Kúni keshe ǵana redaktsiiamyzdyń poshtasyna Jambyl oblysy Jańatas qalasynyń turǵyny Eltai Týlaǵanov esimdi azamattan kelgen hat osy sózimizge dálel bolady. Ol 15 jyldan astam ýaqyt Jańatas qalasyndaǵy «Aigúl» balabaqshasynda án-kúiden búldirshinderge sabaq beripti. Otbasylyq jaǵdaiyna bailanysty eki kúnge balabaqsha meńgerýshisinen suranyp, jumystan shyǵarylǵanyn aityp, muńyn shaqty. Endi hatty qaz-qalpynda bersek. Eger qarsy tarapty alyp qosar oiy bolsa marhabat.
– Men Eltai Týlaǵanov Ermahanuly tómende bolǵan oqiǵa týraly málimdeimin. Jambyl oblysy, Sarysý aýdany Jańatas qalasyndaǵy «Aigúl» balabaqshasynda án-kúi jetekshisi bolyp 2001 jyldan, iaǵni 15 jyldan beri jumys istedim. Ústimizdegi jyldyń 22 qyrkúiek kúni otbasylyq jaǵdaiyma bailanysty eki kúnge aqysyz demalys surap aryz jazdym. Ótinishimdi balabaqsha meńgerýshisi Jaqash Stambekovanyń qolyna bergenimde basshymyz «júre berińiz» dep ótinishimdi alyp qaldy. Men aptanyń aiaǵy – beisenbi, juma kúnderi suranǵan edim. Dúisenbi kúni jumysqa kelsem «jumysqa shyqpadyń» dep meniń ótinish jazǵanymdy moiyndamai, jumystan shyǵaryp jiberdi. Endi ne isterimdi bilmeimin, – deidi.
Eger aryz iesi baiandaǵandai oqiǵa oryn alsa, bul baryp turǵan bassyzdyq demeske sharamyz joq. Balabaqsha meńgerýshisi eki kún jumystan suranǵan adamdy bulaisha qýdalasa, basqa jandardan ne kútýge bolady? Bizge hat joldaǵan Jańatas qalasynyń turǵyny Jambyl oblysynyń ákimi Kárim Kókirekbaev pen Sarysý aýdanynyń ákimi Beibitbek Jailybaevtan ádiletti sheshim kútetinin aitty.
«Daý qýǵan bálege jolyǵady» dep ata-babalarymyz beker aitpaǵan ǵoi. Óńir basshylary bul máseleni óristetpei, oń sheshimin tabýǵa yqpal etetinine sinemiz. Kópshilik qaýymǵa bul másele «Qala men Dala» gazetiniń nazarynda bolatynyn eskertemiz.
«Qala men Dala» gazeti
