Búgin Naýryznama onkúndigi aiasynda Jańarý kúnine orai Taldyqorǵan qalasynda bulaqtyń kózi ashylyp, aǵash egildi. Bul ekologiialyq sharalarǵa oblys ákimi Beibit Isabaev, ardagerler men óńir jastary qatysty, dep habarlaidy Dalanews.kz
Erkin aýyldyq okrýgi aýmaǵyndaǵy bulaqtyń kózin ashýǵa óńir basshymen birge bilim, innovatsiia, mádeniet, sport salalarynda darynymen tanylǵan oqýshylar men stýdentter keldi. Atap aitqanda, «Qazaqstannyń Úzdik shabandozy» atanǵan eń jas shabandoz Hamza Amangeldi, WORLD SKILLS 2025 jáne TurkicSkills 2025 chempionatynyń jeńimpazy, Taldyqorǵan joǵary politehnikalyq kolledjiniń 3 kýrs stýdenti Zere Sháken, Bolgariiada ótken «Stars of the world» ánshiler baiqaýynyń bas júldegeri, Q.Qasymov atyndaǵy №28 IT litsei mektebiniń 8 synyp oqýshysy Injý Baqbergenqyzy, «AITU KazRoboDrone 3.0» dronreising jáne avia modeldeý respýblikalyq baiqaýynyń júldegeri, №22 orta mekteptiń 9 synyp oqýshysy Damir Aǵytai aǵa býynnyń bulaqtyń kózin ashý rásimine kýá bolyp, urpaqtar sabaqtastyǵynyń jalǵastyǵyn kórsetti. Jinalǵan qaýymǵa Biken Rimova atyndaǵy akademiialyq drama teatrynyń ártisi Saǵyndyq Jumadil Naýryz batasyn berdi.
Oblys ákimi balalarmen tildesip, olardyń shyǵarmashylyq jáne sporttaǵy izdenisteri jaily sóilesti. Balalardyń budan bylai da alańsyz bilim alyp, óz talanttaryn shyńdap, elimizdiń aitýly azamaty bolýlaryna tilektestigin bildirdi.
Budan ári shara ortalyq saiabaqta Beibit Isabaev stýdentter, volonterler, jastar uiymdarynyń ókilderimen júzdesip, olardyń qoǵam ómirine belsene qatysýynyń mańyzdy ekenin jetkizdi:
- Jańa Konstitýtsiia qabyldanǵan kezde Prezidentimiz memlekettiń bolashaq iesi ári tiregi, eldiń erteńi jastar ekenin atap aitty. Sondyqtan Qazaqstanymyz baqýatty ósip-órkendeý úshin sizder jaqsy bilim alyp, jasandy intellekt pen jańa, ozyq tehnologiialardy erkin meńgerýlerińiz kerek. Sizderdiń bolashaqtaryńyz óz qoldaryńyzda, - dedi Beibit Isabaev.
Munan soń jinalǵan kópshilik saiabaqta 100 túp qylqan japyraqty aǵash kóshetterin otyrǵyzdy.
Osy sharaǵa arnaiy kelgen jastar óz pikir bildirdi.
- «Jetisu lastary» KMM uiymdastyrý bóliminde jumys isteimin. Ózim -volontermin. Biylǵy jyldyń basynan beri «Taza Qazaqstan» ekologiialyq baǵdarlamasy aiasynda Taldyqorǵandaǵy «Jastar» saiabaǵynda, D. Raqyshev atyndaǵy mektep-internattyń mańyna birneshe túp aǵash otyrǵyzdyq. Búgin, mine, Jańarý kúnine de atsalysyp jatyrmyz. Biyl Halyqaralyq volonerler jyly dep jariialandy. Biz, erikti jastar, kógaldandyrý, qart adamdarǵa qolǵabys etý jáne basqa da baǵyttaǵy jumystarymyzdy eselei túsemiz, - dedi Medet Ánýaruly.
Aǵash egýge kelgen stýdentter de oi qosty:
- Men Taldyqorǵandaǵy «Avitsenna» kolledjiniń stýdentimin. Ózim Shymkent qalasynanmyn. Jalpy Jetisýdyń tabiǵatyna qatty qyzyǵatynmyn, osy óńirge oqýǵa túskenime qýandym. Qazir meiirger mamandyǵyna oqyp jatyrmyn. Búgin tobymyzben aǵash egýge keldik. Budan basqa da sanitarlyq tazalyq sharalaryna turaqty qatysyp júrmin. Qorshaǵan ortaǵa qamqorlyq mádenietin árkim ózinen bastaýy kerek. Biz, jastar, ózimizden keiingi ósip kele jatqan balalarǵa bul turǵyda úlgi bolamyz dep oilaimyn, - dedi «Avitsenna» kolledjiniń 1 kýrs stýdenti Shyńǵyshan Seisembai.
Atap ótsek, búgin Jańarý kúninde oblys boiynsha jalpy sany 3 myńǵa jýyq aǵash egildi.
Sondai-aq osy kúni óńir oqýshylary oblys mektepteriniń aýlasyna kóshet otyrǵyzýǵa qatysty.
