úshin qoldan kelgen barlyq jaǵdaidy jasaýdamyz. Aýrýdyń aldyn alý úshin Taldyqorǵan aimaqtyq jáne Qaskeleń qalalyq juqpaly aýrýlar aýrýhanalarynda meningokokk infektsiiasy kúdigimen kelgen naýqastarǵa arnaiy meditsinalyq qabyldaý bólimderi jumys jasaidy. Oblys kóleminde densaýlyq saqtaý basqarmasynyń shaqyrtýymen B.N. Kosherov basqaratyn Qaraǵandy Memlekettik meditsina ýniversitetiniń mamandary (eresekter men balalar juqpaly aýrýlardy emdeitin dárigerler, epidemiolog) jáne arnaiy psiholog mamandar da jumyldyryldy, – deidi Baýyrjan Ysqaq.
Jalpy, oblysymyzda meningitke qarsy sharalar halyqaralyq talaptarǵa sáikes júzege asýda.
– Qazir jaǵdaidyń barlyǵy qatań baqylaýda. Qoǵamdaǵy alańdaýshylyqty basý úshin, halyqqa túsindirý jumystary júrgizilip jatyr. Oblystyq meditsina uiymdarynda atalǵan aýrýdyń aldyn alý úshin oqytý seminarlary ótkizildi. Meditsinalyq uiymdarda dárilik zattardyń qajetti qory bar, – dep atap ótti oblys ákiminiń orynbasary Jaqsylyq Omar.
Densaýlyq saqtaý ministri Eljan Birtanov Eńbekshiqazaq aýdandyq aýrýhanasynda dertten aiyǵyp kele jatqan naýqastardyń jaǵdaiyn kórip, aǵaiyndy Kamal men Mustafa Mamaevtarǵa tez saýyǵyp ketýin tiledi.
Aita keteiik, olar meningokokk infektsiiasyn juqtyrdy degen diagnozymen aýrýhanaǵa jatqyzylǵan. Aǵaiyndylarǵa qatysty jedel emdeý sharalary qoldanylǵan. Dárigerlerdiń aitýynsha, balalardyń qazir jaǵdaiy jaqsy, apta sońynda olar aýrýhanadan shyǵarylmaq.
– Tájiribeli qyzmetkerlerińizdiń arqasynda jumystaryńyz oń nátije berýde. Men osy aýrýhanada 1994-1996 jyldary qyzmet atqarǵan ýaqytta ǵimarat jaǵdaiy múshkil bolatyn. Al qazir ol olqylyqtardyń orny toltyrylyp, barlyq talaptarǵa sai jumystar atqarylýda, –dedi Eńbekshiqazaq aýdanynyń ortalyq aýrýhanasynyń jumysyna oń baǵa bergen ministr E.Birtanov.
Sonymen qatar ministr jedel járdem jumysyndaǵy kemshilikterdi atap ótti.
– Tótenshe jaǵdaida árbir minýt mańyzdy. Sondyqtan tez arada jedel járdem kórsetý kerek. Bir aýmaqqa qansha jedel járdem kóligi bar? Halyq tarapynan qansha qońyraý shalynady? Biz, eń aldymen, ómir men ólimniń arasynda turǵan adamdardyń jaǵdaiy týraly oilanýymyz kerek.Olar úshin jedel járdem qyzmeti halyqtyń muń-muqtajyn tyńdap otyrý úshin emes, múshkil jaǵdaida jatqan naýqasty jedel jetkizý úshin arnalǵanyn halyqqa durys túsindire bilý kerek. Men jedel járdem qyzmetiniń talaptarymen tanystym, bul jóninde arnaiy shyqqan buiryq qaǵazy da bar. Alaida ol talaptar oryndalmaǵan, – dep qorytyndylady densaýlyq ministri.
Sondai-aq Eljan Birtanov naýqastardyń densaýlyǵy úshin kúni-túni kúresip jatqan aq halattylarǵa óz alǵysyn bildirdi.
Baljan QAIRATQYZY,
Almaty oblysy.
