Keleli basqosýǵa óńirdegi úkimettik emes uiymdardyń basshylary men ókilderi, qoǵamdyq birlestik jetekshileri men azamattyq belsendiler men kásipkerler jáne BAQ ókilderi qatysty dep habarlaidy oblystyń baspasóz qyzmeti.
Forýmda Túrkistan oblysynyń ákimi Janseiit Túimebaev úkimettik emes uiymdardyń qoǵamdaǵy orny erekshe ekenin aityp, qoǵamdyq uiymdar eldi órkendetý baǵytynda jumys isteýi kerek degen oiyn jetkizdi.
«Biyl óńirimizde tarihi oqiǵalarǵa kýá bolýdamyz. Elbasy Jarlyǵyna sáikes, Túrkistan oblysy qurylyp, onyń ortalyǵy bolyp Túrkistan qalasy bekitildi. Bul taǵdyrly sheshim qoǵamnyń barlyq salasyna tyń serpin beredi degen oidamyn. Sebebi, jańa oblys jańa múmkindikterge, biik shyńdarǵa jeteleidi.
Úkimettik emes uiymdar da osy sátti paidalanyp, jańa oblysty órkendetýge atsalysýlary tiis. Búginde jańadan qurylǵan Túrkistan oblysynda 738 qoǵamdyq birlestik tirkelgen.
Aýdan, qalalardaǵy úkimettik emes uiymdardyń jumysyn jandandyrý, qarjylai qoldaý boiynsha tiisti jumystar atqarylýda. Búgingi forýmda elimizdi, qasietti Túrkistanymyzdy túletetin, qoǵamǵa tyń kúsh beretin uly bastamalar men igi isterdiń negizi qalanady dep senemin. Al, úlken ister osyndai keleli basqosýlardaǵy bastamalardan týyndaityny sózsiz», — degen J.Túimebaev birqatar úkimettik emes uiym ókilderine Alǵys hat tapsyrdy.
Jiynda «Túrkistan oblysynyń Azamattyq Aliansy» zańdy tulǵalardyń qaýymdastyq nysanyndaǵy birlestiginiń tóraǵasy Sháripbek Jamalbek azamattyq qoǵamdy damytý baǵytyndaǵy oilaryn aityp, alianstyń atqarǵan jumystarymen tanystyrdy.
Forýmda QR Qoǵamdyq damý ministrliginiń Azamattyq qoǵam isteri komiteti tóraǵasynyń orynbasary Baqytjan Narymbetov, «Qazaqstannyń Azamattyq Aliansy» zańdy tulǵalar birlestiginiń prezidenti Asylbek Qojahmetov, «Chernobyl odaǵy» qoǵamdyq birlestiginiń tóraǵasy Baqytjan Áshirbaev, belgili saiasattanýshy, «Qazaqstannyń Azamattyq Aliansy» zańdy tulǵalar birlestiginiń vitse-prezidenti Dos Kóshim jáne ózge de azamattar sóz sóilep, úkimettik emes uiymdardyń jumysyn jandandyrý jónindegi usynystaryn jetkizdi.
Úkimettik emes uiymdardyń bedeli men áleýetin qalai kóteremiz? Eldi órkendetip, Túrkistandy gúldendirý úshin qoǵamdyq birlestikter ne usyna alady?
Bilik tarapynan azamattyq qoǵamdy damytý úshin qandai qoldaý qajet? Jiynda osy suraqtar tóńireginde keleli pikirler men usynystar aityldy.
Azamattyq forým aiasynda áleýmettik ideialar men jobalar jármeńkesiniń jeńimpazdary men júldegerleri marapattaldy. Bul jármeńkede birinshi oryndy Qazyǵurt aýdanynan kelgen «Jalynda jastar» qoǵamdyq birlestigi jeńip aldy. Jeńimpazǵa 540 myń teńge aqshalai syilyq tapsyryldy. Ekinshi, úshinshi oryn alǵan azamattar men ózge qatysýshylarǵa da syilyqtar berildi. Jiyn sońynda spikerlerge suraqtar qoiylyp, respýblikalyq VIII azamattyq forýmǵa baratyn delegattardyń tizimi bekitildi.
