Jańaózendegi jaǵdai: Noǵaev halyqty syndarly dialogqa shaqyrdy
Nurlan Noǵaev alańǵa jinalǵandarǵa memleket basshysy Qasym-Jomart Toqaevtyń tapsyrmasy boiynsha Jańaózen qalasyndaǵy jaǵdaiǵa qatysty Úkimet qabyldaǵan sharalardy túsindirdi.
Qazirgi tańda premer-ministr Maminniń ókimimen Mańǵystaý oblysyndaǵy áleýmettik-ekonomikalyq jaǵdaidy qarastyrý úshin úkimettik komissiia quryldy.
Úkimet suiytylǵan munai gazynyń baǵasyn retteý boiynsha birqatar sharalardy iske asyrady. Óńir basshysy oblystaǵy AJQS ieleri biznestiń áleýmettik jaýapkershiligi aiasynda bastamashylyq tártippen gaz qunyn litrine 120 teńgeden 85-90 teńgege deiin tómendetý týraly sheshim qabyldaǵanyn jetkizdi.
"Baǵa dálizderin belgileý jáne gaz baǵasynyń alypsatarlyq ósýine jol bermeý uzaq merzimdi baǵa turaqtylyǵyn qamtamasyz etý boiynsha júieli sharalar júzege asyrylatyn bolady", - dedi oblys ákimi.
Qosa keteiik, básekelestikti qorǵaý jáne damytý agenttigi AJQS ielerine qatysty baǵalyq sóz bailasý boiynsha tergeýdi bastady.
Oblys ákimi jinalǵandardy máseleni zań aiasynda, syndarly dialog arqyly sheshýge shaqyrdy.
2 qańtar kúni Jańaózen qalasynda júzdegen kólik ieleri kóshege shyqqan bolatyn. Olar jiyndarda 1 qańtardan bastap litri 100 teńgeden 120 teńgege deiin qymbattaǵan suiytylǵan gaz baǵasyn tómendetýdi talap etti.
Energetika ministrligi baǵanyń kóterilýin suiytylǵan gazdy óndirýshilerdiń ony elektrondy saýda arqyly satýǵa kóshýimen túsindirdi.
https://www.youtube.com/watch?v=hxz2Kwb4fTc
