Búgin Jańaózende «QazMunaıGaz» UK AQ enshiles kásiporny «Ózenmunaıgaz» AQ qarajatyna salynǵan múmkindigi shekteýli jandarǵa arnalǵan «Alǵa» sport klýbynyń ǵımaraty ashyldy.
Ǵımarat zamanaýı jabdyqtarmen, múmkindigi shekteýli jáne tirek-qımyl apparaty zaqymdalǵan jandarǵa arnalǵan trenajerlarmen jabdyqtalǵan, lıftiler men pandýstar ornatylǵan. Bul – kompanıanyń demeýshiligimen salynǵan jáne paıdalanýǵa berilgen qaladaǵy ekinshi sport kesheni.
Sondaı-aq kompanıa sport klýbtyń qajettiligine jáne sportshylardyń yńǵaıly júrip-turýyna mıkroavtobýs tartý etti.
«Alǵa» sport klýbynda búginde 100-ge jýyq sportshy shuǵyldanady. Olardyń qatarynda respýblıkalyq jáne halyqaralyq jarystardyń birneshe dúrkin chempıondary bar. Sonymen qatar, klýb sportshylary 2024 jyly Parıjde (Fransıa) ótetin Paralımpıada oıyndaryna joldama aldy.
Sport klýbtyń ashylýyna QMG Basqarma tóraǵasy Maǵzum Myrzaǵalıev, Mańǵystaý oblysynyń ákimi Nurlan Noǵaev, Jańaózen qalasynyń ákimi Janseıit Qaınarbaev, «Ózenmunaıgaz» AQ bas dırektory Nurdáýlet Kılybaı, BAQ jáne mádenıet salasynyń ókilderi arnaıy keldi.
«Biz osyndaı keremet sportshylarǵa qoldaý kórsetip, olardyń sporttaǵy jetistikterine úles qosqanymyzdy maqtan tutamyz. Biz jeńistiń qýanyshyn sezinetin jáne basqalardy óziniń úlgisi men tabandylyǵymen shabyttandyratyn múmkindik jasaýǵa qýanyshtymyz. Saıyp kelgende, sport – bul ózińdi fızıkalyq turǵyda jeńý ǵana emes, myqty rýh pen erik-jigerdiń kórsetkishi», - dep atap ótti M.Myrzaǵalıev.
«Bul keshen jaı ǵana ortalyq emes, sonymen qatar, bizdiń qoǵamdaǵy ınklúzıa men teńdiktiń mańyzdylyǵyn kórsetetin sımvolǵa ıe nysan. Bul jer árkim óz potensıalyn ashyp, motıvasıa jáne múmkindik taba alatyn oryn retinde qyzmet etýge arnalǵan.
Aldaǵy Paralımpıada oıyndary bizdiń sportshylarymyz úshin óziniń keremet talantyn ǵana emes, sonymen qatar myzǵymas rýhanı kúshin kórsetýge múmkindik beredi. Bizdiń sportshylar tek jaqsy nátıje kórsetip qana qoımaı, tabandylyq pen rýhanı kúshtiń úlgisin kórsete otyryp, ózgelerdi shabyttandyratynyna senimdimin», - dedi Nurlan Noǵaev.
«Alǵa» sport klýbynyń negizin 1993 jyly Amanturly Qylyshbaev qalaǵan. Klýbtyń qazirgi jetekshisi – Quralbek Seıitov. Sport klýbta otyryp oınaıtyn voleıbol, bochcha, toǵyzqumalaq, qol kúresi, fýtbol, jeńil atletıka, tenıs, júzý jáne ózge de 17 úıirme bar.
Sonymen qatar, QMG «Taza Qazaqstan» jalpyulttyq ekologıalyq aksıasyn qoldaý maqsatynda Jańaózende myń túp aǵash otyrǵyzady. Naýqannyń bastamasy retinde is-shara qatysýshylary sport kesheniniń aýmaǵynda aǵash otyrǵyzdy.
