ىس-ساپارمەن كەلگەن ەلجان ءبىرتانوۆقا الماتى وبلىسى اكىمىنىڭ ورىنباسارى جاقسىلىق ومار ايماقتا ورىن العان احۋال تۋرالى جانە مەنينگوكوكك ينفەكسياسىنىڭ الدىن الۋ جونىندە قابىلدانعان شارالار تۋرالى حابارلاپ، تالعار جانە ەڭبەكشىقازاق اۋداندارىنداعى اۋرۋحانالاردىڭ جۇمىسىمەن تانىستى.
اتاپ وتەيىك، تالعار اۋدانىندا ەپيدەميولوگيالىق جاعدايدى ەسكەرە وتىرىپ، مەنينگوكوكك ينفەكسياسىنا قوسىمشا ينفەكسيالىق توسەك ورىندارى قويىلدى. ىلە اۋدانىنداعى جانە باسقا ورتالىق اۋداندىق اۋرۋحانالاردا وسىنداي جاعدايدىڭ الدىن الۋ ءۇشىن ءار دەنساۋلىق ساقتاۋ مەكەمەسىندە قوسىمشا 10 توسەك ورنى ءبولىندى.
اۋداندىق اۋرۋحانالاردى ارالاۋ بارىسىندا الماتى وبلىستىق دەنساۋلىق ساقتاۋ باسقارماسىنىڭ باسشىسى باۋىرجان ىسقاق اتقارىلعان جۇمىستار جونىندە تولىققاندى اقپارات بەردى.
– بۇگىنگى كۇنگە دەيىن وبلىس بويىنشا مەنينگوكوكك دەرتىنە شالدىققان 4 ءولىم جاعدايى تىركەلدى، ونىڭ ۇشەۋى ەرەسەك بولسا، بىرەۋى ءسابي. ءبىز مەنينگوكوكك دەرتىن توقتاتۋ ءۇشىن قولدان كەلگەن بارلىق جاعدايدى جاساۋدامىز. اۋرۋدىڭ الدىن الۋ ءۇشىن تالدىقورعان ايماقتىق جانە قاسكەلەڭ قالالىق جۇقپالى اۋرۋلار اۋرۋحانالارىندا مەنينگوكوكك ينفەكسياسى كۇدىگىمەن كەلگەن ناۋقاستارعا ارنايى مەديسينالىق قابىلداۋ بولىمدەرى جۇمىس جاسايدى. وبلىس كولەمىندە دەنساۋلىق ساقتاۋ باسقارماسىنىڭ شاقىرتۋىمەن ب.ن. كوشەروۆ باسقاراتىن قاراعاندى مەملەكەتتىك مەديسينا ۋنيۆەرسيتەتىنىڭ ماماندارى (ەرەسەكتەر مەن بالالار جۇقپالى اۋرۋلاردى ەمدەيتىن دارىگەرلەر، ەپيدەميولوگ) جانە ارنايى پسيحولوگ ماماندار دا جۇمىلدىرىلدى، – دەيدى باۋىرجان ىسقاق.
جالپى، وبلىسىمىزدا مەنينگيتكە قارسى شارالار حالىقارالىق تالاپتارعا سايكەس جۇزەگە اسۋدا.
– ءقازىر جاعدايدىڭ بارلىعى قاتاڭ باقىلاۋدا. قوعامداعى الاڭداۋشىلىقتى باسۋ ءۇشىن، حالىققا ءتۇسىندىرۋ جۇمىستارى جۇرگىزىلىپ جاتىر. وبلىستىق مەديسينا ۇيىمدارىندا اتالعان اۋرۋدىڭ الدىن الۋ ءۇشىن وقىتۋ سەمينارلارى وتكىزىلدى. مەديسينالىق ۇيىمداردا دارىلىك زاتتاردىڭ قاجەتتى قورى بار، – دەپ اتاپ ءوتتى وبلىس اكىمىنىڭ ورىنباسارى جاقسىلىق ومار.
دەنساۋلىق ساقتاۋ ءمينيسترى ەلجان ءبىرتانوۆ ەڭبەكشىقازاق اۋداندىق اۋرۋحاناسىندا دەرتتەن ايىعىپ كەلە جاتقان ناۋقاستاردىڭ جاعدايىن كورىپ، اعايىندى كامال مەن مۇستافا مامايەۆتارعا تەز ساۋىعىپ كەتۋىن تىلەدى.
ايتا كەتەيىك، ولار مەنينگوكوكك ينفەكسياسىن جۇقتىردى دەگەن دياگنوزىمەن اۋرۋحاناعا جاتقىزىلعان. اعايىندىلارعا قاتىستى جەدەل ەمدەۋ شارالارى قولدانىلعان. دارىگەرلەردىڭ ايتۋىنشا، بالالاردىڭ ءقازىر جاعدايى جاقسى، اپتا سوڭىندا ولار اۋرۋحانادان شىعارىلماق.
– تاجىريبەلى قىزمەتكەرلەرىڭىزدىڭ ارقاسىندا جۇمىستارىڭىز وڭ ناتيجە بەرۋدە. مەن وسى اۋرۋحانادا 1994-1996 جىلدارى قىزمەت اتقارعان ۋاقىتتا عيمارات جاعدايى مۇشكىل بولاتىن. ال ءقازىر ول ولقىلىقتاردىڭ ورنى تولتىرىلىپ، بارلىق تالاپتارعا ساي جۇمىستار اتقارىلۋدا، –دەدى ەڭبەكشىقازاق اۋدانىنىڭ ورتالىق اۋرۋحاناسىنىڭ جۇمىسىنا وڭ باعا بەرگەن مينيستر ە.ءبىرتانوۆ.
سونىمەن قاتار مينيستر جەدەل جاردەم جۇمىسىنداعى كەمشىلىكتەردى اتاپ ءوتتى.
– توتەنشە جاعدايدا ءاربىر مينۋت ماڭىزدى. سوندىقتان تەز ارادا جەدەل جاردەم كورسەتۋ كەرەك. ءبىر اۋماققا قانشا جەدەل جاردەم كولىگى بار؟ حالىق تاراپىنان قانشا قوڭىراۋ شالىنادى؟ ءبىز، ەڭ الدىمەن، ءومىر مەن ءولىمنىڭ اراسىندا تۇرعان ادامداردىڭ جاعدايى تۋرالى ويلانۋىمىز كەرەك.ولار ءۇشىن جەدەل جاردەم قىزمەتى حالىقتىڭ مۇڭ-مۇقتاجىن تىڭداپ وتىرۋ ءۇشىن ەمەس، مۇشكىل جاعدايدا جاتقان ناۋقاستى جەدەل جەتكىزۋ ءۇشىن ارنالعانىن حالىققا دۇرىس تۇسىندىرە ءبىلۋ كەرەك. مەن جەدەل جاردەم قىزمەتىنىڭ تالاپتارىمەن تانىستىم، بۇل جونىندە ارنايى شىققان بۇيرىق قاعازى دا بار. الايدا ول تالاپتار ورىندالماعان، – دەپ قورىتىندىلادى دەنساۋلىق ءمينيسترى.
سونداي-اق ەلجان ءبىرتانوۆ ناۋقاستاردىڭ دەنساۋلىعى ءۇشىن كۇنى-تۇنى كۇرەسىپ جاتقان اق حالاتتىلارعا ءوز العىسىن ءبىلدىردى.
بالجان قايرات قىزى،
الماتى وبلىسى.
