Jeksenbi kúni Japoniiada kezekti jalpyhalyqtyq sailaý ótedi. Bul - sońǵy eki jyl ishindegi ekinshi sailaý. Kezekten tys daýys berý bilik basyndaǵy partiiany da, oppozitsiiany da, sondai-aq sailaýshylardyń edáýir bóligin tosynnan tap qyldy, dep habarlaidy Dalanews.kz.
Bul týraly BBC saraptamalyq maqala jariialady. Japoniianyń premer-ministri Sanae Takaiti parlamentti taratyp, 19 qańtarda kezekten tys sailaý ótetinin jariialady. Bul sheshim onyń premer-ministr qyzmetine kiriskenine nebári úsh ai tolmai jatyp qabyldandy.
Japoniia tarihyndaǵy alǵashqy áiel premer ózine degen jeke qoldaýǵa senim artyp otyr. Ol partiiasy bir jyl buryn qol jetkize almaǵan maqsatqa - uzaq ýaqyttan beri bilik basynda bolǵanymen, qoǵamda aitarlyqtai tanymaldyǵyn joǵaltqan Liberaldy-demokratiialyq partiiaǵa (LDP) naqty qoǵamdyq mandat alýǵa úmittenedi.
Alaida bul - táýekeli joǵary saiasi qadam. Takaitidiń aldyndaǵy premer Sigerý Isiba dál osyndai áreketke baryp, aýyr jeńiliske ushyraǵan bolatyn. Endi sailaýshylar Sanae Takaitidiń bul bási ózin aqtai ma, joq pa - sony sheshýi tiis.
«Qazirgi jaǵdaidyń basty ereksheligi - onyń qoldaý reitingi kóptegen buqaralyq aqparat quraldarynyń saýalnamalary boiynsha burynǵy premerlerge qaraǵanda áldeqaida joǵary», - deidi The Asia Group konsaltingtik kompaniiasynyń japon baǵyty boiynsha aǵa sarapshysy Rintaro Nisimýra.
Onyń aitýynsha, saiasattaǵy qalyptasqan qaǵida qarapaiym: reiting joǵary bolsa, sailaý jariialanady.
Ótken jyldyń qazan aiynda qyzmetine kiriskennen beri Sanae Takaiti aqparat quraldarynyń basty taqyrybyna ainaldy. Alaida ol buqaranyń nazaryn naqty saiasi sheshimderimen nemese zańnamalyq bastamalarymen emes, saiasi performansymen kóbirek aýdaryp keledi.
