Búgin Qazaqstan-Ózbekstan biznes-forýmy aiasynda Ońtústik Qazaqstan oblysynyń ákimi Janseiit Túimebaev Ózbekstan Respýblikasynyń saýda-ónerkásip palatasynyń tóraǵasy Adham Ikramov pen Syrtqy saýda ministriniń orynbasary Sohib Saifnazarov bastaǵan delegatsiiany qabyldady.
Qasietti Ramazan aiynda alǵashqy birlesken iskerlik keńestiń birinshi kezdesýi men biznes-forýmnyń Ońtústik jerinde ótkizilip jatqanyna qýanyshty ekenin jetkizgen oblys ákimi ózara is-áreketter jaqyn bolashaqta óz nátijesin bererine senim bildirdi.
«Bizdiń oblys Ózbekstanmen shekaralas, bul aimaq úshin de búkil el úshin de óte mańyzdy faktor bolyp tabylady.
Bul óz kezinde ekonomikanyń barlyq salalarynda eki jaqty qatynastardy damytýǵa úlken múmkindikter beredi.
Ózderińiz biletindei, Qazaqstan men Ózbekstan memleket basshylary 2018 jyldy Qazaqstandaǵy Ózbekstan jyly dep jariialady. Búginde bizdiń aimaq pen Ózbekstan arasynda shekaralyq yntymaqtastyq damyp keledi.
2017 jyldyń 15-16 qyrkúieginde Tashkentte Qazaqstan-Ózbekstan biznes-forýmy ótti. Atalǵan jiynǵa Ońtústik Qazaqstan oblysynan 150-den astam memlekettik jáne jeke uiymdar qatysty. Forým barysynda Ońtústik Qazaqstan oblysynyń ákimdigi men Tashkent, Syrdariia jáne Djizak oblysy ákimderiniń arasynda saýda-ekonomikalyq jáne mádeni-gýmanitarlyq salalarynda ózara túsinistik týraly memorandýmǵa qol qoiylǵan bolatyn»,-dedi aimaq basshysy.
Ózbek delegatsiiasymen bolǵan ekijaqty kezdesýde saýda-ekonomikalyq qarym-qatynasty odan ári damytyp, taýar ainalymdy arttyrýǵa baǵyttalǵan birlesken júieli jumystardy atqarý jaiy sóz boldy.
Óz kezinde mártebeli meiman AdhamIkramov eki eldiń ǵasyrdan beri jalǵasqan dostyq qarym-qatynasy odan ári jandana túsetinin aityp, búgingi ótip jatqan iskerlik jiynda OQO kásipkerleri men ózbekstandyq biznesmender arasynda saýda-ekonomikalyq bailanys nyǵaia túsetinine senimdi ekenin jetkizdi.
Ózbekstan - Ortalyq Aziiadaǵy Qazaqstannyń iri saýda seriktesi. 2018 jyldyń birinshi toqsanynda elder arasyndaǵy syrtqy saýda ainalym ótken jyldyń sáikes kezeńimen salystyrǵanda 50 paiyzǵa artqan. Al jyl sońyna deiin ekijaqty saýdanyń kólemin 3 milliard AQSh dollaryna deiin arttyrý josparlanýda.
Sóz sońynda oblys ákimi ózbek kompaniialarynyń Ońtústik óńirinde biznesti damytý boiynsha bastamalaryna tolyq qoldaý kórsetýge ázir ekendigin aitty.
Aita keteiik, 11-12 mamyr kúnderi Shymkent qalasynda «Ońtústik Qazaqstan-Ózbekstan» toqyma ónerkásibi ónimderiniń birlesken kórmesi ótken bolatyn. Kórmege toqyma, kiim jáne teriden jasalǵan ónimder, farmatsevtika, jihaz, sývenirler, sporttyq taýarlar men oiynshyqtar óndiretin ońtústikqazaqstandyq jáne ózbekstandyq 60-qa jýyq kásiporyndar qatysqan.
