QR Premer-Mınıstri A. Mámınniń ókimimen Mańǵystaý oblysyndaǵy áleýmettik-ekonomıkalyq jaǵdaıdy qarastyrý úshin Úkimettik komısıa quryldy dep habarlaıdy Dalanews.kz. 

Memleket basshysynyń tapsyrmasyn oryndaý maqsatynda Úkimet suıytylǵan munaı gazynyń baǵasyn retteý boıynsha sharalar toptamasyn iske asyrady.

"Memleket basshysy Q. K. Toqaevtyń tapsyrmasy boıynsha Úkimet Jańaózen qalasyndaǵy jaǵdaıǵa qatysty sharalar qabyldaıdy" dep atap ótti Mámın.

Atap aıtqanda:

1. Básekelestikti qorǵaý jáne damytý agenttigi AJQS ıelerine qatysty baǵalyq sóz baılasý boıynsha tergeýdi bastady.


2. Qazirgi ýaqytta Mańǵystaý oblysynyń AJQS ıeleri bıznestiń áleýmettik jaýapkershiligi aıasynda bastamashylyq tártippen gaz qunyn lıtrine 120 teńgeden 85-90 teńgege deıin tómendetý týraly sheshim qabyldady.

Baǵa dálizderin belgileý arqyly baǵanyń uzaq merzimdi turaqtylyǵyn qamtamasyz etý jáne gaz baǵasynyń alypsatarlyq kóterilýine jol bermeýdiń júıeli sharalary júzege asyrylatyn bolady.

Úkimet, Mańǵystaý oblysynyń ákimdigi prokýratýra organdarymen birlesip, qoǵamdyq tártipti buzýmen baılanysty bolǵan oqıǵany quqyqtyq baǵalaý boıynsha sharalar qabyldaıdy.

Aıta ketelik buǵan deıin Qazaqstan prezıdenti Qasym-Jomart Toqaev Jańaózendegi halyq narazylyǵyna baılanysty úkimetke tapsyrma bergen.

"Úkimetke Jańaózendegi jaǵdaıdy ekonomıkalyq turǵydan tekserip, quqyqtyq jaǵynan tez arada qarastyrýdy tapsyrdym. Sherýge shyqqandar qoǵamdyq tártipti buzbaýy tıis", - dep jazdy prezıdent Twitter paraqshasynda.

Azamattardyń jergilikti jáne ortalyq bılik organdaryna óz talaptaryn ashyq aıtýǵa quqyǵy bar, biraq bul zańǵa, atap aıtqanda, beıbit jınalystar týraly zańǵa sáıkes jasalýy kerek, dep atap ótti keıinirek prezıdent.

Eske salaıyq, keshe 2 qańtar kúni Jańaózen qalasynyń turǵyndary beınehabarlama túsirip, oblystaǵy gazdyń baǵasy 120 teńgege qymbattap ketkenin aıtqan. Olar eń tómengi baǵany jalaqy mólsherine sáıkes 60 teńgege deıin tómendetýdi talap etýde.